މިއަހަރުގެ އޭއެސް/އޭލެވެލް އިމްތިޙާނު އޭޕްރީލްމަހަށް އަވަސްވެއްޖެ
28 މާރިޗު 2021 | އާދީއްތަ 02:00މިހާރު އޮތް ގޮތުން އޭއެސް އޭލެވެލް އިމްތިޙާނު ފަށާނީ 26 އޭޕްރީލް 2021ގައި
ސީއެޗްއެސްއީ
މިއަހަރުގެ އޭއެސް/އޭލެވެލް އިމްތިޙާނު އޭޕްރީލްމަހަށް އަވަސްވެއްޖެއެވެ.
އިމްތިޙާނުގެ އެންމެ ފަހުގެ ކަންކަން ހާމަކުުރުމަށް ނެރުނު ނޫސްބަޔާނެއްގައި އެޑިއުކޭޝަން މިނިސްޓްރީއިން ވަނީ މެއި/ޖޫންގައި ބޭއްވުމަށް ހަމަޖެހިފައިވާ އިމްތިޙާނު ފެށުން އޭޕްރީލް 26ށް އަވަސް ވެފައިވާކަން ހާމަކޮށްފައެވެ. މި ނިންމުމަކީ އޭ.އެސް/އޭލެވެލް ފޯރުކޮށްދޭ އެޑެކްސެލްގެ ނިންމުމެއްކަން ހާމަކޮށް އެޑިއުކޭޝަން މިނިސްޓްރީއިން ބުނީ މި ނިންމުން ބަދަލުކުރުމަށް އެ މިނިސްޓްރީ އާއި ޑިޕާޓްމެންޓް އޮފް ޕަބްލިކް އެގްޒެމިނޭޝަނުން އެޑެކްސެލްއާއެކު ގިނަ މަޝްވަރާތަކެއް ކުރިކަމަށެވެ. އެހެންނަމަވެސް މި މަޝްވަރާތަކުން އަލިމަގެއް ފެނިފައި ނުވާކަމަށް އެޑިއުކޭޝަން މިނިސްޓްރީއިން ވަނީ ބުނެފައެވެ. މިއަހަރުގެ އޭއެސް/އޭލެވެލް އިމްތިޙާނު އޭޕްރީލްމަހަށް އަވަސްވުމުން މިއަހަރުގެ އެޗްއެސްސީ އިމްތިޙާނު ބާއްވާނީ 13 ޖޫން 2021ގައިކަމަށް އެޑިއުކޭޝަން މިނިސްޓްރީއިން ވަނީ ހާމަކޮށްފައެވެ.
މިއަހަރުގެ މޭ/ޖޫންގައި ބޭއްވުމަށް ހަމަޖެހިފައިވާ އޭ.އެސް/އޭލެވެލް އިމްތިހާނު ކުރިން ތާވަލުކުރިގޮތަށް ބޭއްވުމަށް އެޑިއުކޭޝަން މިނިސްޓްރީއިން ވަނީ ނިންމާފައެވެ. އެޑިޔުކޭޝަން މިނިސްޓްރީން ކުރީގެ ތާވަލާ އެއްގޮތައް އޭ.އެސް/އޭލެވެލް އިމްތިހާނު ބާއްވަން މާރޗް 3 ވަނަ ދުވަހު ނިންމިއިރު، މިދިޔަ ފެބްރުއަރީ މަހުގެ 3 ވަނަ ދުވަހު ކޮވިޑް-19 ގެ ހާލަތަށް ރިއާޔަތްކޮށް އިނގިރޭސި ވިލާތުގެ ޕިއަރސަންއިން މި އިމްތިޙާނު ނުބާއްވަން ނިންމިކަމަށް ވަނީ ބުނެފައެވެ. އެހެންނަމަވެސް، އެސެސްމަންޓް ކުރިއަށްދާނެކަމަށް އޭރު ވަނީ ހާމަކޮށްފައެވެ.
އެޑިއުކޭޝަން މިނިސްޓްރީ އިން ބޭއްވި ނޫސްވެރިންގެ ބައްދަލުުމެއްގައި އެ މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން ވަނީ، ރާއްޖޭގައި ބާއްވާނީ އެޑެކްސެލް އިން ދޭ އިމްތިހާނެއް ކަމަށާއި، ސެޓްފިކެޓު ވެސް ދޭނީ އެޑެކްސެލްއިން ކަމަށެވެ. އެގޮތުން ދުނިޔޭގެ ހުރިހާ ޤައުމެއްގައި މި އިމްތިޙާނު ނުބާއްވާ ޓީޗަރ ބޭސްޑް އެސެސްމަންޓެއް ކުރިއަށްގެންދިއުމަށް ނިންމުމުން، މިކަމަކީ ރާއްޖޭގައި ކުރިއަށް ނުގެންދެވޭނެކަމެއްކަން ރާއްޖޭގެ އެޑިއުކޭޝަން މިނިސްޓްރީއިން ފާހަގަކުރިކަމަށް ޑެޕިއުޓީ މިނިސްޓަރ އިހުސާން ވިދާޅުވިއެވެ. މި ސަބަބައްޓަކައި ރާއްޖޭގައި ކުދިންނަށް ނުފެންނަ ސުވާލު ކަރުދާސް ކުދިންނަށް ފޯރުކޮށްދީގެން އިމްތިޙާނުކުރުމަށް ރާއްޖެއިން މެދުކެނޑުމެއްނެތި ވަކާލާތުކުރިކަމަށް ޑެޕިއުޓީ މިނިސްޓަރ އިހުސާން ވިދާޅުވިއެވެ. ނަތީޖާއެއްގެ ގޮތުން އެޑެކްސެލްއާއެކު ބޭއްވި 5 ބައްދަލުވުމަށްފަހު ރާއްޖޭގައި މި އިމްތިޙާނު ބޭއްވުމުގެ ފުރުސަތު އެޑެކްސެލުން ދޭން ނިންމާފައިވާކަމަށް އިހުސާން ވިދާޅުވިއެވެ. މިގޮތަށް އިމްތިޙާނު ބޭއްވޭނެކަން ޔަޤީންވީ ރޭގެ ވަގުތެއްގައިކަމަށާއި، ރާއްޖެއިން މިފަދަ އިންތިޒާމެއް ހަމަޖެއްސުމުގައި އަދާކުރި ދައުރަށް އެޑެކްސެލުން ޝުކުރުއަދާކުރިކަމަށް ޑެޕިއުޓީ މިނިސްޓަރ އިހުސާން ވިދާޅުވިއެވެ.
