އެކްސިޑެންޓުގައި އެމްޕީއެލްގެ ޒިންމާއެއް އޮތްނަމަ ބަރީއަ ވާކަށް ނެތިން: ޝާހިދު
28 މާރިޗު 2021 | އާދީއްތަ 09:30ޝާހިދު ވިދާޅުވީ އެކްސިޑެންޓެއް ދިމާވާން މެދުވެރިވާނީ އެންމެ ކަމެއްގެ ސަބަބުން ނޫން ކަމަށް
އެމްޕީއެލުން ބޭއްވި ނޫސްވެރިންގެ ބައްދަލުވުން | މޯލްޑިވްސް ޕޯޓްސް ލިމިޓެޑް
މާލޭ ވިޔަފާރި ބަނދަރުގައި މި އަހަރު ހިނގި ދެ އެކްސިޑެންޓު ހިނގަން މެދުވެރިވުމުގައި، މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޒިންމާއެއް އޮތްނަމަ، އެކުންފުނިން އެކަމުން ބަރީޢަވާން ބޭނުން ނުވާކަމަށް، ކުންފުނީގެ އެމްޑީ ޝާހިދު އަލީ ވިދާޅުވެއްޖެއެވެ.
މި އަހަރުގެ މިހާތަނަށް އައި އިރު، ވިޔަފާރި ބަނދަރުގައި ދެ އެކްސިޑެންޓެއް ހިނގައި ދެމީހުން މަރުވެފައިވެއެވެ. އެއީ ޖެނުއަރީ މަހު، ބިއްލޫރި ޕެލެޓެއްގެ ދަށުވެ މަޖޫރީއަކު މަރުވި ހާދިސާ އާއި، ކްރޭނަކުން ނެގި ކާޕެޓް ރޯލެއް މީހެއްގެ ގަޔަށް ވެއްޓި، ލިބުނު ޒަޚަމުތަކަށް ފަރުވާ ދެމުން ދަނިކޮށް މީހަކު މަރުވި ހާދިސާއެވެ.
މި ދެ ހާދިސާއާ ގުޅިގެން ޝާހިދު ވިދާޅުވީ، އެކްސިޑެންޓެއް ދިމާވާން މެދުވެރިވާނީ އެންމެ ކަމެއްގެ ސަބަބުން ނޫން ކަމަށެވެ. އެ ގޮތުން އެކްސިޑެންޓުގައި އަނިޔާ ލިބުނު ފަރާތަށް ތަމްރީނު ދެވިފައި ނެތުމާއި، އެވަގުތު އަޅަންޖެހޭ ފިޔަވަޅުތައް އެޅިފައި ނެތުމާއި، އެކަށީގެންވާ ވަރަށް އިރުޝާދު ދެވޭނެ ސުޕަވައިޒަރަކު އެތަނުގައި ނެތުން ފަދަ ކަންކަން ޝާހިދު ފާހަގަ ކުރެއްވިއެވެ. އެހެންކަމުން ޒިންމާ ވާންޖެހޭ ފަރާތެއް ކަނޑައެޅޭނީ އެ ހުރިހާ ކަންކަމަށް ބެލުމަށް ފަހުގައި ކަމަށް ޝާހިދު ވިދާޅުވިއެވެ.
މީގެ އިތުރުން ޝާހިދު ވިދާޅުވީ، އެމްޕީއެލްގެ މައްސަލައެއް އުޅޭ ކަމަށް ތަހުގީގުގެ ތެރެއިން ފާހަގަ ކުރެވިއްޖެނަމަ، ކުރިމަގުގައި އެކަން ރަނގަޅުކުރަން މަސައްކަތް ކުރައްވާނެ ކަމަށެވެ. އަދި އިތުރަށް އެޅޭނެ ފިަޔަވަޅުތަކަކީ ކޮބައިތޯ ބަލާ އެކަންކަން ރަނގަޅު ކުރައްވާނެ ކަމަށް ވެސް އޭނާ ވިދާޅުވިއެވެ.
