ޓްރާންސްޝިޕްމެންޓް ބަނދަރު ޕްރައިވެޓް ޕާޓްނަރޝިޕްގެ އުސޫލުން ތަރައްގީކުރަން ހުޅުވާލައިފި
ޓްރާންސްޝިޕްމެންޓް ބަނދަރު ތަރައްގީކުރުމަށް އީ.އޯ.އައި ހުށަހެޅުމަށް ވަނީ ހުޅުވާލާފައި
އެމްޕީއެލް ބަނދަރު ސަރަހައްދު ފޮޓޯ : ޔޫސުފް ސޮފްވާން
ރާއްޖޭގެ އުތުރުގައި ބައިނަލްއަގްވާމީ ކޮންޓެއިނަރ ޓްރާންސްޝިޕްމެންޓް ބަނދަރެއް ޕްރައިވެޓް ޕާޓްނަރޝިޕްގެ އުސޫލުން ތަރައްގީކުރުމަށް ފިނޭންސް މިނިސްޓްރީން ހުޅުވާލައިފިއެވެ.
ފިނޭންސް މިނިސްޓްރީން ނެރެފައިވާ އިއުލާނެއްގައި ބުނެފައި ވަނީ މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ އެދުމުގެ މަތިން ރާއްޖޭގެ އުތުރުގައި ބައިނަލްއަގްވާމީ ކޮންޓެއިނަރ ޓްރާންސްޝިޕްމެންޓް ބަނދަރެއް ޕްރައިވެޓް ޕާޓްނާރޝިޕްގެ އުސޫލުން ތަރައްގީކުރުމަށް "އެކްސްޕްރެޝަން އޮފް އިންޓްރެސްޓް" (އީ.އޯ.އައި) ހުށަހެޅުމުގެ ދައުވަތު މިކަމަށް ޝަރުތުހަމަވާ ހުރިހާ ފަރާތްތަކަށް ހުޅުވާލާފައިވާ ކަމަށެވެ.
މިމަސައްކަތްތަކާއި ގުޅޭ މައުލޫމާތު ހިމެނޭ ގޮތަށް ތައްޔާރުކުރެވިފައިވާ ޓާރމްސް އޮފް ރިފަރެންސް (ޓީ.އޯ.އާރް) ފިނޭންސް މިނިސްޓްރީގެ ވެބްސައިޓުން މަރޗް 15 ވަނަ ދުވަހުން ފެށިގެން ޑައުންލޯޑް ކުރެވެން ހުންނާނެކަމަށާއި ޝައުގުވެރިކަން ފާޅުކުރުމުގެ ދައުވަތާއި ގުޅިގެން ދޫކުރެވޭ އެންމެފަހުގެ މައުލޫމާތުތަށް ވެބްސައިޓް މެދުވެރިކޮށް ހޯދުމަކީ ޝައުގުވެރިކަން ފާޅުކުރާ ފަރާތުގެ ޒިންމާއެއްކަމަށް ފިނޭންސް މިނިސްޓްރީން ބުނެއެވެ.
ފިނޭންސް މިނިސްޓްރީން ބުނީ މަސައްކަތަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޝޯޓް ލިސްޓް ކުރެވޭ ފަރާތްތަކަށް ޕްރޮޕޯސަލް ހުށަހެޅުމުގެ ދައުވަތު ދެވޭނެކަމަށެވެ.
މިނިސްޓްރީން ވަނީ މިކަމަށް ޝައުގުވެރިވާ ފަރާތްތަކުގެ ތެރެއިން، ޝަރުތުހަމަވާ ފަރާތްތަކުން އޭޕްރިލް 29ގެ މެންދުރުފަހު 02:00ގެ ނިޔަލަށް "އެކްސްޕްރެޝަން އޮފް އިންޓްރެސްޓް" މިނިސްޓްރީއަށް ހުށަހެޅުމަށް އެދިފައެވެ.
މީގެ ކުރިން އިކޮނޮމިކް މިނިސްޓަރ ފައްޔާޒް އިސްމާއިލްވަނީ ރާއްޖޭގައި ޓްރާންސްޝިޕްމަންޓް ޕޯޓެއް ތަރައްގީނުކުރެވި މިހާރު މާ ލަސްވެއްޖެ ކަމަށް ވިދާޅުވެފައެވެ. މިނިސްޓަރ ފައްޔާޒު ވަނީ ރާއްޖޭގައި ޓްރާންސްޝިޕްމަންޓް ޕޯޓެއް ތަރައްގީކުރުމަށް ދިރާސާތައް ހަދައި ނިމިފައިވާކަމަށާއި ޕޯޓް ތަރައްގީކުރުމަށް މަރޗް ނޫނީ އޭޕްރިލްމަހު އެކްސްޕްރެޝަން އޮފް އިންޓްރަސްޓަށް ހުޅުވާލެވިގެންދާނެކަމަށް ވިދާޅުވެފައެވެ.
