އާ ގާނޫނުގެ ދަށުން ފުލުހުން ހުވާކޮށްފި

އަލަށް އަމަލުކުރަން ފެށި ފުލުހުންގެ ޚިދުމަތުގެ ގާނޫނުގެ ދަށުން ފުލުހުން ހުވާ ކޮށްފިއެވެ.

މިކަމަށްޓަކައި ހޮނިހިރު ދުވަހު އިސްކަންދަރު ކޮށީގައި އޮތް ޚާއްސަ ރަސްމިއްޔާތު ޝަރަފުވެރި ކޮށްދެއްވީ، ނާއިބުރައީސް ފައިސަލް ނަސީމާއި، އުއްތަމަ ފަނޑިޔާރު އަލްއުސްތާޒު އަހުމަދު މުއުތަސިމު އަދުނާނެވެ.

މި ރަސްމިއްޔާތުގައި ހޯމް މިނިސްޓަރ އިމްރާން އަބްދުﷲ އާއި، ކޮމިޝަނަރ އޮފް ޕޮލިސް މުހައްމަދު ހަމީދާއި، ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާން ޔޫސުފާއި، ޑެޕިއުޓީ ކޮމިޝަނަރ އޮފް ޕޮލިސް އަލީ ރަޝީދާއި، ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގެ މުގައްރިރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ގެ އިތުރުން  ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު ބައިވެރިވެވަޑައިގެންނެވިއެވެ.

އާ ގާނޫނުގެ ދަށުން ފުލުހުންނަށް ހުވާ ލައިދެއްވީ ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޒު އަހުމަދު މުއުތަސިމު އަދުނާންއެވެ.

ފުލުހުންނަށް ހުވާ ލައިދެއްވުމަށްފަހު އުއްތަމަ ފަނޑިޔާރު ދެއްކެވި ވާހަކަފުޅުގައި، ކޮންމެ ފުލުހަކީވެސް ޒިންމާދާރު، އަދުލުވެރި އަދި މަސައްކަތުގެ މަސްއޫލިއްޔާތު އުފުލާ މީހެއްކަމުގައި ވުމަށް އިލްތިމާސް ކުރެއްވިއެވެ. އަދި ހިދުމަތް ދިނުމުގައި އިހުލާސްތެރިކަމާއި ނަޒާހަތްތެރިކަން އިސްކުރުމަށާއި، އެކުގައި މަސައްކަތްކުރާ މީހުންނަށާއި މަސައްކަތުގައި މުއާމަލާތްކުރާ މީހުންނަށް އިހުތިރާމްކުރުމާއެކު ހެޔޮކޮށް ހިތައި އިންސާނީ ކަރާމާތް ރައްކާތެރިކުރުމަށް މަސައްކަތް ކުރަން ވާނެކަމަށް ވިދާޅުވިއެވެ.

ހުވާކުރެއްވުމަށްފަހު ކޮމިޝަނަރ އޮފް ޕޮލިސް މުހައްމަދު ހަމީދާއި، ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާން ޔޫސުފް އަދި ޑެޕިއުޓީ ކޮމިޝަނަރ އޮފް ޕޮލިސް އަލީ ރަޝީދު ވަނީ ހުވާގެ ލިޔުމުގައި ސޮއިކުރައްވާފައެވެ. މީގެއިތުރުން ހުވާކުރުމަށްފަހު ކޮމިޝަންޑް އޮފިސަރުންނާއި ފުލުހުންވަނީ ހުވާގެ ލިޔުމުގައި ސޮއިކޮށްފައެވެ.

ފުލުހުން ހުވާކުރުމުގެ ރަސްމިއްޔާތު މާލޭގެ އިތުރުން ރާއްޖޭގައި ފުލުހުންގެ ޚިދުމަތް ގާއިމްކޮށްފައިވާ ހުރިހާ ރަށެއްގައި ވަނީ ބާއްވާފައެވެ.