އޮޑިޓް އަދި އެޝޫރަންސް ޚިދުމަތްދޭ ދޭފަރާތްތައް ރޭޓްކުރެވޭނެ ނިޒާމެއް ބޭނުންވާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

އިންސްޓިޓިއުޓް އޮފް ޗާރޓަރޑް އެކައުންޓެންޓްސް އޮފް މޯލްޑިވްސް (ސީއޭ މޯލްޑިވްސް) އިން ފުރަތަމަ ފަހަރަށް އޮޑިޓް ކުރުމާއި އެޝޫރަންސް ޚިދުމަތް ދިނުމަށް ލައިސަންސް ދިނުމަށް ބޭއްވި ހަފުލާ ޝަރަފުވެރި ކޮށްދެއްވުމަށްފަހު ނޫސްވެރިންނާ ވާހަކަ ދައްކަވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ ސީއޭ މޯލްޑިވްސްއިން ކުރާ މަސައްކަތްތަކަކީ ވަރަށް ބޭނުންތެރި އަދި ބަލައިގަނެވޭ މަސައްކަތްތަކެއް ކަމަށެވެ. އަދި މިފަހަރު ލައިސަންސް ދޫކުރުމުގައި، ލައިސަންސް ލިބޭ ފަރާތްތަކުގެ މަސައްކަތުގެ ފެންވަރު ވަޒަންކުރުމުގެ ކަންކަން ކަށަވަރުވެފައި އޮތުމަކީ އެ ޚިދުމަތަށް ބަރޯސާ ވެވޭ މިންވަރު އިތުރުވެގެންދާނެ، ހެޔޮ ފާލެއްގެ ގޮތުގައި މިނިސްޓަރ ވަނީ ސިފަކުރައްވާފައެވެ.

ލައިސަންސް ކެޓަގަރީ ކުރުން އުވާލި ނަމަވެސް، ސަރުކާރާއި ދައުލަތުގެ ބޭނުމަށް ހާއްޞަގޮތެއްގައި ދައުލަތުގެ ބޮޑަތި ކުންފުނިތަކާއި މާލީ އިދާރާތަށްފަދަ ތަންތަނަށް ޚިދުމަތް ފޯރުކޮށްދޭއިރު، އެފަދަ ބޮޑަތި އޮޑިޓްތައް ކުރުމަށް އެތަންތަނުގެ ގާބިލިއްޔަތުކަން ހުރި މިންވަރު ދެނެގަނެވޭފަދަ ރޭޓިންގ އެއް އޮތުމަކީ ކޮންމެހެން ބޭނުންކަމެއް ކަމަށާއި، އެކަމަށް ސީ އޭ މޯލްޑިވްސް އިން ހައްލެއް ހޯއްދަވައި ދެއްވާނެކަމަށް ޔަގީންކުރައްވާ ކަމަށް ވެސް މިނިސްޓަރ ވިދާޅުވިއެވެ. އަދި އެކައުންޓިންގ އާއި ވެލުއޭޝަން އަދި ލިކުއިޑޭޝަންފަދަ ފައިސާއާއި ގުޅުންހުރި ހިސާބުތަށް ހަދާ ފަރާތްތައް ވެސް މިހާރަށްވުރެ ހަރުދަނާ އުޞޫލަކުން ބެލެހެއްޓޭނެ ގޮތެއް މިހާރު ހޯދަންޖެހިފައިވާކަމަށް އަމީރު ފާހަގަކުރެއްވިއެވެ.

މިކަމާ ގުޅިގެން އިންސްޓްޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް (ސީއޭ މޯލްޑިވްސް)ގެ އިންތިޤާލީ ރައީސް އަދި އޮޑިޓަރ ޖެނެރަލް ހަސަން ޒިޔަތު ވިދާޅުވީ އެންމެން އިސްކަމެއް ދީގެން ދެން ކުރައްވަމުން ގެންދަވާނެ މަސައްކަތަކީ އޮޑިޓް އަދި އެޝޫރަންސް ޚިދުމަތްދޭ ދޭފަރާތްތައް ރޭޓްކުރެވޭނެ ނިޒާމެއް ޤާއިމު ކުރެއްވުން ކަމަށެވެ.

