ބުދަ ދުވަހު ވެކްސިން ޖެހި މީހުންގެ އަދަދު 2،000ން މަތީގައި
ވެކްސިންގެ ދެވަނަ ޑޯޒު ޖެހުން ހޮނިހިރު ދުވަހު ފަށާ
ކޮވިޑް-19 ވެކްސިން ޖެހުން
ބުދަ ދުވަހު މުޅި ރާއްޖެއިން ވެކްސިން ޖެހީ 2،034 މީހުން ކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.
އެޗްޕީއޭގެ ތަފާސްހިސާބުތައް ދައްކާގޮތުން އެންމެ ގިނަ މީހުން ވެކްސިން ޖެހީ އަތޮޅުތެރެއިންނެވެ. އެގޮތުން 1،419 މީހުން އަތޮޅުތެރެއިން ވެކްސިން ޖަހާފައިވާއިރު މާލެ ސަރަހައްދުން ވެކްސިން ޖެހީ 615 މީހުންނެވެ. މާލޭގައި ވެކްސިންގެ ފުރަތަމަ ޑޯޒު ޖަހާ މީހުންގެ އަދަދުތައް ދަށްވެފައިވާތާ މިހާރު ވަނީ ހަފްތާއެއްހާ ދުވަސްވެފައެވެ.
މުޅި ރާއްޖެއިން ވެކްސިން ޖެހި މީހުންގެ އަދަދު 237،716ށް އަރާފައިވާއިރު، 130،991 މީހުން ވެކްސިން ޖެހީ މާލެ ސަރަހައްދުންނެވެ. އަދި އަތޮޅުތެރެއިން ވެކްސިން ޖެހީ 106،725 މީހުންނެވެ.
މިދިޔަ ފެބްރުއަރީ މަހުގެ 1 ވަނަ ދުވަހު ރާއްޖޭގައި ވެކްސިން ޖެހުމުގެ ގައުމީ ކެމްޕޭން އެއް ފަށާފައިވާއިރު އޭރު ރާއްޖޭގައި ބޭނުންކުރީ ހަމައެކަނި އިންޑިއާއިން ތައްޔާރުކުރި ކޮވިޝީލްޑް ވެކްސިންއެވެ. އެ ވެކްސިން ދެ ލައްކަ މީހުންނަށް ޖަހާފައިވާއިރު މިހާރު ބޭނުންކުރަމުން އަންނަނީ ޗައިނާގެ ސިނޮފާމް ކުންފުނިން ތައްޔާރުކޮށްފައިވާ ވެކްސިންއެވެ.
ރާއްޖޭގައި ވެކްސިންގެ ދެވަނަ ޑޯޒު ޖެހުން މި އަންނަ ހޮނިހިރު ދުވަހު ރަސްމީކޮށް ފަށާއިރު މެއި މަހުގެ ނިޔަލަށް ރާއްޖޭގެ އާބާދީގެ ބޮޑު ބަޔަކަށް ވެކްސިންގެ ދެވަނަ ޑޯޒް ދެވޭނެ ކަމަށް ކަމާބެހޭ އިދާރާތަކުން ބުނެއެވެ. ވެކްސިންގެ ދެވަނަ ޑޯޒު ފުރިހަމަކުރުމަށް ފަހު ދަތުރުފަތުރުކުރުމުގައި ލުއިތަކެއް ލިބޭއިރު ދެވަނަ ޑޯޒް ޖެހުމަށްފަހު ކަރަންޓީނުނުވެ ދަތުރުކުރެވޭނެ ކަމަށާއި ބައިނަލްއަގްވާމީ ގޮތުން ވެސް އެކަން އެގޮތަށް ހިނގާނެ ކަމަށާއި އަތޮޅުތެރޭގައި ވެސް ދަތުރުކުރެވޭނެ ކަމަށް ސަރުކާރުން ބުނެފައިވެއެވެ.
ރާއްޖޭގައި ވެކްސިން ޖެހުމުގެ ކެމްޕޭން ކުރިއަށް ގެންދަނީ ރާއްޖޭގައި ދިރިއުޅޭ ދިވެހިންނެކޭ އެއްފަދައިން ބިދޭސީންނަށް ވެސް ހިލޭ ވެކްސިން ލިބޭ ގޮތަށެވެ. އެގޮތުން ރާއްޖޭގައި ނުގަވާއިދުން އުޅޭ ބިދޭސީންނަށް ވެސް ރެޑް ކްރެސެންޓްގެ އިސްނެގުމުގެ މަތިން މިހާރު އަންނަނީ ވެކްސިން ދެމުންނެވެ.
ވެކްސިން ޖަހަން ފަށާފައިވާތާ މިހާރު ދެމަސްވާއިރު އަދިވެސް މިކަމަށް އެންމެ އެކަށީގެންވާ ވަަރަށް ތަރުހީބު ނުލިބޭ ކަމަށް އެޗްޕީއޭއިން އަންނަނީ ބުނަމުންނެވެ. އެގޮތުން މި ބަލިން ރައްކާތެރިވެ ހަރޑް އިމިއުނިޓީއާ ހަމައަށް ދެވޭނީ އާބާދީގެ 80 އިންސައްތަ މީހުން ވެކްސިން ޖަހައިގެން ކަމަށް އެޗްޕީއޭއިން ބުނެއެވެ.
