މިއަހަރު މާލޭގެ މިސްކިތްތަކުގައި ތަރާވީސް ނަމާދު ޖަމާއަތުގައި ކުރާނެ: އިސްލާމިކް މިނިސްޓަރ

މިއަހަރު ރަމަޟާން މަހު މާލޭގެ މިސްކިތްތަކުގައި ޖަމާއަތުގައި ތަރާވީހް ނަމާދުކުރުމަށް ނިންމަވާފައިވާކަމަށް، އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވެއްޖެއެވެ.

ކޮވިޑް19 ގެ ބަލިމަޑުކަން ފެތުރުން ކޮންޓްރޯލް ކުރުމަށް އެޅި ފިޔަވަޅެއްގެ ގޮތުން މިދިޔަ އަހަރުގެ ރޯދަމަހު އިސްލާމިކް މިނިސްޓްރީން ނިންމީ، މާލޭގެ އެއްވެސް މިސްކިތެއްގައި ޖަމާއަތުގައި ނަމާދު ނުކުރުމަށެވެ.

ނަމަވެސް މިއަހަރުގެ ރޯދަމަހު މާލޭގެ މިސްކިތްތަކުގައި ޖަމާއަތުގައި ތާރާވީހް ނަމާދު ކުރެވޭނެ ކަމަށާއި، ޖަމާއަތުގައި ނަމާދު ކުރެވޭނީ، ކޮވިޑް19 ފެތުރިފައިވާ މިންވަރަށް ބަލައި، ގައިދުރުކޮށް ސަފުހަދައިގެން ކަމަށް މިނިސްޓަރ ހޮނިހިރު ދުވަހު ވިދާޅުވިއެވެ. މިނިސްޓަރ "ރާއްޖެ އެމްވީ" އަށް ވިދާޅުވީ، މިވަގުތު މާލޭގައި ކޮވިޑް ބަލިމަޑުކަމުގެ ޙާލަތު އޮތްގޮތުން، ތަރާވީޙް ނަމާދު ކުރެވެން އޮތީ ގައިދުރު ކަމާއެކީގައި ކަމަށެވެ. އެއީ ބަލިމަޑުކަމުގެ މި ހާލަތަކީ ޚާއްސަ ހާލަތެއްކަމަށް ބަލައި، ގައިދުރުކަމާއެކި ނަމާދުކުރެވޭނެކަމަށް، ޢިލްމުވެރިން ވިދާޅުވެފައިވާތީ ކަމަށްވެސް މިނިސްޓަރ ވިދާޅުވިއެވެ.

މިފަހަރުގެ ރޯދަމަހު ރާއްޖެއިން ބޭރުން ހާފިޒުން ގެނައުމާއި ގުޅޭގޮތުން މިނިސްޓަރ ވިދާޅުވީ، ރާއްޖެއިން ބޭރުން ހާފިޒުން ގެނައުމުގެ އިންތިޒާމުތައް ހަމަޖެއްސުމުގެ މަސައްކަތް އިސްލާމިކް މިނިސްޓްރީން ކުރަމުން ނުދާނެ ކަމަށެވެ. އެހެންނަމަވެސް ރަށްރަށުގެ ކައުންސިލުން ހާފިޒުން ގެންނަށް ބޭނުންވާކަމަށްވާނަމަ، އެކަމަށްޓަކައި މިނިސްޓްރީގައި އެދެވިދާނެ ކަމަށެވެ. އަދި މިހާތަނަށް ބައެއް ރަށްރަށުން މިނިސްޓްރީގައި އެކަމަށް އެދި ހުށަހަޅާފައި ވާކަމަށާއި، ރަށްރަށުގެ ކޮވިޑްގެ ހާލަތަށް ރިއާޔަތްކޮށް، ހުއްދަ ދެމުން ގެންދާކަމަށް މިނިސްޓަރ ވިދާޅުވިއެވެ.

 މީގެ އިތުރުން، ހާފިޒުން ގެންނަ ކަމުގައި ވާނަމަ، އެކަމުގެ އިންތިޒާމުތަށް ހަމަޖެއްސުމުގައި އެޗްޕީއޭގެ ގަވާއިދު ތަކަށާއި މިންގަނޑުތަކަށް، ރަށްރަށުގެ ކައުންސިލުން ބަލަންޖެހޭނެ ކަމަށް މިނިސްޓަރ ވިދާޅުވިއެވެ. އެގޮތުން ކަރަންޓީނު ވުމުގެ ވަގުތު އޮއްވައި ހާފިޒުން ގެނައުން މުހިންމުކަން މިނިސްޓަރ ފާހަގަ ކުރެއްވިއެވެ.

މާލޭގައި ކޮވިޑް 19ގެ ހާލަތު ގޯސްވުމުގެ، ބަންގިއަށްފަހު 5 މިނިޓުތެރޭގައި ގަމަތްދީ ނަމާދު ފެށުމަށާއި އެއްވެސް ނަމާދެއް 7 މިނިޓަށްވުރެ ދިގުނުކުރުމަށާއި، ހުރިހާ ނަމާދެއްގައި ވެސް ސޫރަތުލް ފާތިޙާއަށްފަހު ޟުޙާ ސޫރަތުން ފެށިގެން ތިރީގެ ކުރު ސޫރަތްތައް ކިޔެވުމަށް، އިސްލާމިކް މިނިސްޓްރީން މީގެކުރިން އިލްތިމާސްކޮށްފައިވެއެވެ. އަދި މިސްކިތްތަކުން ކާޕެޓް ނެގުމާއި، ކޮންމެ ނަމާދެއްގެ ކުރިން މިސްކިތުގައި މޮޕްލައި ސާފުކުރުމާއި، ސައބޯނި ލައިގެން އަތްދޮވެވޭނެ އިންތިޒާމު ގާއިމުކުރުމަށް ސިޓީ ކައުންސިލުން ސަމާލުކަން ދިނުމަށްވެސް އަންގާފައިވެއެވެ.