ރިކަވަރީ ލޯނުތަކުގެ ގްރޭސް ޕީރިއަޑަށް އެއް އަހަރު ދުވަހުގެ މުއްދަތެެއް
ގްރޭސް ޕީރިއަޑް އިތުރުކޮށްދިނުމުގައި ލޯން އެޕްލިކޭޝަން އިވެލުއޭޓްކުރުމުގައި އެސް.ޑީއެފް.ސީ އިން ގެންގުޅެފައިވާ މިންގަނޑުތަކަށް ބެލޭނެ
ފިނޭންސް މިނިސްޓްރީ
ކޮވިޑް-19ގެ ސަބަބުން ދިވެހިރާއްޖޭގެ އިގުތިސާދަށް ކުރިމަތިވި ހީނަރުކަމުން އަރައިގަތުމަށް، އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން (އެސް.ޑީ.އެފް.ސީ) މެދުވެރިކޮށް ސަރުކާރުން ތަޢާރަފު ކުރި ރިކަވަރީ ލޯނުތަކުގެ ގްރޭސް ޕީރިއަޑް އިތުރު 6 މަހުގެ މުއްދަތަކަށް އިތުރުކުރުމަށް ފިނޭންސް މިނިސްޓްރީން ނިންމައިފިއެވެ.
ފިނޭންސް މިނިސްޓްރީން ބުނީ އެ ސްކީމަކީ ކޮވިޑް-19އާ ގުޅިގެން ކުދި، އަދި މެދުފަންތީގެ ވިޔަފާރިތަކަށާއި، އަމިއްލަ މަސައްކަތްކުރާ ފަރާތްތަކަށް ވަރކިންގ ކެޕިޓަލް ފޯރުކޮށްދީ، މި ދަތި ދަނޑިވަޅުން އިގުތިސާދު އަރައިގަތުމަށް އެހީތެރިވެދިނުމުގެ ގޮތުން ފަށާފައިވާ ސްކީމަކަށް ވެފައި، ލޯނު އަނބުރާ ދެއްކުމުގައި ވެސް ލުއިފަސޭހަ ގޮތްތަކެއް ފަހިކޮށްދިނުމަކީ އެ މިނިސްޓްރީގެ މަގުސަދު ކަމަށެވެ. އެގޮތުން މިހާތަނަށް ނަގާފައިވާ ލޯނުތަކުގެ ގްރޭސް ޕީރިއަޑް ހަމަވެފައިވާ ކުންފުނިތަކަށް ވެސް އިތުރު 6 މަސްދުވަހުގެ މުއްދަތަކަށް ގްރޭސް ޕީރިއަޑް އިތުރުކޮށް، ޖުމްލަ 12 މަސްދުވަސް ގްރޭސް ޕީރިއަޑްއަކަށް އިތުރުކުރުމުގެ ފުރުސަތު އޮންނާނެ ކަމަށެވެ. އަދި ގްރޭސް ޕީރިއަޑް އިތުރުކޮށްދިނުމުގައި ލޯން އެޕްލިކޭޝަން އިވެލުއޭޓްކުރުމުގައި އެސް.ޑީއެފް.ސީ އިން ގެންގުޅެފައިވާ މިންގަނޑުތަކަށް ބެލޭނެ ކަމަށް ވެސް ބުންޏެވެ.
ކުރިއަށް އޮތް 30 (ތިރީސް) ދުވަސް ތެރޭގައި އެސް.ޑީ.އެފް.ސީ އިން ލޯނު ނަގާފައިވާ ފަރާތްތަކަށް ގްރޭސް ޕީރިއަޑް އިތުރުކުރުމުގެ އެޕްރޫވަލް ޓަރމްސްއާއެކު އެސް.ޑީ.އެފް.ސީ ކަސްޓަމަރ ޕޯޓަލް މެދުވެރިކޮށް އަންގާނެއެވެ. ގްރޭސް ޕީރިއަޑް އިތުރުކުރުމަށް ބޭނުންފުޅުވެލައްވާ ފަރާތްތައް އެސް.ޑީ.އެފް.ސީ އިން އެ ފަރާތްތަކަށް އަންގާތާ 30 ދުވަހުގެ ތެރޭގައި ގްރޭސް ޕީރިއަޑް އެކްސްޓެންޝަން ބަލައިގަނެ، އެކަމަށް ބޭނުންވާ ލިޔެކިޔުން ހަމަކުރަންވާނެ ކަމަށާއި މި އެކްސްޓެންޝަން ރިޖެކްޓްކުރުމުގެ އިހުތިޔާރު ވެސް ވިޔަފާރިތަކަށް ލިބިގެންވާ ކަމަށް ވެސް ފިނޭންސް މިނިސްޓްރީން ބުންޏެވެ. މި ނިންމުމުގެ ސަބަބުން ލޯނުގެ ޓެނަރ ބަދަލުވާނީ މިކަމަށް ބޭނުންވާ ލިޔެކިޔުން ހަމަކުރުމުންނެވެ.
