ޓެންޒޭނިއާގެ ރައީސް ޖޯން މަގުފުލީ އަވަހާރަވެއްޖެއެވެ.

މަގުފުލީ އަވަހާރަވެއްޖެކަން ބުދަދުވަހު އިއުލާނު ކުރައްވާފައިވަނީ، އެ ގައުމުގެ ނާއިބުރައީސާ ސާމިއާ ސުލުހޫ ހަސަންއެވެ. އެގައުމުގެ ރަސްމީ ޓީވީ މެދުވެރިކޮށް މިކަން އިއުލާން ކުރައްވަމުން، އޭނާ ވިދާޅުވީ، އުމުރުފުޅުން 61 އަހަރުގައި މަގުފުލީ އަވަހާރަވެފައިވަނީ ހިތްޕުޅުގެ އާލާސްކަންފުޅެއްގައި ކަމަށެވެ. މިކަމަށް މަގުފުލީ ފަރުވާ ހޯއްދަވަމުން ގެންދަވާތާ ދިހަ އަހަރު ވެއްޖެއެވެ. މިހަފުތާގެ އާދީއްތަދުވަހުން ފެށިގެން ދާރުއްސަލާމް ގައި ހުންނަ ހޮސްޕިޓަލެއްގައި އޭނާ ވަނީ އެޑްމިޓްވެސް ކުރެވިފައެވެ.

ރައީސް އަވަހާރަވުމާއި ގުޅިގެން ވަގުތީގޮތުން ގައުމު ހިންގެވުމާއި މިހާރު ހަވާލުވެހުންނެވި ނާއިބުރައީސާ ވަނީ، ގައުމީ ހިތާމައިގެ 14 ދުވަސް އިއުލާނު ކުރައްވާފައެވެ. އޭނާ ވެރިކަމުގެ ހުވާ ކުރައްވާނެ ދުވަހެއް އަދި އިޢުލާނު ކުރައްވާފައި ނުވާއިރު، ސާމިއާ ސުލުހޫ ވެގެންދާނީ ޓެންޒޭނިއާގެ ފުރަތަމަ އަންހެން ރައީސާ އަށެވެ. އަދި އެފްރިކާގެ އިރުމަތީ ބިތުގެ ގައުމެއްގައި ރައީސްކަން ކުރައްވާ ފުރަތަމަ އަންހެން ލީޑަރުކަމުގައެވެ.

މަގުފުލީ އަވަހާރަވެފައި މިވަނީ، ފެބްރުއަރީ މަހުގެ 27 ވަނަ ދުވަހުން ފެށިގެން މަގުފުލީ ފެނިފައި ނުވާތީ، އޭނާ އާލާސްކަންފުޅާއި އުޅުއްވާކަމަށާއި، ގައުމުން ބޭރުގައި ފަރުވާ ހޯއްދަވަމުން ގެންދަވާކަމުގެ ޚަބަރުތަކުގެ އަޑުގަދަވެފައި ވަނިކޮށެވެ.

މަގުފުލީ އަވަހާރަވުމާއި ގުޅިގެން އެ ގައުމުގެ އިދިކޮޅު ލީޑަރު ޒިޓޯ ކަބްވޭ ވަނީ، މަގުފުލީގެ އާއިލާއަށް ތައުޒިޔާ ވިދާޅުވެފައެވެ. އޭނާ ވިދާޅުވީ މިއީ މި ގައުމަށް ކުރިމަތިވި ވަރަށް ހީނުކުރާފަދަ ދަނޑިވަޅެއް ކަމަށާއި، މި ހިތާމައިގެ ސަބަބުން އެންމެންނަށް ސިހުން ގެނުވައިފި ކަމަށެވެ. އޭނާގެ ތައުޒީޔާގައި ނާއިބުރައީސާއަށް ވެސް ހެޔޮދުއާ ކުރަްއްވައި، ހިތްވަރާއިއެކު ކެތްތެރިވެވަޑައިގަތުމަށް އެދިވަޑައިގެންފައިވެއެވެ. އަދި މި ވަގުތުގައި ދުއާކޮށް، އެއްބައިވަންތަ ވުމަށް ރައްޔިތުންނަށް އޭނާ އިލްތިމާސް ކުރެއްވިއެވެ.