އިޓަލީގެ ރޯމާ އަށް ކުޅެމުން އަންނަ އާޖެންޓީނާގެ ފޯވަޑް ޕައުލޯ ދީބާލާ މާބޮޑަށް އަގުހެޔޮކޮށް ގަނެވޭނެ ފުރުސަތު ފަހިވުމާއެކު ކުލަބުތަކުން އެލާޓަށް އަތުވެއްޖެ އެވެ.
އުމުރުން 30އަހަރުގެ ކުޅުންތެރިޔާގެ ގަންނަން ލިބޭ އަގު މި އަހަރުން ފެށިގެން ވަނީ 13 މިލިއަން ޔޫރޯ އަށް ތިރިވެފަ އެވެ. މިއާއެކު އިނގިރޭސިވިލާތުގެ ތިން ކުލަބު ކަމަށްވާ މެންޗެސްޓާ ޔުނައިޓެޑާއި ޗެލްސީ އަދި ނިއުކާސަލް އިން ވަނީ އޭނާ ގަތުމަށް ތައްޔާރުވާން ފަށައިފަ އެވެ.
އިޓަލީގެ ކުލަބުތަކަށް ވެސް ދީބާލާ ގަތުމުގެ ފުރުސަތު އެބައޮތެވެ. އަދި އޭނާ އަށް ބައެއް ބޮޑެތި ކުލަބުތަކުން ޝައުގުވެރިވެސްވެ އެވެ. އެކަމަކު އިޓަލީގެ ކުލަބުތަކުން ހުށަހެޅުމެއް ލިބިއްޖެނަމަ އެކަން ގަބޫލުނުކުރުމުގެ ފުރުސަތު ރޯމާ އަށް ލިބިފައިވެ އެވެ.
ޕޯޗުގަލްގެ ކޯޗު ހޯސޭ މޮރީނިއޯ، ދީބާލާ ރޯމާ އަށް ގެންދިޔަ ފަހުން އޭނާ އަންނަނީ އެ ޓީމުގައި ރަނގަޅު ކުޅުމެއް ދައްކަމުންނެވެ. މިހެންވެ ޔުވެންޓަސްގެ ކުރީގެ ފޯވަޑަށް އެހާ ފަސޭހައިން ކުލަބު ބަދަލު ނުކުރެވޭނެ ކަމަށް އިޓަލީގެ ނޫސްތަކުން ބުނެ އެވެ.
ދީބާލާ އަކީ 2022 ވަނަ އަހަރުގެ ވޯލްޑްކަޕް އާޖެންޓީނާ ކާމިޔާބުކުރި ޓީމުގެ ކުޅުންތެރިއެކެވެ. އެ މުބާރާތުގައި އޭނާ އަށް ފުރުސަތު ލިބުނީ ބަދަލު ކުޅުންތެރިއެއްގެ ގޮތުގަ އެވެ. ޔޫރަޕުގެ ގިނަ މީޑިއާތަުން ބުނާ ގޮތުގައި ދީބާލާ އަކީ ކުރިން ގިނަ ބަޔަކު އުއްމީދުކުރިވަރަށް އަރައިގަތް ތަރިއެއްނޫނެވެ.
