އަންގާރަ ދުވަހު 2،200ށް ވުރެ ގިނަ މީހުން ވެކްސިން ޖަހައިފި

ހެލްތު ޕްރޮޓެކްޝަން އެޖެންސީން އާންމުކޮށްފައިވާ ތަފާސްހިސާބުތައް ދައްކާގޮތުން ހޯމަ ދުވަހު 2،202 މީހުން ވެކްސިން ޖަހައިފިއެވެ.

އެއީ މާލެ ސަރަހައްދުން ވެކްސިން ޖެހި 1،451 މީހުންނާއި އަތޮޅުތެރޭގެ ރަށްތަކުން ވެކްސިން ޖެހި 751 މީހުންނެވެ. މިއާއިއެކު ރާއްޖެއިން ކޮވިޑް-19 ވެކްސިންގެ ފުރަތަމަ ޑޯޒް ޖެހި މީހުންގެ ޖުމްލަ އަދަދު ވަނީ 222،970ށް އަރާފައެވެ.

އެޗްޕީއޭގެ ތަފާސްހިސާބުތައް ދައްކާގޮތުން މާލެ ސަރަހައްދުން 124،678 މީހުން ވަނީ މިހާރު ވެކްސިން ޖަހާފައެވެ. އަދި އަތޮޅުތެރެއިން 98،292 މީހުން ވަނީ ވެކްސިން ޖަހާފައެވެ.

ކޮވިޑް-19 ވެކްސިންތަކުގެ ތެރެއިން ރާއްޖެއިން ޖަހަނީ ކޮވިޝީލްޑް ވެކްސިނާއި ޗައިނާގެ ސިނޮފަރމް ކުންފުނީގެ ކޮވިޑް ވެކްސިނެވެ. ކޮވިޝީލް ވެކްސިންގެ ފުރަތަމަ ޑޯޒް މާލެ ސަރަހައްދުގައި ޖެހުން ހުއްޓާލާފައިވާއިރު، ހޯމަ ދުވަހު އެޗްޕީއޭއިން ވަނީ ސިނޮފަރމްގެ ކޮވިޑް ވެކްސިން ޖަހަން ފަށާފައެވެ. ތަފާތު ދެ ވެކްސިނެއް ރާއްޖޭގައި މިހާރު ޖަހަމުންދާއިރު، މި ދެ ވެކްސިނަކީވެސް ދެ ޑޯޒް ޖަހަންޖެހޭ ވެކްސިނެވެ.

މީގެ އިތުރުން ވެކްސިންގެ ދެ ވަނަ ޑޯޒް ޖަހަން ފަށާނެކަމަށް އެޗްޕީއޭއިން އާންމުކޮށްފައިވާއިރު، ވެކްސިންގެ ދެ ވަނަ ޑޯޒް ޖެހޭނީ ބޭސްފަރުވާއަށް ނުވަތަ ތައުލީމު ހާސިލުކުރުމަށް ގައުމުން ބޭރަށް ދަތުރުކުރަންޖެހުމުގެ ސަބަބުން ފުރަތަމަ ޑޯޒް ޖެހިތާ 12-8 ހަފުތާގެ ތެރޭގައި ވެކްސިންގެ ދެ ވަނަ ޑޯޒް ފުރިހަމަ ނުކުރެވޭނެ ފަރާތްތަކަށް ކަމަށް އެޗްޕީއޭއިން ބުނެއެވެ. އަދި އެފަރާތްތައް ވެކްސިންގެ ފުރަތަމަ ޑޯޒް ޖެހިތާ 4 ހަފްތާ ހަމަވާންޖެހޭއިރު، ވެކްސިންގެ ދެ ވަނަ ޑޯޒް ޖަހަން ބޭނުންވާ ފަރާތްތަކުން ވެކްސިންޖެހުމަށް ނަން ނޯޓުކުރުމުން ވެކްސިން ޖެހުމަށް އެޕޮއިންޓްމަންޓް ހަމަޖައްސައި، ވެކްސިން ޖަހަން ހަމަޖެހިފައިވާ ގަޑިއާއި ތަން އަންގާނެކަމަށް އެޗްޕީއޭއިން ބުނެއެވެ.