56 ރަށެއްގައި 520 އެކްޓިވް ކޭސް!
ރަށްތަކުން ޖުމްލަ 385 ދިވެހިން ކޮވިޑަށް ޕޮޒިޓިވްވެފައިވޭ
ކ. މާފުށި
ރާއްޖެއިން ފެންނަ ކޮވިޑްގެ ކޭސްތައް އިތުރުވެފައިވާއިރު މިހާރު 56 ރަށެއްގައި 520 އެކްޓިވް ކޭސް ފެނިފައިވާ ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
އެޗްއީއޯސީ އިން އާންމުކޮށްފައިވާ މައުލޫމާތުތަކަށް ބަލާއިރު ރަށްތަކުން ޖުމްލަ 385 ދިވެހިން ކޮވިޑަށް ޕޮޒިޓިވްވެފައިވާއިރު 135 ބިދޭސީން ވެސް ވަނީ ވައިރަސްއަށް ޕޮޒިޓިވްވެފައެވެ. އެންމެ ގިނައިން މީހުން ކ. ހުރާއިން ޕޮޒިޓިވްވެފައިވާއިރު މީގެ ތެރޭގައި 81 ދިވެހިންނާއި 19 ބިދޭސީން ހިމެނެއެވެ. ދެން އެންމެ ގިނައިން މީހުން ޕޮޒިޓިވްވެފައިވަނީ ޅ. ފެލިވަރުންނެވެ. އެއީ 27 ދިވެހިންނާއި 45 ބިދޭސީންނެވެ.
މިވަގުތު މޮނީޓަރިންގެ ހާލަތަށް ލާފައިވާ ރަށްތަކަށް ބަލާއިރު ދ. ކުޑަހުވަދޫ، ދ. މީދޫ، ރ. އުނގޫފާރު، ކ. ހުރާ، ކ. ދިއްފުށި، ޅ. ނައިފަރު، ރ. މަޑުއްވަރީ، ރ. ހުޅުދުއްފާރު، ޅ. ފެލިވަރު، ޅ. ހިންނަވަރު، ރ. އަލިފުށި، ގދ. ތިނަދޫ، ޅ. އޮޅުވެލިފުށި، ނ. ހޮޅުދޫ އަދި ރ. މާކުރަތު ހިމެނެއެވެ.
އަތޮޅުތެރޭގެ ރަށްތަކުގައި ކޮވިޑް-19ގެ ކޭސްތައް އިތުރުވަމުންދާއިރު އިތުރަށް ސަމާލުވާން ޖެހޭ ކަމަށް އެޗްޕީއޭގެ ޑިރެކްޓަރ އަހްމަދު ނާސިރު ވަނީ ދާދި ފަހުން ވިދާޅުވެފައެވެ. ނާސިރު ވިދާޅުވީ އަތޮޅުތެރޭގެ ރަށްތަކުގައި ޕޮޒިޓިވް ކޭސްތައް އިތުރުވަމުންދާކަން ފާހަގަކުރެވިފައިވާ ކަމަށެވެ. ކޭސްތައް އިތުރުވުމަކީ ވަރަށް ބޮޑު ކަންބޮޑުވުމެއްކަން ފާހަގަކުރައްވައި ނާސިރު ވިދާޅުވީ އަތޮޅުތެރޭގެ ރަށްތަކުން ކޭސްތައް ފެނި، އިތުރުވެގެންދިއުމަކީ އިތުރަށް ވިސްނަން ޖެހޭ ކަމެއް ކަމަށެވެ.
އެހެންކަމުން ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކަށް ފަރުވާ ކުޑަ ނުކުރުމަށް ވަނީ އިލްތިމާސްކޮށްފައެވެ. އަދި ރަށްތަކުގައި ގާއިމްކޮށްފައިވާ ހެލްތް ޓާސްކްފޯސްއަށް އެއްބާރުލުންދީގެން މަސައްކަތްތައް ކުރިއަށް ގެންދިއުމަށް ނާސިރު އެދިވަޑއިގެންނެވިއެވެ.
