މޮޑާނާއިން 6 މަހާއި 12 އަހަރާ ދެމެދުގެ ކުދިންގެ ވެކްސިން ޓްރަޔަލްތައް ފަށައިފި

އެމެރިކާގެ މޮޑާނާ ކުންފުނިން ކޮވިޑް-19ށް އުފެއްދި ވެކްސިންގެ ކުޑަކުދިންގެ ޓްރަޔަލްތައް އެކުންފުނިން ފަށައިފިއެވެ.

މޮޑާނާއިން ކުޑަކުދިންނަށް ހާއްސަ ޓްރަޔަލްތައް ފަށާފައި ވަނީ މަރޗް 16 ވަނަ ދުވަހުއެވެ. އެގޮތުން އެކުންފުނިން ޓްރަޔަލަތައް ކުރިއަށް ގެންދާނީ އުމުރުން 6 މަހާއި 12 އަހަރާ ދެމެދުގެ ކުދިންނަށެވެ. މޮޑާނާއިން ވަނީ އެކުންފުނީގެ އަމާޒަކީ މިޓްރަޔަލްގައި 6,750 ކުދިން ބައިވެރިކުރުމެވެ.

މޮޑާނާގެ ސީއީއޯ ސްޓެފާން ބަންސެލް ވަނީ އެމެރިކާ އަދި ކެނެޑާގައި މޮޑާނާ ވެކްސިންގެ ކުޑަކުދިންގެ ޓްރަޔަލްތަކުގެ ފޭސް ދޭއް އަދި ތިނެއް ފެށުމުން ހިތްހަމަޖެހޭކަން ފާހަގަކޮށް މި ޓްރަޔަލްތަކުގެ ސަބަބުން ކުޑަކުދިންނަށާއި ޒުވާނުންނަށް ވެކްސިން އިތުރަަށް ރައްކާތެރިކޮށް ރަނގަޅުކުރަން އެނގޭނެ ކަމަށް ވިދާޅުވެފައެވެ.

މީގެ ކުރިން މޮޑާނާއިން ވަނީ އުމުރުން 12 އަހަރާއި 17 އަހަރާ ދެމެދުގެ ކުދިންނަށް ވެކްސިނުން ކުރާ އަސަރު ދެނެގަތުމަށް ޓްރަޔަލްތައް ކުރިއަށް ގެންދަން ފަށާފައެވެ.

މޮޑާނާއިން ކޮވިޑް-19ށް އުފައްދާފައިވާ ވެކްސިނަކީ މެސެންޖަރ އާރްއެންއޭ ވެކްސިނެކެވެ. މިވެކްސިންގެ އެންމެފަހުގެ ނަތީޖާތައް ދައްކާގޮތުން ވެކްސިނަކީ 94 އިންސައްތް ކާމިޔާބު ވެކްސިނަކަށް ވާއިރު، މިހާތަނަށް ޔޫރަޕިއަން ޔޫނިއަންގެ އިތުރުން އިތުރު 10 ގައުމަކުން ވަނީ މިވެކްސިން އެމަޖެންސީކޮށް ބޭނުން ކުރުމުގެ ހުއްދަދީފައެވެ. އެއީ އެމެރިކާ، ކެނެޑާ، އައިސްލޭންޑް، އިނގިރޭސިވިލާތުގެ އިތުރުން އިސްރާއިލް، މޮންގޯލިއާ، ނޯވޭ، ގަތަރު އަދި ސިންގަޕޫރާއި ވިއެޓްނާމެވެ. މޮޑާނާ ވެކްސިން ބޭނުންކުރުމުގެ ފުރިހަމަ ހުއްދަ ދީފައި ވަނީ ސްވިޒަލޭންޑުން އެކަނިއެވެ.