ހިޔާ މަޝްރޫ ފްލެޓުތަކުގެ ތަޅުދަނޑި ހަވާލުކުރުން ލަސްވަނީ ފްލެޓު ލިސްޓުން އުނިކުރާނެ ސަބަބުހުރި މީހުން އުނިކުރުމުގެ ކުރިން ކޮންމެ މީހަކަށް ވެސް ޖަވާބުދާރީވުމުގެ ފުރުސަތުދޭން ބޭނުންވާތީ ކަމަށް ޕްލޭނިން މިނިސްޓަރ މުހައްމަދު އަސްލަމް ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމުގައި ވާހަކަދައްކަވަމުން، މިނިސްޓަރ އަސްލަމް ވިދާޅުވީ ފްލެޓު ލިބޭ މީހުންގެ ދާއިމީ ލިސްޓެއް އެކުލަވާލައި ނެރުނީ ފުލެޓު ކޮމިޓީއަށް ފެންނަ އަދި ޝަރުތައް ފުރިހަމަވާ މީހުންގެ ކަމަށެވެ. އެކަމަކު ފްލެޓުތައް ދޫކުރުމުގެ ކުރިން ޕްލޭނިން މިނިސްޓްރީން ބަލަން ޖެހޭ ކަންތައްތަކެއް އެބަހުރި ކަމަށް އަސްލަމް ވިދާޅުވިއެވެ.
މިނިސްޓަރ އަސްލަމް ވިދާޅުވީ ފުލެޓު ލިބޭ މީހުންގެ ލިސްޓުގައި ތިބި މީހުންނަށް މީގެ ކުރިން ބޯހިޔާވަހިކަމުގެ މަޝްރޫއެއްގެ ދަށުން ފުލެޓެއް ލިބިފައިވޭތޯއާއި، ނުކުޅެދުންތެރިކަން ހުންނަ މީހަކު ބަލާ ކަމަށް ބުނާއިރު އެކަން ކަށަވަރުކުރުމާއި، އެކަނިވެރި މައިންނާއި ބަފައިން ކަމަށް ބުނާއިރު އެކަން ކަށަވަރުކުރަން ވެސް ޖެހޭ ކަމަށެވެ.
މިނިސްޓަރ އަސްލަމް ވިދާޅުވީ ބައެއް ފަހަރު ފުލެޓަށް އެދި ހުށަހަޅާފައިވާ މީހުންގެ ނަމުގައި އެހެން ބޯހިޔާވަކިހަކަން ވެސް ރަޖިސްޓްރީވެފައި އެބަހުރި ކަމަށާއި، އަދި ނުކުޅެދުންތެރިކަން ހުންނަ މީހުންނާއި އެކަނިވެރި މައިންބަފައިން ކަމަށް ބުނެ އެކެއް ބަލާ ކަމަށް ދެމީހުން ފޯމުލާފައި ތިބި ހާލަތްތައް ވެސް އެބަހުރި ކަމަށެވެ. އެހެންވެ އެ ހާލަތުގައި ފުލެޓު ދެވޭނީ އެކަކަށް ކަމަށާއި ދިނުމުގައި ރަނގަޅަށް އެކަންކަން ކަށަވަރުކުރަން ޖެހޭ ކަމަށެވެ.
މިކަންކަން ބެލި އިރު ގާތްގަނޑަކަށް 200ހާ މީހުންގެ ނަމުގައި ސަރުކާރުން ދޫކޮށްފައިވާ އެކި ބޯހިޔާވަހިކަން ރަޖިސްޓްރީވެފައިވާ ކަމަށް އަސްލަމް ވިދާޅުވިއެވެ.
