ތެމިފޯވެގެންވެސް ވެކްސިން ޖެހުމަށް ކިޔުގައި

ކޮވިޑް-19 ވެކްސިން ޖެހުމުގެ ޕްރޮގްރާމް ފެބްރުއަރީ މަހުގެ 1 ވަނަ ދުވަހު ފަށާފައިވާއިރު އެންމެ ފުރަތަމަ ވެކްސިން ޖެހުމަށް މީހުންގެ ފަރާތުން ލިބުނު ތަރުހީބު ވަކި ހިސާބަކުން ވަނީ ކުޑަވާން ފަށާފައެވެ. ހެލްތު މިނިސްޓަރ އަހުމަދު ނަސީމް ވިދާޅުވެފައިވަނީ ރާއްޖޭގައި ދުވާލެއްގެ މައްޗަށް 10،000 މީހުންނަށް ވެކްސިން ޖެހުމުގެ ގާބިލްކަން ހުރިކަމަށެވެ. އެހެންނަމަވެސް އާންމު ގޮތެއްގައި ރާއްޖޭގައި ދުވާލެއްގެ މައްޗަށް ވެކްސިން ޖަހާފައިވަނީ ހަހާސް މީހުންނެވެ. ފަހުން ދުވާލެއްގެ މައްޗަށް ވެކްސިން ޖަހާ މީހުން މާލެ ސަރަހައްދުގައި ވަނީ ދަށަށްގޮސްފައެވެ.

އެގޮތުން މިފަހަކަށް އައިސް މާލެ ސަރަހައްދުގައި ވެކްސިން ޖަހަމުންދިޔަ ސެންޓަރުތައް ފެނިގެންގޮސްފައިވަނީ ހުސްކޮށެވެ. މާލެ ސަރަހައްދަކީ ކޮވިޑްގެ ކޭސްތައް އެންމެ ގިނަ އަދަދަކަށް ފެންނަމުންދާ ސަރަހައްދަށްވާއިރު ވެކްސިން ޖަހާ މީހުންގެ އަދަދު މަދުވާން ފެށުމުން ހެލްތު އެމަރޖެންސީ އޮޕަރޭޝަން ސެންޓަރ(އެޗްއީއޯސީ)ން ބާއްވާ ނޫސްވެރިންގެ ބައްދަލުވުންތަކުގައި ތަކުރާރުކޮށް ވަނީ ވެކްސިން ޖަހަން ދިޔުމަށް އިލްތިމާސްކޮށްފައެވެ. ނަމަވެސް ވެކްސިން ޖަހަން ދާ މީހުންގެ އަދަދުތައް މާލެ ސަރަހައްދުގައި އިތުރެއްނުވެއެވެ. ފެބްރުއަރީ މަހުގެ މެދެއްހާ ހިސާބުން ފެށިގެން އެއަދަދުތައް ހުރީ ހަތަރުހާހުން ތިރީގައެވެ. ބައެއް ދުވަސްދުވަހު ހާހެއްހާ މީހުން މާލެ ސަރަހައްދުން ވެކްސިން ޖަހާފައިވާކަން އެޗްޕީއޭގެ ތަފާސްހިސާބުތަކުން އެނގެއެވެ.

ނަމަވެސް މަރޗް މަހުގެ 8 ވަނަ ދުވަހު މާލެ ސަރަހައްދުގައި ކޮވިޝީލްޑް ވެކްސިންގެ ފުރަތަމަ ޑޯޒު ޖަހައިދެނީ މި މަހުގެ 15 ވަނަ ދުވަހާ ހަމައަށްކަމަށް ހެލްތު މިނިސްޓަރ އަހުމަދު ނަސީމް ވިދާޅުވުމާއެކު މާލެ ސަރަހައްދުގެ ވެކްސިން ޖަހާ ސެންޓަރުތަކަށް މިވަނީ ބާރުބޮޑުވެގެން ގޮސްފައެވެ. ކޮންމެ ސެންޓަރެއްގެ ކިޔު އެތައް ހިސާބަކަށް ދަމާލާފައިވާއިރު މިސަރަހައްދުގައި ވެކްސިން ޖަހާ މީހުންގެ އަދަދު ވަނީ މަތިވާން ފަށާފައެވެ. އެގޮތުން މަރޗް މަހުގެ 8 ވަނަ ދުވަހު 2186 މީހުން މާލެ ސަރަހައްދުން ވެކްސިން ޖެހިއިރު މަރޗް މަހުގެ 9 ވަނަ ދުވަހު ވެކްސިން ޖަހާފައިވަނީ 4083 މީހުންނެވެ. އަދި މަރޗް މަހުގެ 10 ވަނަ ދުވަހު 4459 މީހުން މާލެ ސަރަހައްދުން ވެކްސިން ޖަހާފައިވާއިރު އެދުވަހަކީ މިހާތަނަށް އެންމެ ގިނަ އަދަދެއްގެ މީހުންނަށް ރާއްޖޭގައި ވެކްސިން ދިން ދުވަސްވެސް މެއެވެ. އެދުވަހު އެކަނި 9781 މީހުންނަށް ވަނީ ވެކްސިން ދީފައެވެ.

