ކޮވިޑާ ގުޅުންހުރި ހިދުމަތްދިނުމަށް ބޭނުންވާ ސާމާނު ހޯދުމަށް 650 މިލިއަނަށް ވުރެ ގުނަ ރުފިޔާ ޚަރަދުކޮށްފި
އިކޮނޮމިކް ރިކަވަރީ ޕެކޭޖްގެ ދަށުން ވިޔަފާރިތަކަށް 941.3 މިލިއަން ރުފިޔާ ވަނީ ދޫކޮށްފައި
ގއ. ވިލިނގިލި ކޮވިޑް ފެސިލިޓީ
ކޮވިޑް-19 އާ ގުޅުންހުރި ޚިދުމަތްތައް ފޯރުކޮށްދޭން ބޭނުންވާ ސާމާނު ހޯދުމަށް ސަރުކާރުން 650 މިލިއަނަށް ވުރެ ގިނަ ރުފިޔާ ހަރަދުކޮށްފައިވަ ކަމަށް ފިނޭންސް މިނިސްޓްރީން ހާމަކޮށްފިއެވެ.
ފިނޭންސް މިނިސްޓްރީން އާންމުކުރާ "ކޮވިޑް-19 ވީކްލީ ސްޓެޓިސްޓިކްސް" ދައްކާގޮތުން ކޮވިޑް-19 އާ ގުޅުންހުރި ޚިދުމަތްތައް ފޯރުކޮށްދޭން ބޭނުންވާ ސަޕްލައި އަދި ރިކުއިސިޓްސްއަށް ސަރުކާރުން ވަނީ 653.2 މިލިއަން ރުފިޔާ ހަރަދުކޮށްފައެވެ.
އޭގެ އިތުރުން ކެޕިޓަލް އިކުއިޕްމެންޓަށް 201 މިލިއަން ރުފިޔާ ހަރަދުކޮށްފައިވާއިރު، އޮޕަރޭޝަނަލް ސަރވިސަސްއަށް 187.2 މިލިއަން ރުފިޔާ ވަނީ ހަރަދުކޮށްފައެވެ. ކޮވިޑް-19އަށް ސަރުކާރުން ކުރި ހަރަދުތަކުގެ ތެރެއިން ގްރާންޓްސް ކޮންޓްރިބިއުޝަންސް އަދި ސަބްސިޑީސްއަށް ހޭދަކޮށްފައި ވަނީ 123 މިލިއަން ރުފިޔާއެވެ. ސަޕްލައިސް އަދި ރިކުއިސިޓްސްއަށް 94 މިލިއަން ރުފިޔާ ހަރަދުކޮށްފައިވާއިރު، މުވައްޒަފުންނަށް އެލަވަންސް ދިނުމަށް ހޭދަކޮށްފައި ވަނީ 102.5 މިލިއަން ރުފިޔާއެވެ.
ފިނޭންސް މިނިސްޓްރީގެ ތަފާސްހިސާބުތައް ދައްކާގޮތުން ކޮވިޑް-19 އާ ގުޅިގެން ސިއްހީ ޚިދުމަތްތައް ފޯރުކޮށްދިނުމަށް ސަރުކާރުން 1,502.8 މިލިއަން ރުފިޔާ ހަރަދުކޮށްފައިވާއިރު، އިކޮނޮމިކް ރެސްޕޮންސްގެ ދަށުން ހަރަދުކޮށްފައި ވަނީ 1,565.3 މިލިއަން ރުފިޔާއެވެ.
އެގޮތުން ކޮވިޑް-19 އާ ގުޅިގެން އާމްދަނީއަށް އަސަރުކޮށްފައިވާ މީހުންނަށް އިންކަމް ސަޕޯޓް އެލަވަންސްގެ ގޮތުގައި 292.8 މިލިއަން ރުފިޔާ ހަރަދުކޮށްފައިވާއިރު، އިކޮނޮމިކް ރިކަވަރީ ޕެކޭޖްގެ ދަށުން ވިޔަފާރިތަކަށް 941.3 މިލިއަން ރުފިޔާ ވަނީ ދޫކޮށްފައެވެ. އެއީ ރިސޯޓްތަކަށާއި ބޮޑެތި ވިޔަފާރިތަކަށް ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ 585.9 މިލިއަން ރުފިޔާއާއި ކުދި އަދި މެދު ފަންތީގެ ވިޔަފާރިތަކަށާއި އަމިއްލަ މަސައްކަތް ކުރާ ފަރާތްތަކަށް އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) މެދުވެރިކޮށް ދޫކޮށްފައިވާ 355.4 މިލިއަން ރުފިޔާއެވެ.
