ވެކްސިން ޖެހި މީހުންގެ އަދަދު 227،000ން މައްޗަށް

ރާއްޖޭގައި ކޮވިޑް-19 ވެކްސިން ޖެހި މީހުންގެ ޖުމްލަ އަދަދު 227،000ން މައްޗަށް އަރައިފިއެވެ.

ހެލްތު ޕްރޮޓެކްޝަން އެޖެންސީން އާންމުކޮށްފައިވާ އެންމެ ފަހުގެ މައުލޫމާތުތައް ދައްކާގޮތުން ބުރާސްފަތި ދުވަހު ވެކްސިން ޖެހި 2،444 މީހުންނާއިއެކު ވެކްސިން ޖެހި މީހުންގެ ޖުމްލަ އަދަދު ވަނީ 227،423ށް އަރާފައެވެ.

ބުރާސްފަތި ދުވަހު މާލެ ސަރަހައްދުން 1،392 މީހުން ވެކްސިން ޖަހާފައިވާއިރު، އަތޮޅުތެރެއިން ވެކްސިން ޖަހާފައި ވަނީ 1،052 މީހުންނެވެ. ވެކްސިން ޖަހާފައިވާ މީހުންގެ ޖުމްލަ އަދަދަށް ބަލާއިރު، މާލެ ސަރަހައްދުން ވެކްސިން ޖަހާފައި ވަނީ 127،277 މީހުންނެވެ. އަދި އަތޮޅުތެރެއިން ވެކްސިން ޖަހާފައި ވަނީ 100،146 މީހުންނެވެ.

ކޮވިޑް-19 ވެކްސިންތަކުގެ ތެރެއިން ރާއްޖެއިން ޖަހަނީ ކޮވިޝީލްޑް ވެކްސިނާއި ޗައިނާގެ ސިނޮފަރމް ކުންފުނީގެ ކޮވިޑް ވެކްސިނެވެ. ކޮވިޝީލް ވެކްސިންގެ ފުރަތަމަ ޑޯޒް މާލެ ސަރަހައްދުގައި ޖެހުން ހުއްޓާލާފައިވާއިރު، ހޯމަ ދުވަހު އެޗްޕީއޭއިން ވަނީ ސިނޮފަރމްގެ ކޮވިޑް ވެކްސިން ޖަހަން ފަށާފައެވެ. ތަފާތު ދެ ވެކްސިނެއް ރާއްޖޭގައި މިހާރު ޖަހަމުންދާއިރު، މި ދެ ވެކްސިނަކީވެސް ދެ ޑޯޒް ޖަހަންޖެހޭ ވެކްސިނެވެ.

މީގެ އިތުރުން ވެކްސިންގެ ދެ ވަނަ ޑޯޒް ޖަހަން ފަށާނެކަމަށް އެޗްޕީއޭއިން އާންމުކޮށްފައިވާއިރު، ވެކްސިންގެ ދެ ވަނަ ޑޯޒް ޖެހޭނީ ބޭސްފަރުވާއަށް ނުވަތަ ތައުލީމު ހާސިލުކުރުމަށް ގައުމުން ބޭރަށް ދަތުރުކުރަންޖެހުމުގެ ސަބަބުން ފުރަތަމަ ޑޯޒް ޖެހިތާ 12-8 ހަފުތާގެ ތެރޭގައި ވެކްސިންގެ ދެ ވަނަ ޑޯޒް ފުރިހަމަ ނުކުރެވޭނެ ފަރާތްތަކަށް ކަމަށް އެޗްޕީއޭއިން ބުނެއެވެ. އަދި އެފަރާތްތައް ވެކްސިންގެ ފުރަތަމަ ޑޯޒް ޖެހިތާ 4 ހަފްތާ ހަމަވާންޖެހޭއިރު، ވެކްސިންގެ ދެ ވަނަ ޑޯޒް ޖަހަން ބޭނުންވާ ފަރާތްތަކުން ވެކްސިންޖެހުމަށް ނަން ނޯޓުކުރުމުން ވެކްސިން ޖެހުމަށް އެޕޮއިންޓްމަންޓް ހަމަޖައްސައި، ވެކްސިން ޖަހަން ހަމަޖެހިފައިވާ ގަޑިއާއި ތަން އަންގާނެކަމަށް އެޗްޕީއޭއިން ބުނެއެވެ.