ކަންބޮޑުވުންތަކާ ގުޅިގެން އޭލެވެލް ގަދަ ދިހައެއް ހޮވާ އުސޫލު ބަދަލުކޮށްފި

ދަރިވަރުންގެ ކަންބޮޑުވުންތަކާ ގުޅިގެން އޭލެވެލް ގަދަ ދިހައެއް ހޮވާ ގޮތަށާއި ރައީސުލްޖުމްހޫރިއްޔާ ދެއްވާ ސްކޮލާޝިޕް ދިނުމުގެ އުސޫލަށް ބަދަލު ގެނެސްފިއެވެ.

އެޑިއުކޭޝަން މިނިސްޓްރީން ކުރިން ނިންމީ އޭލެވެލް ގަދަ 10 އެއް ހޮވުމާއި، ސްކޮލާޝިޕް ދިނުމުގައި ހަމައެކަނި އޭޕްރިލް/މެއި ގެ އިމްތިހާނުގެ ނަތީޖާއަށް ބެލުމަށެވެ.

އެހެންނަމަވެސް، މިނިސްޓްރީގެ މި ނިންމުމާ ގުޅިގެން ދަރިވަރުންގެ މެދުގައި ކަންބޮޑުވުން އުފެދިފައިވާތީ، އެ ނިންމުން ބާތިލުކޮށްފައި ވާކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވިއެވެ. އެގޮތުން އޭލެވެލްގެ ކޮންމެ އިމްތިހާނެއްގައި ބައިވެރިވީކަމުގައި ވިޔަސް، ފުރަތަމަ ފަހަރު އިމްތިހާނުގައި ބައިވެރިވާ ދަރިވަރުންނަށް ގަދަ ދިހައަކަށާ ސްކޮލާޝިޕަށް ވާދަކުރެވޭނެ ކަމަށް މިނިސްޓަރު ވިދާޅުވިއެވެ.

މީގެ އިތުރުން މިނިސްޓަރު ވިދާޅުވީ، ދަރިވަރުން ބައިވެރިވާން ބޭނުންވާ އިމްތިހާނެއް ބެލުމަށް، ދަރިވަރުންގެ ޚިޔާލު ހޯދުމަށް ސްކޫލްތަކަށް މިހާރު އަންގާފައި ވާނެކަމަށެވެ.

މިއަހަރުގެ އޭޕްރީލް / މެއިގައި ބާއްވާ އޭލެވެލް އަދި އޭއެސް ލެވެލް އިމްތިހާނުގައި ބައިވެރިވާން އެދިފައިވާ ދަރިވަރުން ބޭނުންވާނަމަ ފޯމު އަނބުރާ ނެގުމަށްފަހު އޮކްޓޯބަރު /ނޮވެމްބަރުގައި އޮންނަ އޭލެވެލް އިމްތިހާނުގައި ބައިވެރިވުމުގެ ފުރުސަތު މިހާރު ވަނީ ހުޅުވާލާފައެވެ. އަދި ފޯމު އަނބުރާ ނަގަން ބޭނުންވާ ދަރިވަރުން، އެކަން ސްކޫލް މެދުވެރިކޮށް، މާޗު މަހުގެ 30 ވަނަ ދުވަހުގެ ކުރިން ޑިޕާޓްމަންޓް އޮފް ޕަބްލިކް އެގްޒަމިނޭޝަނަށް އެންގުމަށް މިނިސްޓްރީން އެދިފައިވެއެވެ.

ފޯމު އަނބުރާ ނެގޭގޮތަށް ހުޅުވާލާފައިވަނީ އައިއޭލެވެލްގެ މާއްދާތަކުންނެވެ. އެޗްއެސްސީ އިމްތިހާނު މިހާރުވެސް ތާވަލު ކުރެވިފައިވާ ގޮތަށް ކުރިއަށް ދާނެ ކަމަށް މިނިސްޓްރީން ވަނީ އަންގާފައެވެ.