ވިސާ އޯވަސްޓޭ ވެގެން ހައްޔަރުކުރި މީހުންގެ ތެރޭގައި އަހަރު ނުވާ ކުޑަ ކުއްޖެއް – ވިސާއަށް ސަމާލުވޭ!

ނިމިގެން ދިޔަ ހަފްތާގައި އިވިގެން ދިޔަ އެއް ހަބަރަކީ އަވަށްޓެރި ސްރީލަންކާގައި ވިސާ ނެތި އުޅެމުން ދިޔަ ހަތަރު ޒުވާނަކު ހައްޔަރު ކުރި ވާހަކައެވެ. މިއީ ފަހަކަށް އައިސް ވަރަށް އާއްމުކޮށް ހިނގާ ކަމެކެވެ. އެތަކެއް ހާސް ދިވެހިން ދިރިއުޅެމުންދާ ލަންކާގައި ވިސާ ނެތި ނުވަތަ ވިސާގެ މުއްދަތު ހަމަވުމުން ވިސާ އާ ނުކޮށް ދިވެހިން އުޅޭ މައްސަލައަކީ ކުޑަ މައްސަލައެއް ނޫނެވެ. އެކަމުގެ ސަބަބުން އުނދަގޫވަނީ ގަވާއިދާ އެއްގޮތަށް އުޅެމުންދާ ދިވެހިންނަށެވެ. ސަރުކާރަށެވެ.

މިހާރު އިވިގެން އުޅޭ ވާހަކައަކީ ދާދިފަހުން، ވިސާގެ މުއްދަތު ހަމަވުމުން ވެސް ލަންކާގައި ގަވާއިދާ ޚިލާފަށް ދިރިއުޅެމުން ދިޔަ 4 ދިވެއްސަކު ހައްޔަރުކުރި ވާހަކައެވެ. ރާއްޖެ.އެމްވީ އަށް އިތުބާރު ހުރި ގޮތެއްގައި އެނގިފައިވާ ގޮތުގައި މި 4 މީހުންގެ ތެރޭގައި ޏ. ފުވައްމުލަކަށް ނިސްބަތްވާ އުމުރުން 30 އަހަރުން ދަށުގެ ދެމަފިރިއަކު ވެއެވެ. އަދި އެ ދެ މީހުންގެ އަހަރު ނުވާ ކުޑަ ދަރިފުޅު ވެސް ހުރީ އެމީހުންނާއެކު ބަންދުގައެވެ. ކުޑަ ކުއްޖާ ރަސްމީކޮށް ބަންދު ނުކުރިނަމަވެސް، އެކުއްޖާ އަކީ ބަލި ކުއްޖަކަށްވުމުން ރައްޓެހި ބައެއްގެ އަތަށް އެކުއްޖާ ދޫކޮށްލަން މައިންބަފައިން ބޭނުން ނުވީކަމަށް މައުލޫމާތު ލިބެއެވެ. އެހެންކަމުން އެކުއްޖާ ވެސް ހުރީ މަންމައާއި ބައްޕައާއެކު ބަންދުގައެވެ. ކުޑަކުއްޖާގެ ބަލިހާލަތަށް ބެލުމަށްފަހު އެކުއްޖާގެ މަންމަ ދޫކޮށްލާތޯ ލަންކާގައި ހުންނަ ދިވެހި އެމްބަސީއިން މަސައްކަތްކުރިނަމަވެސް އަދި އެމީހުން ދޫކޮށްލާފައެއް ނުވެއެވެ. 

މިކަމުގެ މައުލޫމާތު އެނގޭ ފަރާތަކުން ރާއްޖެ.އެމްވީ އަށް މައުލޫމާތު ދިން ގޮތުގައި އާއްމުކޮށް ވިސާގެ މައްސަލަތަކުގައި ހައްޔަރުކުރާ މީހުންނަށްވުރެ ހަރުކަށިކޮށް އެމީހުންނާމެދު އަމަލުކުރީ ފުލުހުން އެމީހުން ތިބި ގެއަށް ދިޔުމުން ފުލުހުންނަށް އެންމެ ފުރަތަމަވެސް ވިސާގެ ކަންކަމާ ބެހޭ ގޮތުން ދޮގު މައުލޫމާތު ދިނުމުންނެވެ. 

