ހަބީބު ކޮމިޝަނުގެ މުދަލާއި ވަސީލަތް ނަހަމަގޮތުގައި ބޭނުން ކޮށްފައި ނުވޭ – އިލެކްޝަން
މި މައްސަލައާ ގުޅިގެން ބުރާސްފަތި ދުވަހުގެރޭ ވަނީ ކުއްލި ޖަލްސާއެއް ބާއްވާފައި
އިލެކްޝަން ކޮމިޝަންގެ ނައިބް ރައީސް އިސްމާއިލް ހަބީބު
އިލެކްޝަން ކޮމިޝަނުގެ ނައިބު ރައީސް އިސްމާއިލް ހަބީބު އެ ކޮމިޝަނުގެ މުދަލާއި ވަސީލަތް ނަހަމުގޮތުގައި ބޭނުން ކޮށްފައިނުވާ ކަމަށް އިލެކްޝަން ކޮމިޝަނުން ބުނެފިއެވެ.
އިލެކްޝަން ކޮމިޝަނުން ނެރުނު ނޫސް ބަޔާނެއްގައި ބުނީ ކޮމިޝަނުގެ ނައިބު ރައީސް އިސްމާއިލް ހަބީބް އަބްދުއްރަހީމްގެ މައްޗަށް ތުހުމަތުކޮށް ކޮމިޝަނުގެ ދެ މުވައްޒަފަކު ރައްޔިތުންގެ މަޖިލީހަށް ސިޓީއެއް ފޮނުވިކަމަށް ބުނާ ހަބަރާއި ގުޅިގެން ކޮމިޝަނުން ވަނީ ކުއްލި ޖަލްސާއެއް ބާއްވައިފައިވާ ކަމަށެވެ.
ކޮމިޝަނުން ބުރާސްފަތި ދުވަހުގެރޭ ބޭއްވި ކުއްލި ޖަލްސާގައި، ނައިބު ރައީސް އާއި ގުޅިގެން ކަމާބެހޭ އެއްވެސް ކޮމިޓީއަކަށް އެއްވެސް މައްސަލައެއް ހުށަހެޅިފައި ނެތަސް އެފަދަ މައްސަލައެއް އޮތްނަމަ އެ މައްސަލަ ކަމަބޭހޭ ކޮމިޓީތަކަށް ހުށަހެޅުމަށް އިލެކްޝަން ކޮމިޝަނުގެ މުވައްޒަފުންނަށް އެންގުމަށް ވަނީ ނިންމާފައެވެ.
އިލެކްޝަން ކޮމިޝަނުގެ ނޫސްބަޔާނުގައި އިތުރަށް ބުނީ އެ ކޮމިޝަނުގެ ނައިބު ރައީސް ދައުލަތުގެ މުދަލާއި ވަސީލަތް ނަހަމުގޮތުގައި ބޭނުންކުރިކަމަށް ބުނެ މައްސަލައެއް އެންޓި ކޮރަޕްޝަން ކޮމިޝަނަށް ހުށަހެޅިކަމަށް މީޑިއާގައި ރިޕޯޓް ކުރުމާއި ގުޅިގެން މައްސަލައިގެ ހަގީގަތް ބެލުމަށް ކޮމިޝަނުން ކުރި މަސައްކަތުން ނައިބު ރައީސް ކޮމިޝަނުގެ މުދަލާއި ވަސީލަތް ނަހަމުގޮތުގައި ބޭނުންކުރުމުގެ އަމަލެއް ހިންގާފައިނުވާކަން ކަށަވަރުވެފައިވާ ކަމަށެވެ.
