އަދާލަތު ޕާޓީގެ 3 ވަނަ ޤައުމީ މަޖިލިސް، ކޮވިޑްގެ ހާލަތާހުރެ އޮންލައިންކޮށް ބޭއްވުމަށް އެޕާޓީން ނިންމައިފިއެވެ.
އަދާލަތު ޕާޓީގެ ޤައުމީ މަޖިލިސް ކުރިން ބާއްވަން ހަމަޖައްސާފައިވަނީ މިމަހުގެ 11ން 13ށް އެއްތަނަކަށް ޖަމާވެގެންނެވެ. ކޮވިޑުގެ ހާލަތާހުރެ އޭރުވެސް ހަމަޖެހިފައިވަނީ އަތޮޅުތަކުން ބައިވެރިވާ ބޭފުޅުން އޮންލައިންކޮށް ބައިވެރިވާ ގޮތަށެވެ. ނަމަވެސް މުޅި ޤައުމީ މަޖިލީސްވެސް އޮންލައިންކޮށް ބޭއްވުމަށް ޢަދާލަތު ޕާޓީން ނިންމީ ރާއްޖޭގައި ކޮވިޑުގެ ހާލަތު އިތުރަށް ގޯސްވެ އެޗްޕީއޭއިން އެޅުއްވި ޚާއްސަ ފިޔަވަޅުތަކަށް އިހްތިރާމް ކުރުމުގެ ގޮތުންނެވެ.
އަލަށް އިންތިޚާބުވި ޢަދާލަތު ޕާޓީގެ ރައީސް ޝައިޚް އިމްރާނާއި ނައިބު ރައީސް އަހުމަދު ޝަރީފް ހުވާކުރެއްވުން މިޤައުމީ މަޖިލީހުގައި އޮންނާނެއެވެ. އަދި މި މަޖިލީހުގައި އިތުރު ދެ ނައިބު ރައީސުން އިންތިޚާބު ކުރުން އޮންނާނެއެވެ.
މީގެއިތުރުން މަޝްވަރާ މަޖިލީހުގެ އިންތިޚާބާއި ދާއިމީ ކޮމެޓީތައް އެކުލަވާލުން އޮންނާނެއެވެ.
އަދާލަތު ޕާޓީގެ ދުސްތޫރު ބުނާގޮތުން ކޮންމެ ފަސްއަހަރަކުން އެއްއަހަރު ޤައުމީ މަޖިލިސް ބާއްވަން ޖެހެއެވެ. ނަމަވެސް ޤައުމާއި ޕާޓީގެ ހާލަތު ހުރިގޮތުގެ ސަބަބުން އަސާސީ ޤަވާއިދުގައި ބުނާގޮތަށް މަޝްވަރާ މަޖިލީހުން ވަނީ ޤައުމީ މަޖިލީސް ބޭއްވުން ފަސްކޮށްފައެވެ.
