އަނިޔާވެރި ގޮތަކަށް މަރާލާފައި އޮއްވާ ފެނުނު، ސޯޝަލް މީޑިއާ އެކްޓިވިސްޓް އަދި މަޝްހޫރު ބްލޮގަރު ޔާމީން ރަޝީދުގެ މަރުގެ މައްސަލަ މިނިވަންކަމާއި ދެފުށް ފެންނަ ފަދަ ގޮތަކަށް ބަލައި ދިނުމަށް އެދި އާއިލާއިންނާއި ހެޔޮއެދޭ ފަރާތްތަކުން ފުލުހުންގެ އިދާރާއަށް ވަކިވަކިން ހުށަހެޅި ސިޓީތައް ވެސް ބަލައިނުގަނެ އަނބުރާ ފޮނުވާލައިފި އެވެ.

ޔާމީންގެ އާއިލާއިންނާއި ހެޔޮއެދޭ ފަރާތްތަކުން ފުލުހުންގެ އިދާރާއަށް ސިޓީ ހުށަހަޅަން އެންމެ ފުރަތަމަ މަސައްކަތް ކުރީ އަންގާރާ ދުވަހު އެވެ. ފުލުހުންގެ އިދާރާއަށް 800 އެއްހާ ސިޓީ ހުށަހެޅުމުން، އެސިޓީތަކާ ހަވާލު ވުމަށް ފަހު، ސިޓީތައް ބަލައި ނުގަނެ ވަނީ އަނބުރާ ފޮނުވާލާފަ އެވެ.

އަންގާރަ ދުވަހު ހުށަހެޅި ސިޓީތައް ބަލައިނުގަނެ އަނބުރާ ފޮނުވާލީ، އެކަކުގެ ފަރާތުން އެގޮތަށް ބައިވަރު ސިޓީތަކެއް ހުށަހެޅުމުން އެ ސިޓީތަކަށް ޖަވާބު ދިނުމަށް ފުލުހުންނަށް ދަތިތަކާ ކުރިމަތިވާނެ ކަމަށް ބުނެ އެވެ. އަދި ފުލުހުންގެ އިދާރާއަށް ސީޓީއެއް ހުށަހަޅާނަމަ ހުށަހެޅޭނީ އެމީހަކު އަމިއްލައަށް ނުވަތަ އެ އިދާރާއަށް ގަބޫލުކުރެވޭ ފަރާތަކަށް ހަވާލުކޮށްގެން ކަމަށް ފުލުހުން ބުނެފައި ވެއެވެ.

ފުލުހުން އެގޮތަށް ނިންމުމާ ގުޅިގެން ބައެއް މީހުން ވަނީ ބުރާސްފަތި ދުވަހު ވަކިވަކިން އަމިއްލަ ސިޓީ ހިފައިގެން ގޮސް ފުލުހުންގެ އިދާރާއަށް ހުށަހަޅާފަ އެވެ. ނަމަވެސް، ވަކިވަކިން ހިފައިގެން ގޮސް ހުށަހެޅި ސިޓީތައް ވެސް ބަލައިނުގަނެ ފުލުހުން ވަނީ އަނބުރާ ފޮނުވާލާފަ އެވެ. އޭގެ ފަހުން ފުލުހުން ވަނީ ސިޓީތައް ހުށަހެޅޭނީ ގަލޮޅު ޕޮލިސް ސްޓޭޝަނަށް ކަމަށް ބުނެފަ އެވެ.

މިކަމާ ގުޅޭ ގޮތުން ފުލުހުންގެ ތަރުޖަމާނު ވިދާޅުވީ ސިޓީ ހުށަހެޅުމުގައި ކަން ކުރަންވީ ގޮތް އަންގާފައިވާނެ ކަމަށެވެ. އަކަމާ ގުޅޭ ގޮތުން އިތުރު އެއްޗެއް އޭނާ ވިދާޅެއް ނުވި އެވެ.

ޔާމީންގެ އާއިލާއިންނާއި ހެޔޮ އެދޭ ފަރާތްތަކުން ހުށަހަޅަން މަސައްކަތް ކުރި ސިޓީތަކުގައި އެދިފައިވަނީ މިނިވަންކަމާއެކު ތަހުގީގު ކުރިއަށް ގެންދިއުމަށާއި ތަހުގީގުގައި ބޭރުގެ ފަރާތްތައް ބައިވެރިކޮށް ދިނުމަށެވެ.

ޔާމީން މަރާލި މައްސަލައާ ގުޅިގެން މިހާތަނަށް ފުލުހުން ވަނީ ދެ މީހަކު ހައްޔަރުކޮށްފަ އެވެ. ފުލުހުން ބުނާ ގޮތުގައި ބޭރުގެ ތަހުގީގީ އިދާރާތަކުގެ އެހީތެރިކަމާއެކު ކުރިއަށް ގެންދާ ތަހުގީގަށް ކުރިއެރުންތަކެއް ދަނީ ލިބެމުންނެވެ.