އެހެން އަޅުގަނޑުމެން ބެލި އިރު 200ހާ މީހުން އެބަތިބި ތަންތަން އެމީހުންގެ ނަމުގައި ރަޖިސްޓްރީ ވެފައި ތިބި. އެޗްޑީސީން، މާލެ ސިޓީ ކައުންސިލުން، އެމީހާގެ ނަމުގަ އެބައިނޭ ކުރިން ބޯހިޔާވަހިކަން. ދެން އަޅުގަނޑުމެން އެމީހުންނާ ކޮމިއުނިކޭޓް ކުރާނަން ސިޓީން ހަމަ. އަޅުގަނޑުމެންނަށް މި ދެންނެވި ތަންތަނުން ރިކޯޑުތަކުން ފެނުނީމަ އަހާނަން ސާފުކޮށްދޭން. އެކަންކަން އެބަޖެހޭ ހިންގަން. އަޅުގަނޑުމެންގެ ނިޔަތަކީ އެމީހަކު ލިސްޓުން އުނިކުރުމެއް ނޫން. އަޅުގަނޑުމެން އަހާނަން. މިނިސްޓްރީން ދާނެ ސިޓީ. ދެން ސާފުކޮށްދޭ އިރު އެކަން އެހެން އޮވެއްޖެއްޔާ ނުލިބޭނެ.އަސްލަމް
މިނިސްޓަރ އަސްލަމް ވިދާޅުވީ އެއްވެސް މީހެއްގެ އަތުން ފްލެޓު އަތުލަން ބޭނުންނުވާ ކަމަށެވެ. އެފަދަ ހާލަތްތަކުގައި ރަނގަޅަށް ބަލަން ޖެހޭ ކަމަށާއި، އެވަރަށް ބަލައި ޖަވާބުދާރީވުމުގެ ފުރުސަތު ނުދީ އެއްވެސް މީހެއްގެ ހައްގެއް އުނި ނުކުރައްވާނެ ކަމަށެވެ.
މީގެ އިތުރަށް މި މަޝްރޫގައި ހުރި ބައެއް ކެޓެގަރީތަކަކީ ތަންކޮޅެއް ފެންވަރު ރަނގަޅު ދިރިއުޅުމަށް އަތްފޯރާނެ ފަދަ މީހުންނަށް ހުޅުވާފައިވާ ކެޓެގަރީތަކެއް ކަމަށާއި، އެ މީހުންނަށް ފެންވަރު ރަނގަޅު ބޯހިޔާވަހިކަން ހޯދުމުގެ ފުރުސަތު ދީ އެގޮތް ބޭނުންވެ ދޫކޮށްލައިފިނަމަ އެތަންތަން ވެސް ބޭނުން ޖެހިފައިވާ މީހުންނަށް ދިނުމުގެ ފުރުސަތު އޮންނާނެ ކަމަށް ވިދާޅުވިއެވެ. އެހެންވެ އެކަންވެސް ކުރަމުން އަންނަ ކަމަށާއި، އެވަރަށް ކަންކަން ބަލައި ކިރިޔާވެސް ފްލެޓު ލިބުމުގެ ހައްގު އޮތް މީހެއް ވާނަމަ އެމީހަކަށް އެ ފުރުސަތު ލިބޭނެ މަގުފަހިކުރުމަށް މަސައްކަތްކުރަމުން އަންނަ ކަމަށް ވިދާޅުވިއެވެ.
ހިޔާ މަޝްރޫގެ ފްލެޓުތަކުގެ މަސައްކަތް ނިމި އެ ފްލެޓުތަކުގެ ދާއިމީ ލިސްޓު އެކުލަވާލިއިރު މިއީ އެފަދަ ދެވަނަ ލިސްޓެވެ. ރައީސް ޔާމީންގެ ސަރުކާރުން އެކުލަވާލި ލިސްޓާއި މި ލިސްޓުގައި ބޮޑެތި ތަފާތުތަކެއް ހުރެ އެކަމުގެ ކަންބޮޑުވުންތަކާއެކު އެ ލިސްޓަށް ވެސް ބަދަލުތައް އައުން އެކަށީގެންވާ ކަމަށް ސަރުކާރުން ބުނެފައިވެއެވެ.
ހިޔާ ފްލްޓު ލިބޭ މީހުންނަށް ފްލެޓުގެ ތަޅުދަނޑިތައް މިދިޔަ މަހު ހަވާލުކުރާނެ ކަމަށް ސަރުކާރުން ބުނި ނަމަވެސް މަހުގެ އެންމެ ފަހު ދުވަހު ވަނީ އެކަން އޭޕްރިލް މަހު ކުރާނެ ކަމަށް އަނެއްކާ ވެސް ބުނެފައެވެ.
