ހާރިޖީ ވަޒީރު ޖެނީވާގައި ތިއްބަވާ އެފްރިކާގެ ގައުމުތަކުގެ ސަފީރުންނާ ވަރޗުއަލްކޮށް ބައްދަލުކުރައްވައިފި

ސްވިޓްޒަލެންޑްގެ ޖެނީވާގައި ތިއްބަވާ އެފްރިކާގެ ބައެއް ގައުމުތަކުގެ ސަފީރުންނާ ހާރިޖީ ވަޒީރު ޢަބްދުﷲ ޝާހިދު ވަރޗުއަލްކޮށް އަންގާރަ ދުވަހު  ބައްދަލުކުރައްވައިފިއެވެ.

ޖެނިވާގައި ޤާއިމްވެފައިވާ އެފްރިކަން ގްރޫޕްގެ ރިޔާސަތު ބަލަހައްޓާ ގެބޮންގެ ޕާމަނެންޓް މިޝަންއިން އިންތިޒާމުކުރެއްވި މި ބައްދަލުވުމުގައި ޖެނިވާގައި ހުންނަ އދ. އޮފީހާއި އެހެނިހެން ބައިނަލްއަގުވާމީ ޖަމިއްޔާތަކަށް ކަނޑައަޅާފައި ތިއްބަވާ އެފްރިކަން ޔޫނިއަން މެމްބަރު ގައުމުތަކުގެ ދާއިމީ މަންދޫބުން ބައިވެރިވެވަޑައިގަތެވެ.

ހާރިޖީ ވަޒީރު، ޝާހިދުގެ ވާހަކަފުޅުގައި ދިވެހިރާއްޖެއާއި އެފްރިކާ ގައުމުތަކާ ގުޅުން ހުރި ބައިނަލްއަގުވާމީ މައްސަލަތަކުގެ ތެރެއިން ދެމެހެއްޓެނިވި ތަރައްގީއާއި، މޫސުމީ ބަދަލުތަކާ ދެކޮޅަށް ކުރެވޭ މަސައްކަތާއި، ތަރައްގީއަށް ބޭނުންވާ ފައިސާ ހޯދުމާބެހޭގޮތުގެ މައްޗަށް އަލިއަޅުވާލެއްވިއެވެ. އަދި ކޮވިޑް-19 ގެ ސަބަބުން އެކި ގައުމުތަކަށް ދިމާވެފައިހުރި ދަތިތައް ފާހަގަކުރައްވާ، ދެމެހެއްޓެނިވި ގޮތެއްގައި ކޮވިޑް-19 އިން އަރައިގަތުމާއި ބެހޭގޮތުން ވަޒީރު ވާހަކަފުޅުދެއްކެވިއެވެ.

މީގެ އިތުރުން، އެފްރިކާ ގްރޫޕްގެ ސަފީރުންނާ ބައްދަލުކުރަން ދެއްވި ފުރުސަތަށް ޝުކުރު ދަންނަވައި، މަލްޓިލޭޓަރަލް ސިސްޓަމާއި ބައިނަލްއަގުވާމީ ގުޅުން ބަދަހިކުރަން އެންމެން ގުޅިގެން މަސައްކަތްކުރުމުގެ މުހިއްމުކަން ހާރިޖީ ވަޒީރު ޝާހިދު ފާހަގަކުރެއްވިއެވެ.