މިޔަރު މަސްވެރިކަން ކުރަމުން ދިޔަ ދޯންޏެއް ހިފަހައްޓައިފި
22 މާރިޗު 2021 | ހޯމަ 18:22ދޯނީގައި މިޔަރާއި މިޔަރު އުރަހަ އަދި މިޔަރު މަަސް ފެނިފައިވޭ
މިޔަރު މަސްވެރިކަން ކުރަނިކޮށް ހިފެހެއްޓި ދޯނިން ފެނުނު ތަކެތި
މިޔަރު މަސްވެރިކަން ކުރަމުންދިޔަ ދޯންޏެއް ފުލުހުން ހިފަހައްޓައިފިއެވެ.
ފުލުހުން ބުނީ ހޯމަ ދުވަހުގެ 11:30 ހާއިރު އއ. މާންދޫ ކައިރީގައި ބަޔަކު މިޔަރު މަސްވެރިކަން ކުރާކަމުގެ މައުލޫމާތު ލިބިގެން އެ ސަރަހައްދުގައި މަސައްކަތްކުރާ ފުލުހުން އެމީހުން ހޯދާ ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އެ ދޯނި ފެނުނީ މާވަރު ފަޅު ކައިރިން ކަމަށާއި، ދޯނީގައި ތިބީ ހަތަރު މީހުން ކަމަށް ބުންޏެވެ.
ފުލުހުން ބުނީ ދޯނި ފުލުހުންގެ ބެލުމުގެ ދަށަށް ގެނައިއިރުވެސް ތިބީ މިޔަރު މަސްވެރިކަން ކުރަން ކަމަށާއި، ދޯނި ބަލާ ފާސްކުރިއިރު ދޯނި ތެރެއިން މިޔަރާއި މިޔަރު އުރަހަ އަދި މިޔަރު މަަސް ފެނިފައިވާ ކަމަށެވެ.
ފުލުހުން ބުނީ މި މައްސަލަ މިހާރު ބަލަމުން އަންނަ ކަމަށެވެ.
މިޔަރު މަސްވެރިކަން ކުރަނިކޮށް ބަޔަކު ހައްޔަރުކުރިއިރު ދާދި ފަހުން ރާއްޖެއިން މިޔަރު އުރަހަ ބޭރުކުރަން އުޅެނިކޮށްވެސް ހިފަހައްޓާފައިވެއެވެ. މީގެ އިތުރަށް މިޔަރަށް ކާންދިނުން އިތުރުވެ އެއީ ވެސް ގާނޫނީ ކުށެއްކަން ޓޫރިޒަމް މިނިސްޓްރީންވެސް ހަނދާންކޮށްދީފައިވެއެވެ.
