ޓެންޒޭނިއާގެ ރައީސް، ޓްރަމްޕާއި ބޮލްސޮނާރޯއަށް ދޫކުނުރައްވާ!

ކޮވިޑުގެ އާލަމީ ވަބާ ދުނިޔެއަށް ފެތުރެމުން ދިޔައިރު، ކޮވިޑާ ގުޅިގެން ގެންގުޅުއްވާ ސިޔާސަތުތަކާ ގުޅޭގޮތުން އެންމެ ބޮޑު ފާޑުކިޔުމެއް އަމާޒުވި އެއް ބޭފުޅަކީ އެމެރިކާގެ ކުރީގެ ރައީސް ޑޮނަލްޑްޓް ޓްރަމްޕެވެ. އެގޮތުން މުޅި ދުނިޔެއިން އެންމެ ގިނަ ކޭސް ރިޕޯޓު ކުރެވިފައިވާ ޤައުމަކަށް އެމެރިކާ ވެގެން ދިއުމުގެ ފަހަތުގައި ޓްރަމްޕްގެ ދޯހަޅި ސިޔާސަތުތައް އިސް ރޯލެއް އަދާކުރާކަމަށް ގިނަ ބަޔަކު ބުނެއެވެ. އެގޮތުން މިއީ އާދައިގެ ރޯގާއެއްގެ ގޮތުގައި ތަކުރާރުކޮށް ސިފަ ކުރެއްވުމާއި، ކިތަންމެ ގިނަ ބަޔަކު ޕޮޒިޓިވްވަމުން ދިޔަނަމަވެސް، ޤައުމު ލޮކްޑައުންކޮށް ފިޔަވަޅުތައް ހަރުކަށިކުރުމާ ފާޅުގައި ދެކޮޅު ހެއްދެވި ބޭފުޅެއްގެ ގޮތުގައި ޓްރަމްޕް ފެނިގެން ދިޔައެވެ. ނަމަވެސް އެންމެ ފަހުން އެ ޤައުމުގައި ކޮވިޑުގެ ޙާލަތު އިންތިހާއަށް ގޯސްވެ، ބައެއް ސްޓޭޓުތަކުގެ ހޮސްޕިޓަލުތައްވެސް ފުރި، ސިއްޙީ ނިޒާމަށް ނުކަތާވަރަށް ކޭސްތައް ފެންނަން ފެށިއެވެ. ބައެއް މީހުން ބުނާ ގޮތުގައި ރައީސް ޑޮނަލްޑް ޓްރަމްޕަށް ރިޔާސީ އިންތިޚާބުގައި ލިބިވަޑައިގެންނެވި ނާކާމިޔާބީގެ އެއް ސަބަބަކީވެސް ކޮވިޑާ ގުޅިގެން އެމަނިކުފާނު ދެއްކެވި ދެއުޅި އެއްނުވާ ވާހަކަފުޅުތަކެވެ.

މުޅި ދުނިޔެއަށް ބަލާއިރު، ކޮވިޑުގެ ބަލިމަޑުކަމުގެ ތެރޭގައި ދެން އެންމެ ބޮޑު ފާޑުކިއުމެއް އަމާޒުވި އެއް ރައީސަކީ ބްރެޒިލްގެ ރައީސް ޚައިރް ބޮލްސޮނާރޯއެވެ. ބޮލްސޮނާރޯވެސް ފެނިގެން ދިޔައީ ކޮވިޑުގެ ކޭސްތައް އެ ޤައުމުގައި ފަތުއަޑުކިޔާފައި އިތުރުވެގެން ދިޔައިރުވެސް، މިއީ ސީރިއަސް ކަމެއް ނޫންކަމަށް ދޭހަވާ މޭރުމުން ވާހަކަދެއްކެވި މަންޒަރެވެ. އެ ޤައުމުގައި ދުވާލެއްގެ މައްޗަށް އެތައް ބަޔަކު ކޮވިޑް ޖެހިގެން ނިޔާވަމުން ދިޔައިރުވެސް ބޮލްސޮނާރޯ ގެންދެވީ މާސްކް އެޅުއްވުމެއް، އަދި އިޖުތިމާއީ ގައިދުރުކަމެއް ނެތި އެއްވުންތައް ބާއްވައި، ރެލީތަކުގައި ބައިވެރިވެވަޑައިގަންނަވަމުންނެވެ. ދާދި ފަހުންވެސް އެ ޤައުމުން ރެކޯޑު އަދަދުތަކަށް މީހުން މަރުވަމުން ދިއުމާ ގުޅިގެންވެސް ނޫސްވެރިންނާ ބައްދަލު ކުރައްވައި ވިދާޅުވީ، "މާބޮޑަށް ޝަކުވާ ނުކޮށް ހަމަޖެހިލުމަށެވެ".

