ތައުލީމީ ނިޒާމަށް ގެންނަމުންދާ ބަދަލުތަކުން ދަރިވަރުންނަށް އެކަމުގެ ނޭދެވޭ އަސަރު ކުރޭ
ބުރާސްފަތި ދުވަހުގެ ރޭ އެމްޑީޕީން ކުރިއަށް ގެންދިޔަ ޖަލްސާގައި އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން ވާހަކަދައްކަވަނީ
މިސަރުކާރުން މާދުރުނޫން މުސްތަގުބަލެއްގައި ދިރާސީ ކަލަންޑަރަށް އެނެއްކާވެސް ބަދަލުތައް ގެންނާނެ ކަމަށް އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން ވިދާޅުވެއްޖެއެވެ.
ބުރާސްފަތި ދުވަހުގެ ރޭ އެމްޑީޕީން ކުރިއަށް ގެންދިޔަ ޖަލްސާގައި އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރުކަން ވެސް ކުރައްވާފައިވާ އިހުސާން ވިދާޅުވީ މިސަރުކާރުން ތައުލީމީ ނިޒާމަށް ގެންނަމުންދާ ބަދަލުތަކުން ދަރިވަރުންނަށް އެކަމުގެ ނޭދެވޭ އަސަރު ވަރަށް ބޮޑަށް ކޮށްފައިވާ ކަމަށާއި، އެކަމުގެ ނަތީޖާ މިހާރު ފެންނަމުންދާ ކަމަށެވެ.
އިހުސާން ވިދާޅުވީ ރާއްޖޭގެ ތައުލީމީ ކަލަންޑަށް އެއްވެސް ސަބަބަކާ ނުލާ ގެނައި ބޮޑު ބަދަލުގެ ސަބަބުން މިއަދު ދިވެހި ކިޔަވާ ކުދިން ކަރުނަ އަޅާ ރޮމުންދާ ކަމަށާއި، ބެލެނިވެރިން ހާސްކަމުގައި އުޅޭ ކަމަށެވެ. މިއަދު ދަރިވަރުންނަށް ފިލާވަޅާއި، މަސައްކަތް ހަވާލުކުރަނީ އެކުދިންނަށް ނުވާ މިންވަރަށް ކަމަށް އިހުސާން ވިދާޅުވިއެވެ.
މީގެ އިތުރުން އިހުސާން ވިދާޅުވީ މާދުރުނޫން މުސްތަގުބަލެއްގައި މިސަރުކާރުން ދިރާސީ ކަލަންޑަރަށް އަދިވެސް ބަދަލު ގެންނާނެ ކަމަށެވެ.
އިހުސާން ވިދާޅުވީ ތައުލީމީ ނިޒާމު ރަނގަޅު ކުރުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.
މި ސަރުކާރުން ތައުލީމީ ނިޒާމަށް ގެނައި ބަދަލު ނުގެނައުމަށް އެމްޑީޕީގެ ފަރާތުން ގޮވާލިކަން ފާހަގަކުރައްވައި އިހުސާން ވިދާޅުވީ ދަރިވަރުންގެ ހައްގުގައި އަދި ބެލެނިވެރިންގެ ހައްގުގައި މިސަރުކާރު ޖަވާބުދާރީ ކުރުމުގެ މަސައްކަތް ކުރާނެ ކަމަށެވެ. އަދި ބެލެނިވެރިންނާއި ދަރިވަރުން ހިތްވަރު ނަގާނުލައި، ގަދައަޅައި ކުރިއަށް ދިއުމަށް މަސައްކަތް ކުރުމަށް އިހުސާން ގޮވާލެއްވިއެވެ.
