ބުދަ ދުވަހު ރެކޯޑު އަދަދަކަށް ވެކްސިން ޖަހައިފި
10 މާރިޗު 2021 | ބުދަ 17:57އަތޮޅުތެރެއިން 75،635 މީހަކު ވެކްސިން ޖަހާފައިވޭ
ކޮވިޑް-19 ވެކްސިން ޖެހުން - ރާއްޖެއިން ބުދަ ދުވަހު ވެކްސިން ޖެހި މީހުންގެ އަދަދު 10000އާ ގާތް ކުރޭ
ބުދަ ދުވަހު ރާއްޖެއިން 10،000އާ ގާތްކުރާ އަދަދަކަށް ކޮވިޑް-19ގެ ވެކްސިން ޖަހައިފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، ބުދަ ދުވަހު ރާއްޖެއިން 9781 މީހުން ކޮވިޑް-19 ވެކްސިން ޖަހާފައިވާ ކަމަށެވެ. އޭގެ ތެރޭގައި ހިމެނެނީ މާލޭ ސަރަޙައްދުން ވެކްސިން ޖަހާފައިވާ 4459 މީހަކާއި، އަތޮޅު ތެރެއިން ވެކްސިން ޖަހާފައިވާ 5322 މީހެކެވެ. މިއީ ރާއްޖޭގައި މިހާތަނަށް އެއް ދުވަހާ އެންމެ ގިނަ މީހުން ވެކްސިން ޖެހި ދުވަހެވެ. އެއާއެކު ރާއްޖެއިން މިހާތަނަށް ވެކްސިން ޖެހި މީހުންގެ ޖުމުލަ އަދަދު ވަނީ 175،465ށް އަރާފައެވެ.
އެޗްޕީއޭގެ ތަފާސްހިސާބުތައް ދައްކާގޮތުން ރާއްޖެއިން މިހާތަނަށް ވެކްސިން ޖަހާފައިވާ މީހުންގެ ތެރެއިން 99،821 މީހުން ނިސްބަތްވަނީ މާލޭ ސަރަޙައްދަށެވެ. އަދި އަތޮޅުތެރެއިން 75،635 މީހަކު ވެކްސިން ޖަހާފައިވެއެވެ.
ރާއްޖޭގައި ވެކްސިން ޖަހާފައިވާ މީހުންގެ އަދަދު ލައްކައަކަށް އަރާފައިވަނީ މިދިޔަ ފެބްރުއަރީ މަހުގެ 27 ވަނަ ދުވަހުއެވެ. މިހާރުވެސް ވީހާވެސް ގިނަ މީހުން ވެކްސިން ޖެހުމަށް އެޗްޕީއޭއިން އިލްތިމާސް ކުރަމުންދާއިރު، އުމުރުން ދުވަސްވީ މީހުންނާއި، ބައްޔެއްގެ ސަބަބުން ނުވަތަ ނުކުޅެދުންތެރިކަމެއްގެ ސަބަބުން އެނދުމަތިވެފައިވާ މީހުންގެ ރައްކަލަކަށް އެފަދަ މީހުންގެ އެހީތެރިން ވެކްސިން ޖެހުން މުހިންމު ކަމަށް އެޗްޕީއޭއިން ދަނީ ބުނަމުންނެވެ.
ރާއްޖޭގައި ކޮވިޑް-19 އަށް ވެކްސިން ޖެހުމުގެ ކަންތައް ކުރިއަށް ގެންދާއިރު، މިހާތަނަށް ރާއްޖޭގައި ބޭނުން ކުރުމުގެ ހުއްދަ ދީފައިވަނީ ހަމައެކަނީ އެސްޓްރަޒެނެކާ އާއި އޮކްސްފޯޑް ޔުނިވާރސިޓީގެ ދިރާސާގެ މައްޗަށް އިންޑިއާގެ ސިރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިނެވެ.
