ތިނަދޫ ސޭފްހޯމް އާއި ގުޅޭގޮތުން ދިޔަރެސް ނޫހުން ފަތުރަމުން ދަނީ ހަގީގަތާއި ހިލާފު ވާހަކަތަކެއް

ތިނަދޫ ސޭފްހޯމް އާއި ގުޅޭގޮތުން ދިޔަރެސް ނޫހުން ފަތުރަމުން ދަނީ ހަގީގަތާއި ހިލާފު ވާހަކަތަކެއް ކަމަށް ޖެންޑަރ މިނިސްޓްރީގެ އިތުބާރުހުރި ފަރާތަކުން ރާއްޖެއެމްވީ އަށް މައުލޫމާތު ދީފިއެވެ.

އޮންލައިން ނޫސް "ދިޔަރެސް" ގައި މިމަހުގެ 28 ވަނަަ ދުވަހު "ތިނަދޫ ސޭފް ހޯމްގައި ކުޑަކުދިން ނިދަނީ ބިންމަތީގައި،" މި ސުރުޚީގެ ދަށުން ޝާއިޢުކޮށްފައިވާ ޚަބަރާ ގުޅޭ ގޮތުން ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ގދ. ތިނަދޫގައި ހުންނަ ސޭފް ހޯމްގެ މަރާމާތުގެ މަސައްކަތް ކުރިޔަށްދާތީ ކުދިން މިހާރު ބައިތިއްބައިފައިވަނީ އޮފީސް އިމާރާތުގެ މަތީގައެވެ. ނަމަވެސް އެކުދިންނަށް ބޭނުންވާ އަސާސީ ބޭނުންތައް އެތަނުގައި ފުރިހަމަކޮށްދެވިފައިވާ ކަމަށާއި އަދި ކުދިންގެ ރައްކާތެރިކަން ކަށަވަރު ކުރެވިފައިވާ ކަން ވަނީ އެގިފައެވެ. އެގޮތުން އޮފީސް ބައިގައި މިހާރު ހުރީ 4 އެނދު ކަމަށްވާތީ ތިބި 8 ކުދިންގެ ތެރެއިން ކުޑަކުދިން ހިމެނޭ ޢާއިލާގެ ކުދިން ނިންދަވަނީ އެ 4 އެނދުގައެވެ. ދެން ތިބި ކުދިން ނިންދަވަނީ ތަޅުންމަތީ ގޮދަނޑި އަޅައިގެންނެއެވެ.

މީގެ އިތުރުން ސޭފް ހޯމްގައި ކުދިން ބޭނުންކުރުމަށްޓަކައި 10 އެނދާއި 8 އަލަމާރި ހޯދާދީފައިވާ ކަމަށާއި، ފޮޓޯއިން ފެންނަ މަންޒަރަކީ އެތަނުގައި އުޅޭ ކުއްޖެއް އެއް ރެއަކު ކުރި ކަމެއް ކަމަށާއި، އެ ކުއްޖާވަނީ ހަމަ އެގަޑީގައި ކޮޓަރިއަށް ގެންގޮސްފައި ކަމަށް ވަނީ މައުލޫމާތު ލިބިފައެވެ. މީގެ އިތުރުން ފޮޓޯ ނަގާފައިވަނީ ގދ. އެފްސީއެސްސީގައި މަސައްކަތްކުރާ މުވައްޒަފެއް ކަމަށާއި، ނެގި ފޮޓޯވަނީ ގދ. އެފްސީއެސްސީގެ ވައިބަރ ގުރޫޕުގައި ހިއްސާކޮށްފައެވެ. އަދި ފޮޓޯ ޢާންމުކުރި/ މީޑިއާއަށް ދިން ފަރާތެއް ހޯދުމަށް މިނިސްޓްރީގެ އެޗްއާރއެމްޑީއިން މައްސަލަ ބަލަމުންދާ ކަމަށެވެ.

މީގެ އިތުރުން ގދ. ތިނަދޫ ސޭފް ހޯމްގައި ކުޑަކުދިންނަށް ބޭނުންވާ ޟަރޫރީ ސާމާނު (ނިދާނެ ގޮދަޑިއާއި ބާލީސް ފަދަ) ފޯރުކޮށް ނުދޭކަމަށް ރިޕޯޓްކޮށްފައިވާ ކަމަށާއި، އެ ކުދިންނަށް ފައިދާ ހުރި ރަނގަޅު ކާނާ ހިމަނައިގެން މެނޫ އެއް ތައްޔާރުކޮށް އެމެނޫ އާއި އެއްގޮތަށް ކެއިން ބުއިމުގެ އިންތިޒާމް ހަމަޖައްސާދީފައިވާކަން ވެސް ވަނީ އެގިފައެވެ. އަދި ސްކޫލަށް ދިއުމުގެ އެންމެހައި އިންތިޒާމެއް ވެސް ވަނީ ހަމަޖައްސާދީފައެވެ. އަދި ގދ. ތިނަދޫ ސޭފް ހޯމްގައި ތިބޭ ކުޑަކުދިންނަށް ބޭނުންވާ ފަރުނީޗަރާއި އެހެނިހެން ސާމާނު އެތަނުގައި ނެތްކަމަށް ރިޕޯޓްކޮށްފައިވާ އިރު، ގދ. ތިނަދޫގައި ޤާއިމްކޮށްފައިވާ ސޭފް ހޯމްގައި ތިބި ކުދިންނަށް ބޭނުންވާ ފަރުނީޗަރާއި ސާމާނު ވަނީ ފޯރުކޮށްދީފައެވެ. މީގެ އިތުރުން އެތަން ރެނޮވޭޓްކުރުމުގެ މަސައްކަތް ކުރިޔަށްދާތީ ކުދިން މިހާރު ބައިތިއްފައިވަނީ އޮފީސް އިމާރާތުގެ މަތީގައި ކަމަށާއި، އެހެނަސް އެކުދިންނަށް ބޭނުންވާ ހުރިހާ ކަމެއް ކަށަވަރުކޮށްދީފައިވާނެ ކަމަށްވެސް ވަނީ މައުލޫމާތު ލިބިފައެވެ.

މީގެ އިތުރުން މިކަމާ ގުޅޭގޮތުން މަޢުލޫމާތު ސާފުކުރުމަށް ދިޔަރެސް ނޫހުން ޖެންޑަރ މިނިސްޓްރީއާ ގުޅަން މަސައްކަތްކޮށް، އެ މަސައްކަތް ނާކާމިޔާބުވެފައިވާ ކަމަށް ތުހުމަތުކޮށްފައިވީ ނަމަވެސް މިކަމާ ގުޅޭގޮތުން ދިޔަރެސް ނޫހުން މިނިސްޓްރީގެ މީޑިއާ ނުވަތަ ކުދިންނާ ގުޅުންހުރި ދާއިރާގެ މަސައްކަތްކުރާ އެއްވެސް މުވައްޒަފެއްގެ ކިބައިން މަޢުލޫމާތު ސާފުކޮށްފައި ނުވާ ކަން ވެސް ވަނީ އެގިފައެވެ. އަދި މިކަމާ ގުޅޭގޮތުން މިނިސްޓްރީގެ އެއްވެސް އިސް ބޭފުޅަކާ ވެސް ގުޅާފައި ނުވާ ކަމަށް ރާއްޖެއެމްވީ އަށް ވަނީ މައުލޫމާތު ލިބިފައެވެ.