އާދިއްތަ ދުވަހު ވެކްސިން ޖެހީ 267 މީހުން
21 މާރިޗު 2021 | އާދީއްތަ 18:10ރާއްޖެއިން ވެކްސިން ޖެހި މީހުންގެ ޖުމުލަ އަދަދުވަނީ 218،912ށް އަރާފައި
ވެކްސިން ދިނުމުގެ ޕްރޮގްރާމްގެ ތެރެއިން- ރާއްޖޭގެ އާބާދީގެ 46 އިންސައްތައަށްވުރެ ގިނަ މީހުންނަށް ވެކްސިން ދީފައިވޭ
އާދިއްތަ ދުވަހު އިތުރު 267 މީހަކު ކޮވިޑް-19 ވެކްސިން ޖަހައިފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، ވެކްސިން ޖަހާފައިވާ 267 މީހުންނަކީވެސް އަތޮޅުތެރޭގައި ޤާއިމުކޮށްފައިވާ ވެކްސިން ސެންޓަރުތަކުން ވެކްސިން ޖަހާފައިވާ މީހުން ކަމަށެވެ. އެއާއެކު މިހާތަނަށް އަތޮޅު ތެރެއިން ކޮވިޑް ވެކްސިން ޖެހި މީހުންގެ ޖުމުލަ އަދަދު މިވަނީ 97،282ށް އަރާފައެވެ.
އޭގެ އިތުރުން، މާލެ ސަރަޙައްދުން 121،630 މީހަކު ކޮވިޑް ވެކްސިން ޖަހާފައިވާއިރު، މިހާތަނަށް ރާއްޖެއިން ވެކްސިން ޖެހި މީހުންގެ ޖުމުލަ އަދަދުވަނީ 218،912ށް އަރާފައެވެ.
މާލެ ސަރަޙައްދުގައި ވެކްސިންގެ ފުރަތަމަ ޑޯޒް ޖެހުން މިހިނގާ މާރޗް މަހުގެ 15 ވަނަ ދުވަހު ހުއްޓާލާފައި އޮތުމަށްފަހު އަނެއްކާވެސް ހޯމަ ދުވަހުން ފެށިގެން އަލުން ވެކްސިނޭޝަން ފެށުމަށްވެސް އެޗްޕީއޭއިން ވަނީ ނިންމާފައެވެ. އެގޮތުން ވެކްސިންގެ ފުރަތަމަ ޑޯޒް ނުޖަހާ ފަރާތްތަކަށް ހޯމަ ދުވަހުން ފެށިގެން ސިނޮފަރމް ވެކްސިން ޖަހަން ފަށާނެކަމަށް އެޗްޕީއޭއިން މައުލޫމާތު ދެއެވެ. ބެއިޖިންގ ބައޯ އިންސްޓިޓިއުޓް އޮފް ބައޮލޮޖިކަލް ޕްރޮޑަކްސްޓްސް ކޮމްޕެނީ ލިމިޑެޓުން އުފައްދާފައި މިވާ ވެކްސިނަކީވެސް 2 ޑޯޒް ފުރިހަމަ ކުރަންޖެހޭ ވެކްސިނެކެވެ. އެގޮތުން މި ވެކްސިންގެ ދެ ޑޯޒް ދެމެދުގައި 3-4 ހަފްތާ ހޭދަވާނެކަން އެޗްޕީއޭއިން ފާހަގަ ކޮށްފައިވެއެވެ.
ރާއްޖެއިން މީގެ ކުރިން ބޭނުން ކުރަމުންދިޔައީ އެސްޓްރަޒެނެކާ އަދި އޮކްސްފޯރޑް ޔުނިވަރސިޓީގެ ފޯމިއުލާއަކަށް އިންޑިއާގެ ސިރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިނެވެ.
