ކޮވިޑް-19ގެ ހާލަތުގައި ރާއްޖޭގެ އިގްތިސާދަށް އައި ހީނަރުކަމާއި ގުޅިގެން، މިއަހަރު ލިބޭނެކަމަށް އަންދާޒާކުރި އާމްދަނީއަށްވުރެ ލިބުނު އާމްދަނީ އިތުރު ކަމަށާއި، ދެވަނަ ކުއާޓާގައި އިގްތިސާދު މައްޗަށް ދާނެ ކަމަށް ގަބޫލުކުރެވޭ ކަމަށް ސަރުކާރުން ހާމަކޮށްފިއެވެ.

ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އޮފީހުގެ ތަރުޖަމާނު މަބްރޫކް އަޒީޒު ވިދާޅުވީ ރާއްޖެގެ އިގްތިސާދީ ހާލަތު 2020 ވަނަ އަހަރު ނިމުނު އިރު 26 އިންސައްތައާއި 29 އިންސައްތައާއި ދޭތެރޭގައި ދަށަށް ދިޔަކަމަށެވެ. އަދި 2021 ވަނަ އަހަރު މާބޮޑު ކުރިއެރުންތަކެއް ލިބޭނެކަމަށް މިދިޔަ އަހަރު ނިމުނު އިރު އުއްމީދު ނުކުރެވޭ ކަމަށާއި، އެއިރުގެ އަންދާޒާއަކީ ރާއްޖޭގެ ގްރޯތު ހުންނާނީ ގާތްގަނޑަކަށް 13 އިންސައްތައިގައި ކަމަށެވެ.

އެހެންނަމަވެސް މިއަދު ރާއްޖޭގައި ފެންނަން އޮތް އިގްތިސާދީ ހާލަތު ތަފާތު ކަން ފާހަގަކުރައްވަމުން މަބްރޫކް ވިދާޅުވީ މިއަހަރުގެ ކުއާޓާ 1 ނިންމާލި އިރުގައި ރާއްޖެ ހުރީ ފާސްޓް ޕޭސް ރިކަވަރީއެއްގައި ކަމަށެވެ. އަދި މިހާރު އައު އަންދާޒާއަކީ ކުއާޓާ 2 ނިންމާއިރުގައި ރާއްޖެ ގްރޯތު ޕާތަކަށް އަރާނެ ކަމަށެވެ. އެހެންކަމުން އިގްތިސާދީ ކުރިއެރުންތައް ދެވަނަ ކުއާޓާ ތެރޭގައި ފެންނަން ފަށާނެކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ މިގޮތަށް ދެކޭ ބައެއް ސަބަބުތަކެއް އެބަހުރި ކަމަށާއި، ރާއްޖޭގެ ފަތުރުވެރިކަމުގެ އެނދުގެ 85 އިންސައްތައަށްވުރެ މަތިން ހުޅުވި އޮޕަރޭޝަނަލައިޒް ވެފައިވާ ކަމަށެވެ. އަދި ޖެނުއަރީ މަހުގެ ތެރޭގައި 90،000ށް ވުރެ ގިނަ ފަތުރުވެރިން ރާއްޖެއަށް ޒިޔާރާތްކުރި އިރު ފެބްރުއަރީ މަހުގައި ވެސް 90،000ށް ވުރެ މަތިން އަދި މާޗް މަސް ނިންމާލީ 100،000ށް ވުރެ ގިނަ ފަތުރުވެރިން ދަތުރުކުރުމަށްފަހުގައި ކަމަށެވެ.

މަބްރޫކް ވިދާޅުވީ މިދިޔަ އަހަރުގެ ނޮވެމްބަރު މަހުގައި ހީކޮށްގެން ތިބީ މި އަހަރު އަންނާނީ 600،000 އެއްހާ ފަތުރުވެރިން ކަމަށާއި، ނަމަވެސް މިހާރުގެ އަންދާޒާތަކަކީ މިލިއަނަށްވުރެ މަތިން ފަތުރުވެރިން އައުން ކަމަށެވެ. އަދި އެގޮތަށް ޓުއަރިޒަމް މިނިސްޓްރީން އަންނަނީ މަސައްކަތް ކުރަމުން ކަމަށާއި، މި 3 މަސް ނިންމާލީ ކޮންމެ މަހެއްގައި ވެސް ސަރުކާރަށް އާމްދަނީ ވަންނާނެކަމަށް ހީކޮށްގެން ތިބި ފައިސާއަށްވުރެ އިތުރަށް ފައިސާ ލިބިގެން ކަމަށް މަބްރޫކް ވިދާޅުވިއެވެ.

މީގެ އިތުރުން ވެކްސިނޭޝަންގެ މަސައްކަތްތައް ކުރިއަށްދާ ގޮތަށް ގޮސް ނިމިއްޖެނަމަ އިތުރު ރަނގަޅު ފާލެއް ފެންނާނެކަމުގެ އުއްމީދު ވަރަށް ބޮޑު ކަމަށް މަބްރޫކް ވިދާޅުވިއެވެ. 2020 ވަނަ އަހަރު ނިމުނު އިރު ރާއްޖޭގެ އިގްތިސާދީ ހާލަތަކީ މިއިން އެއްވެސް ޒަމާނެއްގައި ރާއްޖެއިން ތަހައްމަލުކުރަން ނުޖެހޭ ވަރުގެ ދަތި އުނދަގޫ އިގްތިސާދީ ހާލަތެކެވެ. އެ އިގްތިސާދީ ހާލަތަކީ ރާއްޖޭގެ އިތުރުން ވެސް މުޅި ދުނިޔޭގެ އިގްތިސާދީ ހާލަތަށް ކޮވިޑް-19 ގެ ހާލަތާއި ގުޅިގެން އައި ލޮޅުމުގެ ސަބަބުން އައި ހާލަތެކެވެ.