މިހާރު މި ލިސްޓަށް އިތުރުވެފައި މިވަނީ ޓެންޒޭނިއާގެ ރައީސް ޖޯން މަގުފުލީއެވެ. އެގޮތުން މަގުފުލީ ފެނިގެން މިދަނީ ކުރިން މި ދެންނެވި ދެ ރައީސުންނަށްވުރެވެސް އަރާ ހުންނެވި ރައީސެއްގެ ގޮތުގައެވެ. އެންމެ ކުޑަމިނުން ކޮވިޑުގެ ކޭސްތައް ރިޕޯޓު ކުރަމުންދާ އަދަދުތައްވެސް އެ ޤައުމުން ހާމަކުރަމުން ނުދާއިރު، ދާދި ފަހުން ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) އިންވެސް ވަނީ ކޮވިޑް ކޭސްތައް ރިޕޯޓު ކުރެވެމުންދާ މިންވަރު ހާމަ ކުރުމަށް އެ ޤައުމުގެ ސަރުކާރަށް ގޮވާލާފައެވެ. ނަމަވެސް ޚުދު މަގުފުލީވެސް ވިދާޅުވަނީ އާވި އެރުވުމާއި، ފަތްޕިލާވެލީގެ ބޭސްވެރިކަމުން އިސާހިތަކު ކޮވިޑުން ސަލާމަތް ވެވިދާނެ ކަމަށެވެ. އަދި ވެކްސިން ޖެހުމަކީވެސް ކޮންމެހެން ބޭނުންތެރިކަމެއް ނޫންކަމަށް ދޭހަވާ މޭރުމުން މަގުފުލީ ވަނީ ވައިރަސްއެއްގެ ސަބަބުން ޤައުމުގެ އިޤްތިސާދު ހީނަރުވާން ކުޑަވެސް ޖާގައެއް ދެވެން ނެތްކަމަށް ވިދާޅުވެފައެވެ.

ޓެންޒޭނިއާއިން ކޮވިޑް ނައްތާލެވިފައިވާކަމަށް އެ ޤައުމުން ބުނެފައިވާއިރު، އެންމެ ފަހުން ކޮވިޑުގެ އަދަދުތައް އެ ޤައުމުން ހާމަކޮށްފައިވަނީ ނިމިދިޔަ އަހަރުގެ މެއި މަހުގެ ތެރޭގައެވެ. އޭރު އެ ޤައުމުން ޕޮޒިޓިވްވެގެން ރިޕޯޓް ކޮށްފައިވަނީ 500 މީހެކެވެ. އަދި 20 މީހަކު ކޮވިޑު ބަލީގައި މަރުވެފައިވާކަމަށް ރިޕޯޓު ކޮށްފައިވާއިރު، އޭގެ ފަހުން މިހާތަނަށް އެ ޤައުމުން ކޮވިޑް ކޭސްތަކުގެ އަދަދު އިއުލާނު ކޮށްފައެއް ނުވެއެވެ. އެ ޤައުމުގެ ހެލްތް މިނިސްޓަރ ގޮޑްވިން މޮލަލްއާ ޙަވާލާދީ ބީބީސީގައި ރިޕޯޓް ކޮށްފައިވާ ގޮތުން ކޮވިޑުގެ ކޭސްތައް ހާމަކުރުމަކީ ރައްޔިތުންގެ މެދުގައި ބޭކާރު ގޮތުގައި ބިރުވެރިކަން އުފެދިގެންދާނެ ކަމެކެވެ. އެގޮތުން ކޭސްއެއް ރިޕޯޓު ކުރެވުނުނަމަވެސް، އެކަމާ ގުޅޭ ތަފްސީލުތައް ބަހައްޓާނީ ސަރުކާރުގެ އަމިއްލަ ބޭނުންތަކަށް ބޭނުންކުރުމަށް ކަމަށް މިނިސްޓަރ ވިދާޅުވެފައިވެއެވެ.

އެހެންނަމަވެސް، ޓެންޒޭނިއާގެ އެންމެ ބޮޑެތި ސިޓީތަކުގެ ބައެއް ޑޮކްޓަރުންނާ ޙަވާލާދީ ބީބީސީގައި ރިޕޯޓް ކޮށްފައިވާ ގޮތުން ފާއިތުވި ދުވަސްތަކުގައި އެ ޤައުމުގައި ކޮވިޑުފަދަ އަލާމަތްތައް ހުރި އެތައް ބަޔަކު އެނދުމަތި ކުރެވެމުންދާއިރު، އެތައް ބަޔަކު ދަނީ މަރުވަމުންނެވެ. ނަމަވެސް މިއީ ކޮވިޑު ޖެހިފައިވާ މީހުން ނޫންކަމަށް އެ ޤައުމުގެ ސަރުކާރުން ދަނީ ބުނަމުންނެވެ. އަދި އެ ޤައުމުން މިއަހަރުވެސް ކޮވިޑުގެ މައްޗަށް ކާމިޔާބީ ހޯދަމުންދާކަމަށް އެ ޤައުމުގެ ސަރުކާރުން ވަނީ ބުނެފައެވެ.

ކޮންމެއަކަސް، ކޮވިޑުގެ މި ބަލިމަޑުކަމަކީ އާދައިގެ ކަމެއްގެ ގޮތުގައި ވާހަކަ ދެއްކެވި ރައީސުންވެސް އެންމެ ފަހުން ޤައުމުގެ ފިޔަވަޅުތައް ވަރުގަދަކޮށް، ރައްޔިތުންގެ ޝަކުވާތައް އަހަން މަޖުބޫރުވި ބީދައިން، ޓެންޒޭނިއާގެ ރައީސްވެސް ދާދި އަވަހަށް އާވި އެރުވުމާއި، ފަތްޕިލާވެލީގެ ބޭސްފަރުވާ ދޫކޮށް، ހަރުދަނާ ފިޔަވަޅުތަކެއް އަޅަން މިހާރުވެސް ޖެހިފައިވާކަމަށް ގިނަ ބަޔަކު ދަނީ ބުނަމުންނެވެ.