ދިވެހިރާއްޖޭގައި އޮޑިޓަރުންގެ ގޮތުގައި މާލީ ހިސާބުތައް އޮޑިޓް ކުރުމަށާއި އަދި އެޝޫރަންސް ޚިދުމަތްދިނުމުގެ ލައިސަންސް 19 ފަރުދުންނަށާއި 11 ފާރމްއަކަށް ވަނީ ދޫކޮށްފައެވެ. ޗާރޓަރޑް އެކައުންޓެންޓުންގެ ބިލް ތަސްދީގުކުރެވުނު ފަހުން، ލައިސަންސް ދިނުމުގައި ކުރިން އަމަލު ކުރަމުން އައި ގޮތަށް ބައެއް މުހިންމު ބަދަލުތައް ގެނައުމަށްފަހު، އިންސްޓިޓިއުޓް އޮފް ޗަރޓަރޑް އެކައުންޓެންސްގެ ފަރާތުން ފުރަތަމަ ފަހަރަށް މި ދޫކުރި ލައިސަންސްތަކަކީ އެކަމަށް ފުރުޞަތު ހުޅުވާލުމުން އެދެނު ފަރާތްތަކުގެ ތެރެއިން ލައިސަންސް ހޯދުމުގެ ހުރިހާ ކަމެއް ފުރިހަމަ ކުރި ފަރާތްތަކެވެ. ކުރިއާ އަޅާ ބަލާއިރު ލައިސަންސް ދޫކުރުމަށް ގެނެސްފައިވާ އެންމެ މުހިންމު އެއް ބަދަލަކީ ކެޓަގަރައިޒޭޝަން (ފަންތިކުރުން) އުވާލުމެވެ. ސީއޭ މޯލްޑިވްސް އިން ވިދާޅުވެފައިވަނީ މި ގެނެވެނު ބަދަލުތަކަކީ ވަރަށް ގިނަ މަޝްވަރާތަކަށްފަހު ގެނެވުނު އިސްލާހުތަކެއް ކަމަށާއި، މިގޮތަށް އޮޑިޓް ލައިސަންސް ދޫކުރުމަށްފަހު، ދެން އެންމެ މުހިންމު ކަމެއްދޭނީ އޮޑިޓް ލައިސަންސް ލިބޭފަރާތްތަކުން ކުރާ މަސައްކަތުގެ ފެންވަރު ވަޒަންކުރުމާއި، އެފަރާތްތަކުގެ މަސައްކަތްތަކަކީ އޭގެ މައްޗަށް ބަރޯސާ ވެވޭފަދަ އިތުބާރުހުރި ފެންވަރު ރަނގަޅު މަސައްކަތަކަށް ހެދުމަށްޓަކައި މަސައްކަތުގެ ފެންވަރު ވަޒަންކުރުމާއި، އެފަދަ ތަމްރީނުތައް ފޯރުކޮށް ދިނުމެވެ.

އޮޑިޓްލައިސަންސް ދިނުމުގެ ގަވާޢިދަށް ގެނެވުނު އިސްލާހުގެ ދަށުން ސީއޭ މޯލްޑިވްސް އިން އަލަށް ލައިސަންސް ދޫކުރަން ފެށުމުން މީގެ ކުރިން އޮޑިޓަރ ޖެނެރަލްގެ އޮފީހުން ދޫކޮށްފައިވާ ލައިސަންސްތައް 8 މާރޗް 2021ންް ފެށިގެން ބާތިލްވާނެއެވެ. އެހެންކަމުން މިހާރު އޮޑިޓް ލައިސަންސް އާނުކުރައްވާ ބޭފުޅުން ލައިސަންސް އާކުރުމުގެ ކަންތައްތައް އަވަހަށް ނިންމެވުމަށް ސީއޭ މޯލްޑިވްސް އިން ވަނީ އިލްތިމާސް ކޮށްފައެވެ.