ކުޑަހުވަދޫއިން 243 ގޯތި ދޫކުރަން ނިންމައިފި
25 މާރިޗު 2021 | ބުރާސްފަތި 08:42މިމަހުގެ 24ން ފެށިގެން އޭޕްރީލް 08 ވަނަދުވަހުގެ ނިޔަލަށް ފޯމް ލެވޭނެ
ދ.ކުޑަހުވަދޫ، ބަންދު ދުވަސްތަކުގައި ފޯމް ދޫކުރުމާއި ބަލައިގަތުމަށް ހަމަޖެހިފައިވާ ކަމަށް ކައުންސިލުން ބުނޭ
ދ. ކުޑަހުވަދޫ އިން ދިރިއުޅުމަށްޓަކައި ގޯތި ދޫކުރަން ނިންމާފައިވާ ކަމަށް އެރަށުގެ ކައުންސިލުން ބުނެފިއެވެ.
ކުޑަހުވަދޫ ކައުންސިލުން ބުނީ ބޯހިޔާވަހިކަމަށް ދިމާވެފައިވާ މައްސަލައަށް ހައްލު ގެނައުމަށް މަސައްކަތް ކުރަމުންދާ ކަމަށާއި، 243 ގޯތި ދޫކުރަން ނިންމާފައިވާ ކަމަށެވެ. އަދި މިހާރު ގޯއްޗަށް އެދި ފޯމް ހުށަހެޅުމުގެ ފުރުސަތު ހުޅުވާލާފައިވާ ކަމަށް ވެސް ކައުންސިލުން ބުނެއެވެ.
ކައުންސިލުން ބުނީ ގޯތި ހޯދުމަށް ޝައުގުވެރިވާ ފަރާތްތަކުން އެކަމަށްއެދޭ ފޯމް ފުރިހަމަ ކުރުމަށްފަހު ކައުންސިލް އިދާރާއަށް ހުށަހެޅުމަށް އެދޭ ކަމަށާއި، ގޯއްޗަށްއެދޭ ފޯމް މިމަހުގެ 24ން ފެށިގެން އޭޕްރީލް 08 ވަނަދުވަހުގެ ނިޔަލަށް ކުޑަހުވަދޫ މަލްޓިޕާޕަސް ބިލްޑިންގެ ގްރައުންޑް ފުލޯ ހޯލްއިން ލިބޭނެ ކަމަށެވެ. އަދި ފޯމް މެއިލް ކުރާނަމަ economic.kudahuvadhoo@gmail.comށް މެއިލް ކުރުމަށް ކައުންސިލުން އެދިފައިވެއެވެ.
ރަސްމީ ދުވަސްތަކުގައި ފޯމްދޫކުރުމާއި ބަލައިގަތުން ހަމަޖެހިފައިވަނީ ހެނދުނު 9:00ން މެންދުރުފަހު 2:00ށެވެ. އަދި ރޭގަނޑު 8:00ން 10:00ށެވެ. ބަންދު ދުވަސްތަކުގައި ފޯމް ދޫކުރުމާއި ބަލައިގަތުމަށް ހަމަޖެހިފައިވަނީ މެންދުރުފަހު 2:00ން ހަވީރު 5:00ށެވެ. އަދި ރޭގަނޑު 8:00ން 10:00ށެވެ.
ކައުންސިލުން ބުނީ 08 އޭޕްރީލް 2021 ވަނަ ދުވަހުގެ ރޭގަނޑު 10:00ގެ ކުރިން ފޯމް ހުށަހަޅަން ޖެހޭ ކަަމަށާއި، އޭގެ ފަހުން ފޮނުވާ އަދި ހުށަހަޅާ އެއްވެސް ފޯމެއް ބަލައި ނުގަންނާނެ ކަމަށެވެ.
