ނެޝަނަލް ޓެންޑަރ މެދުވެރިކޮށް މި ސަރުކާރުން މިހާތަނަށް 12 ބިލިއަން ރުފިޔާގެ މަޝްރޫޢު ހަވާލުކޮށްފައިވޭ: ފިނޭންސް މިނިސްޓަރ
މިއީ ކުރީ ސަރުކާރުން ހިންގާފައިވާ ތަރައްޤީގެ މަޝްރޫޢުތަކަށްވުރެ އެތައް ގުނައެއް އިތުރު އަދަދެއް
34 ރަށެއްގައި ފެނާއި ނަރުދަމާ ގާއިމުކުރުމުގެ މަޝްރޫއުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ފިނޭންސް މިނިސްޓަރ އިބްރާހިމް އަމީރު ވާހަކަ ދައްކަވަނީ
ނެޝަނަލް ޓެންޑަރ މެދުވެރިކޮށް މި ސަރުކާރުން މިހާތަނަށް 12 ބިލިއަން ރުފިޔާގެ މަޝްރޫޢު ހަވާލުކޮށްފައިވާކަމަށް މިނިސްޓަރ އޮފް ފިނޭންސް އިބްރާހީމް އަމީރު ވިދާޅުވެއްޖެއެވެ.
34 ރަށެއްގައި ފެނާއި ނަރުދަމާގެ ގާއިމުކުރުމުގެ މަޝްރޫއުގެ އެއްބަސްވުމުގައި ސޮއިކުރުމަށް ބުދަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުން އަމީރު ވިދާޅުވީ ސަރުކާރުން މިހާތަނަށް 12 ބިލިއަން ރުފިޔާގެ މަޝްރޫޢު ހަވާލުކޮށްފައިވާއިރު މިއީ ކުރީ ސަރުކާރުން ހިންގާފައިވާ ތަރައްޤީގެ މަޝްރޫޢުތަކަށްވުރެ އެތައް ގުނައެއް އިތުރު އަދަދެއް ކަމަށެވެ. ސަރުކާރުން އަންނަނީ އެކި ރަށްތަކުގައި ތަރައްޤީގެ މަޝްރޫއުތައް ކުރިއަށް ގެންދަމުންނެވެ.
އެގޮތުން 34 ރަށެއްގައި ފެނާއި ނަރުދަމާގެ ގާއިމުކުރުމުގެ މަޝްރޫއުގެ މި އެއްބަސްވުމަކީ 16 އަތޮޅަކަށް ނިސްބަތްވާހެން، 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން، ޑިޒައިން އެންޑް ބިލްޑް އުސޫލުން ސޮއިކުރެވުނު އެއްބަސްވުމެކެވެ. މިއީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓް ފެސިލިޓީތަކުގެ ދަށުން ރާއްޖޭގައި ހިންގޭ އުމްރާނީ ތަރައްގީގެ މަޝްރޫއުތަކުގެ ތެރެއިން މަޝްރޫއެކެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވީ ބުދަ ދުވަހު ސޮއިކުރެވުނު 34 މަޝްރޫޢުއާއެކީގައި، ސަރުކާރުން، މިހާރު ފެނާއި ނަރުދަމާގެ ޖުމްލަ 110 މަޝްރޫއެއް ހިންގަމުންގެންދާ ކަމަށެވެ. އަދި ރާއްޖޭގައި މީހުން އާބާދުވެފައިވާ ރަށްތަކުގެ ނިސްބަތަށް ބަލައިލުމުން، ވޭތުވެދިޔަ ދެ އަހަރު މި ސަރުކާރަށް މި މަސައްކަތުގައި ބައިވެރިވެފައިވާ މިންވަރު ހާމަވެގެންދާ ކަމަށްވެސް އަސްލަމް ވިދާޅުވިއެވެ. މީގެ އިތުރުން މިނިސްޓަރު ވިދާޅުވީ، ފެނާއި ނަރުދަމާގެ މަސައްކަތް ހަވާލު ނުކުރެވި ބާކީ އޮތީ 30 ރަށެއްގައި ކަމަށާއި، އޭގެތެރެއިން 14 ރަށެއްގެ ބިޑް، އަންނަ ބުދަ ދުވަހު ހުށަހަޅާނެ ކަމަށެވެ. އަދި 11 ރަށެއްގެ ބިޑް ހުށަހެޅުން މި މަހުގެ 23 ވަނަ ދުވަހު އޮންނާނެ ކަމަށާއި، އަދި ފަސް ރަށެއްގެ އެއްބަސްވުމުގައި ވަރަށް އަވަހަށް ސޮއިކުރާނެ ކަމަށްވެސް ވިދާޅުވިއެވެ.
34 ރަށެއްގެ ފެނާއި ނަރުދަމާގެ ނިޒާމު ގާއިމުކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި މިނިސްޓަރ އަސްލަމާއި، ފިނޭންސް މިނިސްޓަރ އިބްރާހީމް އަމީރާއި، އިންޑިއާގެ ފަރާތުން ދިވެހިރާއްޖެއަށް ކަނޑައަޅުއްވާފައިވާ ސަފީރުގެ ނައިބުގެ އިތުރުން ފޮރިން މިނިސްޓްރީގެ މަލްޓިލެޓަރަލް ސެކްރެޓަރީ ޑރ. ހާލާ ހަމީދު ބައިވެރިވެވަޑައިގެންނެވިއެވެ. އަދި ސްޓޭޓް މިނިސްޓަރުންނާއި ރައްޔިތުންގެ މަޖިލީހުގެ ބައެއް މެންބަރުނާއި، އެއްބަސްވުމުގައި ސޮއިކުރި ކުންފުނިތަކުގެ އިސްވެރިން ވެސް ބައިވެރިވެވަޑައިގެންނެވިއެވެ.
