އަނަސްގެ މަރުގެ މައްސަލައިގައި ދައުވާލިބޭ ޖުނައިޙްގެ ބޭސްފަރުވާއާ ގުޅޭ ގިނަ މައްސަލަތަކެއް!

ރ މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގެ އަޑުއެހުމެއް ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ހޯމަ ދުވަހު ކުރިއަށްދިޔަ އަޑުއެހުމަކީ ހެކިބަސް ނެގުމާއި ބަންދު މުރާޖައާ ކުރުމަށް ބޭއްވި އަޑުއެހުމެކެވެ. ނަމަވެސް ހެކިން ހާޒިރު ކުރެވިފައި ނުވާއިރު، ދައުލަތުގެ ފަރާތުން ވަނީ ސިއްރު ހެކިން ހާޒިރު ކޮށް ހެކިބަސް ނެގުމަށް އިތުރު ފުރުސަތަކަށް އެދިވަޑައިގަންނަވާފައެވެ. އެއާއެކު މައްސަލަ ބައްލަވާ ގާޒީ މުޙައްމަދު ސަމީރު ވަނީ ބަންދު މުރާޖައާގެ ބައި ކުރިއަށް ގެންގޮސްފައެވެ.

މި އަޑުއެހުމުގައި ދައުލަތުން ވަނީ ދައުވާލިބޭ 7 މީހުންގެ ޙާލަތަށް ބަދަލެއް އައިސްފައި ނުވާކަން ފާހަގަ ކުރައްވައި، ބަންދުގެ މުއްދަތު ދެމެހެއްޓުމަށް އެދިވަޑައިގަންނަވާފައެވެ. އެކަމާ ގުޅޭގޮތުން މި މައްސަލައިގައި ދައުވާ ލިބޭ ފަރާތްތަކެއްގެ ދިފާއީ ވަކީލެއް ކަމަށްވާ އާދަމް އާސިފް ވިދާޅުވީ، ދައުވާލިބޭ ޖުނައިޙް އަބްދުﷲ ރާއްޖެއިން ބޭރަށް ގޮސް ބޭސް ފަރުވާ ފުރިހަމަކޮށްފައިވަނީ ކަމާބެހޭ ފަރާތްތަކުގެ އިޒުނައާއެކު ކަމަށެވެ. ނަމަވެސް "ޑަސްޓް-ފްރީ" މާޙައުލެއްގައި ހުރުމަށް ޑޮކްޓަރުން ލަފާ ދީފައިވާކަން ފާހަގަ ކުރައްވައި އާސިފް ވަނީ ޖުނައިޙްއަށް ލިބެންޖެހޭ ބޭސް އެކަށީގެންވާ ގޮތެއްގައި ނުލިބޭ މައްސަލައަށް ވެސް އަލިއަޅުވާލައްވާފައެވެ. އެގޮތުން ލޮލުގެ ފަރުވާދޭ ޑޮކްޓަރަށް ދެއްކުމުން ޖުނައިޙްއަށް ޑޮކްޓަރުން ލަފާދީފައިވަނީ އޮކްސިޖަން ލެންސްއެއް ބޭނުން ކުރުމަށެވެ.

އެކަމާ ގުޅޭގޮތުން ވާހަކަ ދެއްކުމަށް ފުރުސަތު ދެއްވުމުން ޖުނައިޙު ވެސް ވަނީ ބޭސްފަރުވާ އެކަށީގެންވާ ގޮތެއްގައި ނުލިބޭކަން ފާހަގަކޮށްފައެވެ. އަދި ޖަލުތަކަކީ ޑަސްޓް ފްރީ މާޙައުލުތަކަށް ނުވާއިރު، ކަރެކްޝަންސް މެދުވެރިކޮށް، އެކަން ކަށަވަރު ކޮށްދެއްވުން ޖުނައިޙް ވަނީ އެދިފައެވެ. އަދި ދައުވާލިބޭ އެންމެންވެސް ވަނީ ޝަރީއަތް އަވަސްކޮށްދިނުން އެދިފައެވެ.

މި މައްސަލައަށް އަލިއަޅުވާލައްވާ ދައުލަތުގެ ވަކީލާ ވިދާޅުވީ، ޖުނައިޙް ހުރީ ޑޮކްޓަރުން ލަފާދީފައިވާފަދަ މާޙައުލެއްގައިތޯ ކަށަވަރު ކުރުމަށް ބަލަންޖެހޭ ކަންކަން ބަލާނެ ކަމަށެވެ.

އޭގެ އިތުރުން، މި މައްސަލައިގައި ދައުވާލިބޭ އަޙުމަދު ޒަޔާންއާއި އުޘްމާން ޝަރީފުގެ ދިފާއީ ވަކީލު އަހުމަދު ނިޝާން އިބްރާޙިމް ވިދާޅުވީ، މި މައްސަލައަށް 4 އަހަރުވެފައިވާއިރު، ޤާނޫނު އަސާސީގައި ބަޔާންކޮށްފައިވާ އަސާސީ ޙައްޤުތަކާ ވެސް މިހާރު ތައާރަޒުވަމުންދާ ކަމަށެވެ. އަދި މި މައްސަލައިގެ ހުރިހާ ސިއްރުނޫން ހެކިންގެ ހެކިބަސް ނަގާފައިވާއިރު، ސިއްރު ހެކިން ހާޒިރު ކުރުމަށް ދައުލަތަށް ވަކި މުއްދަތެއް ކަނޑައަޅައިދެއްވުމަށް ނިޝާން ވަނީ އެދިވަޑައިގަންނަވާފައެވެ. އަދި ސިއްޙީ ޙާލަތު ބަޔާން ކޮށްދިނުމަށް ފުރުސަތެއް ދެއްވުމަށް ވެސް ނިޝާން ވަނީ އެދިވަޑައިގަންނަވާފައެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވިދާޅުވީ، ދައުލަތަށް ސިއްރު ހެކިން ހާޒިރު ކުރުމަށް އިތުރު ފުރުސަތެއް ދެއްވާނެ ކަމަށެވެ. އަދި އަންނަ އަޑުއެހުމުގައި ކުރިއަށްދާނެ ގޮތެއް ނިންމަވާނެކަން ގާޒީ ފާހަގަ ކުރެއްވިއެވެ. ގާޒީ ވިދާޅުވީ، ހެކިބަސް ނެގުމަށް 23 މާރޗުގެ 11:00 ގައި އަޑުއެހުމެއް ބާއްވާނެ ކަމަށެވެ. އަދި އޭޕްރީލް މަހުގެ ފުރަތަމަ އަދި ފަހު ހަފްތާގައި އަޑުއެހުންތަކެއް ބާއްވާނެކަން ގާޒީ ފާހަގަ ކުރެއްވިއެވެ. އަދި އެއަށްފަހު އިތުރު ދިފާއީ ހެކިންގެ ހެކިބަސް ނެންގެވުމާމެދު ގޮތެއް ނިންމަވާނެކަން ގާޒީ ފާހަގަ ކުރެއްވިއެވެ.

ގާޒީ އިތުރަށް ވިދާޅުވީ، އިންސާނެއްގެ ފުރާނައާ ގުޅޭ މައްސަލައަކަށްވާތީ މިއީ އެންމެ ނުރައްކާތެރި ކުށްތަކުގެ ގޮތުގައި ބެލެވޭ ކަމަށެވެ. އަދި ބަންދުގައި ބޭތިއްބުމަށް ކުރިންވެސް ނިންމާފައިވާ އަމުރު ދެމެހެއްޓެވުމަށް ގާޒީ ވަނީ އެދިވަޑައިގަންނަވާފައެވެ.