ރާއްޖެއިން ބޭރުގައި ވޯޓުލުމަށް ހަމަޖެހިފައިވާ ވަގުތުތައް އީސީއިން އިއުލާންކޮށްފި
ވޯޓުލުން ފަށާނެ ގަޑިއަކީ އެ ޤައުމުގެ ގަޑިން ހެނދުނު 07:30ން ހަވީރު 17:30 އާ ހަމައަށް
އިލެކްޝަންސް ކޮމިޝަނުގެ ގައުމީ ލަފާދޭ ކޮމެޓީ
2021 އޭޕްރީލް 10 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2020 ގައި ރާއްޖެއިން ބޭރުގައި ވޯޓުލުމަށް ހަމަޖެހިފައިވާ ވަގުތުތައް އިލެކްޝަންސް ކޮމިޝަން (އީސީ) އިން އިއުލާންކޮށްފިއެވެ.
އެ ކޮމިޝަނުން ބުނީ އިންޑިއާ (ޓްރިވެންޑްރަމް) އަދި ސްރީލަންކާ (ކޮލޮމްބޯ) ގައި ވޯޓުލުން ފަށާނެ ގަޑިއަކީ އެ ޤައުމުގެ ގަޑިން ހެނދުނު 07:30ން ހަވީރު 17:30 އާ ހަމައަށް ކަމަށެވެ. ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި ބޭރު ޤައުމުތަކުގެ ތެރެއިން ވޯޓު ފޮށި ބެހެއްޓޭނެކަން މިހާތަނަށް ޔަޤީންވެފައިވަނީ ސްރީލަންކާގައި އެކަނިކަމަށް އިލެކްޝަންސް ކޮމިޝަނުން ވަނީ ހާމަކޮށްފައެވެ. އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ، މިފަހަރުގެ އިންތިޚާބަކީ ގޮންޖެހުންތައް ބޮޑު އުނދަގޫ އިބްތިޚާބެއްކަމުގައިވިޔަސް އިންތިޚާބު ބާއްވަން އޮތް ތާރީޚަށް ވާންޖެހޭ ހުރިހާ ތައްޔާރީތަކެއް ވަމުންދާ ކަމަށެވެ. ކޮވިޑްގެ ސަބަބުން ވޯޓުލުމަށް އެދިގެން ހުށަހަޅާ ހުރިހާ ރިސޯޓްތަކެއްގައި ވޯޓު ފޮށި ބަހައްޓަން ޖެހޭއިރު، ކޮމިއުނިޓީ ސްޕްރެޑެއް އޮތް މާލެ ސަރަހައްދުގައި ބަހައްޓާ ވޯޓު ފޮއްޓާއި ޕޯލިންގް ސްޓޭޝަންގެ އަދަދު ވަރަށް ބޮޑަށް އިތުރުވެފައިވާކަމަށް ޝަރީފް ވިދާޅުވިއެވެ.
ރާއްޖޭގެ އިތުރުން މިފަހަރު ރާއްޖެއިން ބޭރުގައި ވެސް ވޯޓުލުމުގެ އިންތިޒާމު ހަމަޖެއްސުމަށް މަސައްކަތްކުރަމުންދާކަމަށް ޝަރީފް ވިދާޅުވިއެވެ. އެގޮތުން ކުރީ ފަހަރުތަކަކޭ ވެސް އެއްގޮތަށް އިންޑިއާ، ސްރިލަންކާ، މެލޭޝިިއާ އަދި އިނގިރޭސިވިލާތުގައި ވޯޓު ފޮށި ބެހެއްޓުމަށް މަސައްކަތް ކުރިކަމަށް ޝަރީފް ވިދާޅުވިއެވެ. އެހެންނަމަވެސް، ކޮވިޑްގެ މިހާރުގެ ޙާލަތު ހުރިގޮތުން މެލޭޝިއާއާއި އިނގިރޭސިވިލާތުގައި ވޯޓު ފޮށި ނުބެހެއްޓޭނެކަން އެޤައުމުތަކުގެ ސަރުކާރުން ފޮރިން މިނިސްޓްރީ މެދުވެރިކޮށް އަންގާފައިވުމުން މި ދެ ޤައުމުގައި މިފަހަރު ވޯޓު ނުލެވޭނެކަމަށް ވިދާޅުވިއެވެ.
މި ފޮށިތަކަށް ރީ ރަޖިސްޓަރީ ވެެފައިވާ މީހުން އަލުން ޑީފޯލްޓް ފޮއްޓަށް ރަޖިސްޓްރީވެފައިވާނެކަމަށް ޝަރީފް ވިދާޅުވުއެވެ. މިހާތަނަށް ކުރި މަސައްކަތުން އިންޑިއާގައި ވޯޓުލުން ކުރިއަށް ގެންދެވޭނެކަން ކަށަވަރުވެފައި ނުވާއިރު، ބޭރު ޤައުމުތަކުގެ ތެރެއިން ވޯޓު ފޮށި ބެހެއްޓޭނެކަން ޔަޤީންވެފައިވަނީ ސްރީލަންކާގައި އެކަނިކަމަށް ވެސް ޝަރީފް ވިދާޅުވިއެވެ.
