އިންގްސް ހޯދުމަށް ސިޓީން މަސައްކަތްކުރަނީ
ސިޓީން ފާރަލަމުން އަންނަ ހާލަންޑުގެ އަގު ބާޒާރުގައި ވަނީ ބޮޑުވެފައި
ސައުތެމްޓަނަށް ކުޅެމުން އަންނަ އިންގްލެންޑުގެ ފޯވާޑް ޑެނީ އިންގްސް
ސައުތެމްޓަނަށް ކުޅެމުން އަންނަ އިންގްލެންޑުގެ ފޯވާޑް ޑެނީ އިންގްސް ހޯދުމަށް މެންޗެސްޓާ ސިޓީން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުން އިންގްސް ހޯދުމަށް ސިޓީން މަސައްކަތްކުރަނީ މި ސީޒަން ނިމުމުން، އެ ކުލަބު ދޫކޮށްލަން ތަޖުރިބާކާރު ފޯވާޑް ސާޖިއޯ އަގުއޭރޯ ނިންމާފައިވާތީއެވެ. އެގޮތުން މި ސީޒަން ނިމުމުން އަގުއޭރޯގެ އެއްބަސްވުން ހަމަވާއިރު، ބާސެލޯނާއަށް ބަދަލުވާން އަގުއޭރޯ ބޭނުންވާ ކަމަށް ރިޕޯޓުތައް ބުނެއެވެ.
އެހެންކަމުން އަގުއޭރޯގެ ބަދަލުގައި އުމުރުން 28 އަހަރުގެ އިންގްސް ހޯދުމަށް ސިޓީން މިހާރު އަންނަނީ މަސައްކަތްކުރަމުންނެވެ. ރިޕޯޓުތައް ބުނާ ގޮތުން އިންގްސް ހޯދުމަށް ސިޓީން މަސައްކަތްކުރަނީ ބޮރޫޝިއާ ޑޯޓްމުންޑަށް ކުޅެމުން އަންނަ ނޯވޭގެ ޒުވާން ފޯވާޑް އާލިން ބްރައުޓް ހާލަންޑުގެ އަގު ބާޒާރުގައި ބޮޑުވުމާ ގުޅިގެން، އޭނާ ގަތުމުގެ ބަދަލުގައެވެ. އެގޮތުން ބާޒާރުގައި ހާލަންޑުގެ އަގު 100 މިލިޔަން ޕައުންޑުގައި އުޅޭއިރު، އޭނާ ހޯދުމަށް ޔޫރަޕުގެ ވަރުގަދަ ކުލަބުތަކުން އަންނަނީ މަސައްކަތްކުރަމުންނެވެ.
2018 ވަނަ އަހަރު ލިވަޕޫލް ދޫކޮށް އިންގްސް އެންމެ ފުރަތަމަ ސައުތެމްޓަނާ ގުޅުނީ ލޯނު އެއްބަސްވުމެއްގެ ދަށުންނެވެ. އަދި އޭގެ އަނެއް އަހަރު 18 މިލިޔަން ޕައުންޑް ދެއްކުމަށްފަހު ސައުތެމްޓަނުން ވަނީ އިންގްސްގެ އެއްބަސްވުން ދާއިމީކޮށްފައެވެ. މިހާތަނަށް ސައުތެމްޓަނުގައި އިންގްސް ތިން ސީޒަން ހޭދަކޮށްފައިވާއިރު، އޭނާ ވަނީ އެ ޓީމަށް ކުޅެދިން 92 މެޗުގައި 42 ލަނޑު ޖަހާފައެވެ.