މިކަމާ ބެހޭ ގޮތުން ފޮރިން މިނިސްޓްރީއާ ސުވާލުކުރުމުން އެ މިނިސްޓްރީއިން ބުނީ ބޭރު ޤައުމުތަކުގައި ހައްޔަރުކުރާ ދިވެހިންނަށް ހަމަޖެހިފައިވާ އުސޫލުގެ ތެރެއިން ކޮންސިއުލަރގެ އެހީތެރިކަން ފޯރުކޮށްދެމުންދާނެކަމަށާއި، އާއިލާތަކާ ގުޅިގެން އެމީހުންނަށް ފޯރުކޮށްދޭން ޖެހޭ އެހީތެރިކަން ފޯރުކޮށްދޭނެކަމަށެވެ. އެހެންނަމަވެސް އިތުރު ތަފްސީލެއް އެމިނިސްޓްރީއަކުން ނުދެއެވެ.

މިފަދަ އެހެން ހާދިސާއެއް ވެސް ދާދިފަހުން ހިނގާފައިވެއެވެ. އެގޮތުން ވިސާ ނެތި ލަންކާގައި ގިނަ ދުވަސްތަކެއް ވަންދެން އުޅެނިކޮށް ލަންކާގައި ހުއްޓާ ޕާސްޕޯޓްގެ މުއްދަތު ހަމަވި މީހަކު ވެސް ދާދިފަހުން ލަންކާގައި ޖަލަށް ލާފައިވެއެވެ. 

އަވަށްޓެރި ސްރީލަންކާގައި 2019 ވަނަ އަހަރު ދިން ޓެރަރިސްޓް ހަމަލާތަކަށްފަހު އެގައުމުގައި ވިސާ ނެތި ދިރިއުޅޭ މީހުންނާމެދު ލަންކާ ސަރުކާރުން ގެންގުޅޭ ސިޔާސަތު ވަނީ ވަރަށް ބޮޑަށް ހަރުކަށިކޮށްފައެވެ. ވިސާ ނެތި ގަވާއިދާ ޚިލާފަށް އުޅޭ މީހުންނާ ދެކޮޅަށް ހިންގި އޮޕަރޭޝަންތަކުގައި ގިނަ އަދަދެއްގެ ދިވެހިން ހައްޔަރުވެސްކޮށްފައިވެއެވެ. 

ދިވެހިން އާއްމުކޮށް ދިރިއުޅޭ އެހެން ގައުމުތަކާ އަޅާބަލާއިރު ލަންކާއަކީ ވިސާ ހޯދުމަށް ފަސޭހަ ގައުމެކެވެ. އެހެންނަމަވެސް ފަރުވާކުޑަކޮށް، ނުވަތަ ގަސްތުގައި ނަމަވެސް މިގޮތަށް ވިސާ ނެތި އުޅޭ ފަރާތްތަކުގެ ސަބަބުން ލަންކާގައި ގަވާއިދާ އެއްގޮތަށް ދިރިއުޅޭ ދިވެހިންނަށް ވެސް ކުރިމަތިލާން ޖެހޭ ދަތިތައް ކުޑައެއް ނޫނެވެ. އެގޮތުން މަގުމަތީގައި ހުންނަ ފުލުހުންގެ ޗެކްޕޮއިންޓްތަކާއި އެއަރޕޯޓް އިމިގްރޭޝަނުން ވެސް ދިވެހިންނަށް މިހާރު ކުރިއަށްވުރެ ބޮޑަށް ސަމާލުވެ ބަލާކަމަށާއި، ގޭގެއަށް ފުލުހުން ގޮސް ވިސާ އޮތްތޯ ޗެކްކުރުން އިތުރުވެފައިވާކަމަށް ލަންކާގައި އުޅޭ ބައެއް ދިވެހިން ބުނެއެވެ.