އިންޑިއާގެ ސެރަމް އިންސްޓިޓިއުޓުން އުފައްދަމުން ގެންދާ ކޮވެޝީލްޑް ވެކްސިންގެ ޑިމާންޑް ބޮޑުވެ، ބޭނުންވާ ވަރަށް ވެކްސިން ނުއުފެއްދިދާނެ ކަމަށް އެގައުމުން ބުނެފިއެވެ.

ދުނިޔޭގެ ނިސްބަތުން އެންމެ ގިނައިން ވެކްސިން އުފައްދަމުންދާ ކާރުހާނާ ކަމަށްވާ އިންޑިއާގެ ސެރަމް އިންސްޓިޓިއުޓްއިން އުފައްދަމުން ގެންދާ ކޮވިޝީލްޑް ވެކްސިނަކީ މިހާރު ދުނިޔޭގެ ގިނަ ގައުމުތަކެއްގައި ޖަހަމުން އަންނަ އިނގިރޭސިވިލާތުގެ އޮކްސްފޯރޑް ޔުނިވަރސިޓީއާއި އެސްޓްރާޒެނެކާ ގުޅިގެން ތައްޔާރު ކޮށްފައިވާ ވެކްސިންގެ ފޯމިއުލާ ބޭނުން ކޮށްގެން ތައްޔާރު ކޮށްފައިވާ ވެކްސިނެކެވެ.

ސެރަމް އިންސްޓިޓިއުޓްއިން ބުނީ އެ ކުންފުނިން އަންދާޒާކުރި ވަރަށްވުރެ ވެކްސިންގެ ޑިމާންޑް ބޮޑު ކަމަށާއި، އެއާއެކު ބޮޑެތި ގައުމުތަކުން އޯޑަރު ކޮށްފައިވާ މިންވަރަށް ވެކްސިން ފޯރު ކޮށްދިނުމުގައި ދަތިތަކެއް ދިމާވެފައިވާ ކަމަށެވެ. އެހެންކަމުން ވެކްސިން އުފެއްދުމުގައި ލިމިޓްކުރަން ޖެހިދާނެ ކަމުގެ ބިރު އެބައޮތް ކަމަށް އެކުންފުނިން ބުނެއެވެ.

ސެރަމް އިންސްޓިޓިއުޓްއިން ކުރިން ލަފާކުރި ގޮތުގައި މިއަހަރުގެ ފުރަތަމަ ކުއާޓާގައި އެ ކުންފުންޏަށް މަހެއްގެ މައްޗަށް 70-60 މިލިއަން ޑޯޒުގެ ވެކްސިން އުފެއްދިދާނެ ކަމަށެވެ. އަދި ދެވަނަ ކުއާޓާއިން ފެށިގެން މަހެއްގެ މައްޗަށް 100 މިލިއަން ޑޯޒު އުފެއްދިދާނެ ކަމަށް އެކުންފުނިން ވަނީ ލަފާ ކޮށްފައެވެ. އެކަމަކު މާރިޗު މަހާ ހަމައަށް އައިއިރު އެކުންފުންޏަށް މަހެއްގެ މައްޗަށް އުފެއްދިފައިވަނީ 50 މިލިއަން ޑޯޒު ވެކްސިނެވެ. އެ ކުންފުނިން ބުނީ ވެކްސިންގެ ޕްރޮޑަކްޝަން ދަށްވީ ވެކްސިން އުފެއްދުމަށް ބޭނުންވާ ބައެއް އާލާތްތައް ލިބުމުގައި ދަތިތަކެއް ހުރުމުން ކަމަށެވެ.

އިންޑިއާގައި މިހާރު ދެ ވެކްސިނެއް އުފައްދާފައިވާއިރު އެއީ ސެރެމް އިންސްޓިޓިއުޓްގެ ކޮވިޝީލްޑް ވެކްސިނާއި، އިންޑިއާގެ ލެބޯޓަރީތަކުގައި އުފެއްދި ކޮވެކްސް ވެކްސިނެވެ. އޭގެ ތެރެއިން ކޮވިޝީލްޑް ވެކްސިނަށް ގައުމުތަކުގެ ޑިމާންޑް ވަނީ ބޮޑުވެފައެވެ.