މީގެ އިތުރުން ކޮވިޑް-19 އާއި ގުޅިގެން ވަކި ވަކި އިދާރާތަކުން ކޮށްފައިވާ ހަރަދުތަކަށް ބަލާއިރު، ކޮވިޑް-19 އާއި ގުޅިގެން ސަރުކާރުން ކުރި ހަރަދުތަކުގެ ތެރެއިން އެންމެ ބޮޑު ޚަރަދެއް ކޮށްފައި ވަނީ ނެޝަނަލް ޑިޒާސްޓަރ މެނޭޖްމެންޓް (އެންޑީއެމްއޭ) މެދުވެރިކޮށް ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ. އެގޮތުން އެންޑީއެމްއޭ އިން ވަނީ ކޮވިޑާއި ގުޅިގެން 867.9 މިލިއަން ރުފިޔާ ހަރަދުކޮށްފައެވެ.
ދެވަނައަށް އެންމެ ބޮޑު ހަރަދު މިނިސްޓްރީ އޮފް ހެލްތުން ކޮށްފައިވާއިރު، އެމިނިސްޓްރީން ވަނީ 373.6 މިލިއަން ރުފިޔާ ހަރަދުކޮށްފައެވެ. އަދި އައިޖީއެމްއެޗް މެދުވެރިކޮށް ކޮވިޑް-19 އާ ގުޅިގެން 93.3 މިލިއަން ރުފިޔާ ހަރަދުކޮށްފައިވާކަމަށް މިނިސްޓްރީގެ ތަފާސްހިސާބުތައް ދައްކައެވެ.
ކޮވިޑް-19 ގެ ސަބަބުން ސަރުކާރުން ކުރަމުން އަންނަ ހަރަދުތަކުގެ ތެރެއިން ޕްލޭނިން މިނިސްޓްރީން ވަނީ 37.3 މިލިއަން ރުފިޔާ ހަރަދުކޮށްފައެވެ. ފޮރިން މިނިސްޓްރީން 6.8 މިލިއަން ރުފިޔާ ހަރަދުކޮށްފައިވާއިރު، ޖެންޑަރ މިނިސްޓްރީން ހަރަދުކޮށްފައި ވަނީ ހަތަރު މިލިއަން ރުފިޔާއެވެ. އަދި ހަޔަރ އެޑިއުކޭޝަން މިނިސްޓްރީން 3.3 މިލިއަން ރުފިޔާ ހަރަދުކޮށްފައިވެއެވެ.
އޭގެ އިތުރުން އެމްއެންޑީއެފްއިން 43.5 މިލިއަން ރުފިޔާ ހަރަދުކޮށްފައިވާއިރު، ފުލުހުންގެ އިދާރާއިން ހަރަދުކޮށްފައި ވަނީ 31.1 މިލިއަން ރުފިޔާއެވެ. އިމިގްރޭޝަން މެދުވެރިކޮށް ނުވަ ލައްކަ ރުފިޔާ ހަރަދުކޮށްފައިވާކަމަށާއި ނެޝަނަލް ޑްރަގް އެޖެންސީން 1.2 މިލިއަން ރުފިޔާ ހަރަދުކޮށްފައިވާކަމަށް ވެސް ފިނޭންސްއިން ބުނެއެވެ.
މީގެ އިތުރުން ޑިޒާސްޓަރ މެނޭޖްމެންޓް ފަންޑުން މިހާތަނަށް 84.06 މިލިއަން ރުފިޔާ ޚަރަދުކޮށްފައިވާއިރު، ޓޫރިޒަމް އެކްޓިވިޓީސް އިމްޕްލިމެންޓޭޝަން ފަންޑުން ޚަރަދުކޮށްފައި ވަނީ 29 މިލިއަން ރުފިޔާއެވެ.
ކޮވިޑް-19ގެ ކޭސް އެއް ރާއްޖެއިން ފެނުނުތާ އެއް އަހަރު ދުވަސްވެފައިވާ އިރު، ސަރުކާރުން ވަނީ ބަލިމަޑުކަމަށް ތައްޔާރުވުމުގެ ގޮތުން ގިނަ ފިޔަވަޅުތަކެއް އަޅާފައެވެ. ރާއްޖޭގެ ހުރިހާ ހިސާބަކުން ވެސް ފަރުވާދެވޭނެ އިންތިޒާމްތައް ހަމަޖައްސާފައިވާއިރު، އެންމެ އެކަށޭނަ ފަރުވާދިނުމަށް ސަރުކާރުން ވަނީ ގިނަ ހަރަދުތަކެއް ކޮށްފައެވެ.
