ރާއްޖޭގައި ތަރައްގީކުރެވިފައިވާ ޓޫރިސްޓު އެނދުތަކުގެ 94 އިންސައްތަ މިހާރު ދަނީ އޮޕަރޭޓްކުރަމުން ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެފައިވާއިރު، މިއަހަރުގެ ފަހުކޮޅު ފަތުރުވެރިކަމުގެ ސިނާއަތް ރިކަވަރ ވާނެކަމުގެ އުންމީދު އިތުރުވެއްޖެއެވެ.

ޓޫރިޒަމް މިނިސްޓްރީން ބުދަ ދުވަހު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ރާއްޖޭގެ ފަތުރުވެރިކަމުގެ ސިނާއަތްފަށައި މިހާހިސާބަށް ގެނައުމުގައި ހާއްސަ ދައުރެއް އަދާކުރައްވާފައިވާ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ވައިސް ޗެއަރމަން ހުސެއިން އަފީފު ވަނީ މިއަހަރުގެ ފަހުކޮޅު ރާއްޖޭގެ ފަތުރުވެރިކަން ރިކަވަރވާނެ ކަމަށް ވިދާޅުވެފައެވެ.

އެގޮތުން ރާއްޖޭގެ ފަތުރުވެރިކަމުގެ ބޮޑެތި މާކެޓްތައް އަދިވެސް ބަންދުވެފައިވާއިރު، ކޮވިޑްގެ ހާލަތުގައި ރާއްޖޭގެ ފަތުރުވެރިކަމަށް އައު މާކެޓުތައް ތައާރަފްވަމުންދާކަން ފާހަގަކުރައްވައި އަފީފް ވަނީ މިއީ ފަތުރުވެރިކަމަށް ލިބުނު ރަނގަޅު ކުރިއެރުމެއް ކަން ފާހަގަކުރައްވާފައެވެ. އެހެންނަމަވެސް ފަތުރުވެރިކަން އެއްކޮށް ރިކަވަރ ވާނީ ޔޫރަޕުގެ މާކެޓްތައް ހުޅުވާލުމުންކަމަށް އަފީފް ވިދާޅުވިއެވެ.

އަފީފް ވަނީ އަންނަ އަހަރު ފެށިގެންދާނީ ރާއްޖޭގެ ޓޫރިޒަމް ކޮވިޑް-19ގެ ކުރިން އޮތް ހާލަތުގައި އޮވެގެންކަމުގެ އުންމީދު އެބަ އޮތްކަމަށް ވިދާޅުވެފައެވެ.

ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކުރުމާއިއެކު ފަތުރުވެރިކަން ހުއްޓިގެން ދިޔަނަމަވެސް ފާއިތުވި އަހަރުގެ ޖުލައި 15ގައި ބޯޑަރު ހުޅުވާލުމާއިއެކު ރާއްޖެ އަންނަ ފަތުރުވެރިންގެ އަދަދު ދަނީ އެއްދުވަހުން އަނެއް ދުވަހަށް އިތުރުވަމުންނެވެ. އެގޮތުން 2020 ވަނަ އަހަރު ނިމުނުއިރު ރާއްޖެއަށް 555,494 ފަތުރުވެރިން އައިސްފައިވާއިރު، މިއަހަރުގެ މިހާތަނަށް 218,472 ފަތުރުވެރިން ވަނީ ރާއްޖެ އައިސްފައެވެ.

ރާއްޖޭގެ 672 ޓޫރިސްޓު ފެސިލިޓީއެއް އޮޕަރޭޓްކުރަން ފަށާފައިވާއިރު، ފަތުރުވެރިންނަށް ހިދުމަތްދިނުމަށް 45,221 އެނދު ދަނީ މިހާރު އޮޕަރޭޓްކުރަމުންނެވެ. އެއީ 148 ރިސޯޓެއް އޮޕަރޭޓްކުރާ، 34,226 އެނދާއި 11 ހޮޓަލުގައި އޮޕަރޭޓްކުރަމުންދާ 1,458 އެނދުގެ އިތުރުން 140 ސަފާރީއެއްގައި އޮޕަރޭޓްކުރަމުންދާ 2,723 އެނދު އަދި 373 ގެސްޓް ހައުސްގައި އޮޕަރޭޓްކުރަމުންދާ 6,814 އެނދެވެ.