ޖެހިގެން އައި މަރޗް މަހުގެ 11 ވަނަ ދުވަސްކަމަށްވާ ބުރާސްފަތި ދުވަހަށް ބަލާއިރު އެދުވަހުވެސް ވެކްސިން ޖަހާ ސެންޓަރުތައް ކައިރީގައި ވަނީ ކިޔު ދަމާލާފައެވެ. އެތައް ހިސާބަކަށް ކިޔު އޮންނައިރު މުޅި ރާއްޖެއަށް މިހާރު ކުރަމުންދާ ވިއްސާރައާއެކު މާލޭއަށްވެސް އަންނަނީ ވާރޭ ވެހެމުންނެވެ. ނަމަވެސް ކުޑަ ނަގައިގެންނާއި ވާރެއާ ތެމިގެންވެސް ކޮވިޑް ވެކްސިން ޖެހުމަށް މީހުން ކިޔުގައި ތިބި މަންޒަރު ވަނީ ފެނިގެންގޮސްފައެވެ. ގިނަ ބަޔަކު ވެކްސިން ޖަހަންދާ އެއްތަން ކަމުގައިވާ ސޯޝަލް ސެންޓަރު ބޭރުގައި ހަދާފައިވާ ކިއޫ ހިރިޔާ ސްކޫލާ ހިސާބަށް އޮތް މަންޒަރުވެސް ވަނީ ފެނިފައެވެ. މާލެ ސިޓީގައި ވެކްސިން ޖަހަމުންދާ ތަންތަނުގައި ވެކްސިން ޖަހަމުންދަނީ ހެނދުނު 9ން ފެށިގެން ހަވީރު 4:30އާ ހަމައަށެވެ. ނަމަވެސް ބުރާސްފަތި ދުވަހު ސޯޝަލް ސެންޓަރުގެ ކިޔު ދިގުކަމުން 3:30ހާއިރު އެޗްޕީއޭއިން ވަނީ އެސެންޓަރުގެ ކިޔު ބަންދުކޮށްފައިވާކަމަށް ބުނެ އެޗްޕީއޭގެ ކޮމިޔުނިޓީ ވައިބަރ ގްރޫޕަށް މެސެޖްކޮށްފައެވެ.

ވެކްސިން ޖެހުމުން ދިމާވާ ސައިޑްއެފެކްޓްސްތަކާ ގުޅިގެން ހަފްތާ ބަންދާ ދިމާކޮށް އާންމުގޮތެއްގައި ގިނަ ބަޔަކު ބުރާސްފަތި ދުވަހު ވެކްސިން ޖެހުމަށް މީގެކުރިން ވެސްދެއެވެ. އެއީ ވަޒީފާއަށް ނުކުތުމަށް ހުރަހަކަށް ނުވާނެގޮތަށް އެކަން ކުރުމަށްޓަކައެވެ.

މާލޭގެ 8 ތަނަކުން ވެކްސިން ޖަހަމުން އަންނައިރު 02 މޯބައިލް ޓީމެއް ހަރަކާތްތެރިވަމުންދާކަމަށް އެޗްޕީއޭއިން ބުނެއެވެ.

ބުރާސްފަތި ދުވަހާ ހަމައަށް ހާމަކޮށްފައިވާ ތަފާސްހިސާބުތަކަށް ބަލާއިރު ރާއްޖެއިން 175،456 މީހުންނަށް ވަނީ ވެކްސިން ދީފައެވެ. މީގެތެރެއިން މާލެ ސަރަހައްދުގެ 99،821 މީހުންނަށް ވެކްސިން ދީފައިވާއިރު އަތޮޅުތަކުން 75،635 މީހުންނަށް ވަނީ ވެކްސިން ދީފައެވެ. ރާއްޖޭގައި ދިރިއުޅޭ ދިވެހިންގެ އިތުރުން ބިދޭސީންނަށްވެސް އަންނަނީ ވެކްސިން ދެމުންނެވެ.