ދައުލަތަށް ގެއްލިފައިވާ ފައިސާ އަނބުރާ ހޯދުމަކީ ހަމައެކަނި ކޮމިޝަނުގެ ޒިންމާއެއް ނޫން: އޭސީސީ
ފައިސާ އަނބުރާ ހޯދުމަށް މާބޮޑަށް ރޭވިގެން މަސައްކަތްތަކެއް ކުރެވޭނެ ނިޒާމެއް ނޯވޭ
އޭސީސީން ކުރިއަށް ގެންދިޔަ ނޫސްވެރިންގެ ބައްދަލުވުމުގައި އެ ކޮމިޝަނުގެ ރައީސް މަރިޔަމް ޝިއުނާ ވާހަކަ ދައްކަވަނީ
ވެންޓިލޭޓަރުތައް ގެނައުމުގައި ވެފައިވާ ޚިޔާނާތާއި ގުޅިގެން ދައުލަތަށް ގެއްލިފައިވާ ފައިސާ އަނބުރާ ހޯދުމަކީ ހަމައެކަނި އެންޓި ކޮރަޕްޝަން ކޮމިޝަން (އޭސީސީ) ގެ ޒިންމާއެއް ނޫންކަަމަށް އެ ކޮމިޝަނުން ބުނެފިއެވެ.
އާދިއްތަ ދުވަހު އޭސީސީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ކޮމިޝަނުގެ ނާއިބްރައީސް ފާތިމަތު އަނޫލާ ވިދާޅުވީ، ފައިސާ އަނބުރާ ހޯދުމަކީ ހަމައެކަނި އޭސީސީގެ ޒިންމާއެއް ނޫން ކަމަށާއި، އެކަން ދައުލަތުގެ އެހެނިހެން މުއައްސަސާތަކުންވެސް ކުރަމުން ގެންދާނެ ކަމަށެވެ. ވެންޓިލޭޓަރުތައް ގެނައުމުގައި ވެފައިވާ އެއްބަސްވުމާއި ގުޅޭގޮތުން އަމަލު ކުރާނެ ގޮތަކާއިމެދު ހެލްތް މިނިސްޓްރީއާއި ބަންޑާރަނާއިބުގެ އޮފީހާ ދެމެދު މަޝްވަރާތަކެއް ކުރެވެމުންދާކަމުގެ މައުލޫމާތު ލިބިފައިވާކަމަށް ވެސް އަނޫލާ ވިދާޅުވިއެވެ.
އެކަމާ ގުޅޭގޮތުން އިތުރަށް ވާހަކަ ދައްކަވަމުން އޭސީސީގެ ރައީސް މަރިޔަމް ޝިއުނާ ވިދާޅުވީ، މިހާތަނަށް އޭސީސީން ތަހުގީގު ކޮށްފައިވާ މައްސަލަތަކުގައި ދައުލަތަށް ލިބެންޖެހޭ ފައިސާގެ އަދަދުތައް ހާމަ ކުރަމުން ދިޔަނަމަވެސް، ފައިސާ އަނބުރާ ހޯދުމަށް މާބޮޑަށް ރޭވިގެން މަސައްކަތްތަކެއް ކުރެވޭނެ ނިޒާމެއް ނޯންނަކަން ޤަބޫލު ކުރައްވާ ކަމަށެވެ.
ޝިއުނާ ވިދާޅުވީ، މިހާރު އޭސީސީގައިވެސް ވަކިން މައްސަލަތައް ކުރިއަށްދާ ނުދާގޮތް ބަލައި ފޮލޯއަޕް ހެދުމަށް ޚާއްސަ ޔުނިޓެއް ކަނޑައަޅާފައިވާނެ ކަމަށެވެ. އަދި ފާއިތުވި 10 ވަރަކަށް އަހަރުގެ ރެކޯޑްތައް ބަލައި، ފައިސާ އަނބުރާ ހޯދަންޖެހޭ އަދަދުތައް ފާހަގަކޮށް އޭސީސީން ބަންޑާރަނާއިބުގެ އޮފީހާއި، ފިނޭންސް މިނިސްޓްރީ ފަދަ މުއައްސަސާތަކަށްވެސް ސިޓީ ހުށައަޅުއްވަމުން ގެންދަވާކަމަށް ޝިއުނާ ވިދާޅުވިއެވެ. އަދި ކޮންމެ ކޭހެއްވެސް ނިންމުމަށްފަހު، ކަމާގުޅޭ މުއައްސަސާތަކަށް އެބީދައިން ސިޓީ ފޮނުއްވަމުން ގެންދަވާނެކަން ފާހަގަ ކުރައްވައި ޝިއުނާ ވިދާޅުވީ، އެ މައްސަލަތައް ފޮލޯއަޕް ކުރުމަކީ މިހާރު ޚާއްސަ އިސްކަމެއް ދީގެން ކުރާ ކަމެއް ކަމަށެވެ. އެގޮތުން މިދިޔަ އަހަރުވެސް 29 މިލިއަން ރުފިޔާ ދައުލަތަށް އަނބުރާ ހޯދަންޖެހޭކަން އޭސީސީން ފާހަގަކޮށްފައި ވާނެކަމަށް ޝިއުނާ ވިދާޅުވިއެވެ. އެހެންނަމަވެސް، މިއީ ހަމައެކަނި އޭސީސީއަށް ކުރެވޭނެ ކަމެއް ނޫންކަމަށް ތަކުރާރުކޮށް ވިދާޅުވިއެވެ.
ޝިއުނާ ވިދާޅުވީ، މިކަންކަން އިތުރަށް ހަރުދަނާ ކުރުމަށްޓަކައި އެކަމާ ގުޅޭ ޚާއްސަ ރިޕޯޓެއްވެސް މަޖިލީހަށް ހުށައެޅުމަށް ތައްޔާރުވަމުންދާ ކަމަށެވެ.
