ޑިބާލާ ހޯދަން ޓޮޓެންހަމާއި ޗެލްސީން މަސައްކަތްކުރަނީ

ޔުވެންޓަސްއަށް ކުޅެމުން އަންނަ އާޖެންޓީނާގެ ފޯވާޑް ޕައުލޯ ޑިބާލާ ހޯދަން ޓޮޓެންހަމް ހޮޓްސްޕާ އާއި ޗެލްސީން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.

އުމުރުން 27 އަހަރުގެ ޑިބާލާ ޔުވެންޓަސްއާއެކު މިހާރު ހަދާފައިވާ އެއްބަސްވުން އަންނަ އަހަރުގެ ޖޫން މަހު ހަމަވާނެއެވެ. އެއާއެކު ޑިބާލާގެ އެއްބަސްވުން އާކުރަން ޔުވެންޓަސްއިން މަސައްކަތްކުރަމުން އައި ނަމަވެސް، މިހާތަނަށްވެސް އެއްބަސްވުން އާކުރެވިފައެއް ނުވެއެވެ. އެހެންކަމުން އެއްބަސްވުން ޑިބާލާ އާނުކުރާނަމަ، މި އަހަރުގެ ހޫނު މޫސުމުގައި އޭނާ ވިއްކާލަން ޔުވެންޓަސް މަޖުބޫރުވާނެއެވެ. އެއީ އަންނަ އަހަރު ހިލޭ ޓްރާންސްފާއެއްގެ ދަށުން ޑިބާލާއަށް ކުލަބު ބަދަލުކުރެވޭނެތީއެވެ.

ރިޕޯޓުތައް ބުނާ ގޮތުން ކުރިއަށް އޮތް ޓްރާންސްފާ ބާޒާރުގައި ޑިބާލާ ގަތުމަށް ޓޮޓެންހަމް ހޮޓްސްޕާ އާއި ޗެލްސީން އަންނަނީ ތައްޔާރުވަމުންނެވެ. އެގޮތުން ޑިބާލާ ހޯދުމަށް އެ ދެ ކުލަބުން 55 މިލިޔަން ޔޫރޯ ޚަރަދުކުރަން ތައްޔާރަށް އޮތް ކަމަށްވެސް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

ޑިބާލާ ހޯދުމަށް އިނގިރޭސި ޕްރިމިއާ ލީގުގެ ކުލަބުތަކުން މަސައްކަތްކުރަމުން އަންނައިރު، މީގެ ކުރިން މީޑިއާތަކުގައި ވަނީ ޑިބާލާގެ އެއްބަސްވުމާ ގުޅޭ އެކި ވާހަކަތައް ރިޕޯޓުކޮށްފައެވެ. އެގޮތުން މިދިޔަ އަހަރުގެ ޑިސެމްބަރު މަހު ޑިބާލާއަށް އައު އެއްބަސްވުމެއް ހުށަހެޅި ކަމަށް ޔުވެންޓަސްގެ ރައީސް އަދްރެއާ އަގްނެލީ ވިދާޅުވި ނަމަވެސް، ޑިބާލާ ވަނީ އެކަން ދޮގުކޮށްފައެވެ. އެގޮތުން އެ ފަހަރު ޑިބާލާ ބުނީ އޭނާގެ އެއްބަސްވުމާ ގުޅޭ ގޮތުން ދޮގު މައުލޫމާތުތަކެއް މީޑިއާގައި ހިއްސާކޮށްފައިވާ ކަމަށާއި، މިހާތަނަށްވެސް އެއްބަސްވުމާ ގުޅޭ ގޮތުން މަޝްވަރާކުރުމަށް ކުލަބުން އެއްވެސް މަސައްކަތެއް ކޮށްފައިނުވާ ކަމަށެވެ.

ޔުވެންޓަސްއިން ޑިބާލާގެ އެއްބަސްވުން އާކުރުމަށް މަސައްކަތްކުރަމުން އައި ނަމަވެސް، އެ ޓީމުގެ އައު ކޯޗު އަންދްރެއާ ޕިރްލޯގެ ކޯޗުކަމުގައި ޑިބާލާއަށް ވަނީ ފުރުސަތު ލިބުން މަދުވެފައެވެ. އެކަމަކު މީގެ ކުރިން ޕިރްލޯ ބުނީ ޑިބާލާއަކީ ޔުވެންޓަސްގެ ކުރިމަގާ ގުޅިފައިވާ ކުޅުންތެރިއެއް ކަމަށާއި، ޔުވެންޓަސްއިން އޭނާ ވިއްކާ ނުލާނެ ކަމަށެވެ.

މީގެ ކުރިން ޕަލޭމޯއަށްވެސް ކުޅުނު ޑިބާލާ ޔުވެންޓަސްއާ ގުޅުނީ 2015 ވަނަ އަހަރުއެވެ. އޭގެ ފަހުން އޭނާ ވަނީ މިހާތަނަށް ޔުވެންޓަސްއަށް ކުޅެދިން 244 މެޗުގައި 98 ލަނޑު ޖަހާފައެވެ. އަދި ވަނީ ޔުވެންޓަސްއާއެކު އިޓާލިއަން ލީގު ފަސް ފަހަރު އަދި އިޓާލިއަން ކަޕް ތިން ފަހަރު ކާމިޔާބުކޮށްފައެވެ.