ދަރިވަރުން ސްކޫލް މަރުހަލާ ނިންމައި މުޖުތަމައަށް ނުކުންނަ އިރު އެ ދަރިވަރުންނަކީ މިންތީގެ ހަމަހަމަކަން ގަބޫލްކުރާ ދަރިވަރުންތަަަކަކަށް ހެއްދެވުމަށް މަސައްކަތް ކުރައްވާނެ ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ. ހަަމަ މިއާއެކު އަންހެން ކުދިންނާއި ފިރިހެން ކުދިންނަށް އެއްހަމައެއްގައި ތައުލީމީ ފުރުސަތުތައް ފަހިކޮށްދިނުމަށް ވެސް ވައުދެވެވަޑައިގަންނަވާކަމަށް ވިދާޅުވިއެވެ.
އެޑިއުކޭޝަން މިނިސްޓްރީން މިއަދު އާއްމު ކުރެއްވި ވީޑިއޯ މެސެޖެއްގައި މިނިސްޓަރ ވިދާޅުވީ، މިންތީގެ ހަމަހަމަކަން ގާއިމްކުރުމަށް އަދި ދެ ޖިންސުގެ ދަރުވަރުންނަށް ވެސް ހަމަހަމަ ފުރުސަތުތައް ހޯއްދަވައިދެއްވުމާއި، ތައުލީމީ ހަޔާތް ނިންމާ މުޖުތަމައަށް ނުކުންނަ ދަރިވަރަކީ މިކަންކަން ފުރިހަމަވެގެން ނުކުންނަ ދަރިވަރަކަށް ހެދުމަށް ތައުލީމީ ނިޒާމަށް ގެންނަންޖެހޭ ބަދަލުތައް ގެނައުމަށް މަސައްކަތްކުރައްވާނެ ކަމަށެވެ.
