ކޮވެކްސް ފެސިލިޓީން ރާއްޖެއަށް ހަދިޔާކުރާ ވެކްސިންގެ ފުރަތަމަ ޝިޕްމަންޓު ގެނެސްފި

ކޮވެކްސް ފެސިލިޓީން ރާއްޖެއަށް ހަދިޔާކުރާ ވެކްސިންގެ ފުރަތަމަ ޝިޕްމަންޓު އާދިއްތަ ދުވަހު ރާއްޖެ ގެނެސްފިއެވެ.

އެކަމާ ގުޅޭގޮތުން ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ކުރެއްވި ޓްވީޓެއްގައި ވިދާޅުވީ، ކޮވެކްސް ފެސިލިޓީގެ ދަށުން ރާއްޖެއަށް ފޯރުކޮށްދޭ 12000 ވެކްސިން ޑޯޒް އާދިއްތަ ދުވަހު ރާއްޖެއަށް ލިބިފައިވާ ކަމަށެވެ. އެގޮތުން ރާއްޖެ ގެނެސްފައިވަނީ ކޮވިޝީލްޑް ވެކްސިންކަން ރައީސް ފާހަގަ ކުރައްވާފައިވެއެވެ.

ރައީސް ސޯލިޙު ވަނީ ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) ގެ އިތުުރުން، ޔުނިސެފާއި، މި ނޫނަސް މިކަމުގައި އެހީތެރިވި ފަރާތްތަކަށް ޝުކުރު އަދާ ކުރައްވާފައެވެ.

ކޮވެކްސް ފެސިލިޓީއަކީ ޑަބްލިޔުއެޗްއޯއާއި ބައިނަލްއަގްވާމީ އިތުރު ދެ ގްރޫޕަކާއި ގުޅިގެން އުފައްދާފައިވާ ފެސިލިޓީއެކެވެ. މިފެސިލިޓީގައި ދެން ހިމެނެނީ ގަވީ ވެކްސިން އެލައަންސާއި ކޯލިޝަން ފޮރ އެޕިޑެމިކް ޕްރިޕެއަރޑްނަސް އިނޮވޭޝަންސް (ސީއީޕީއައި)އެވެ. އެގޮތުން ރާއްޖެއަށް ވެކްސިން ގެނެސްފައިވަނީ ކޮވެކްސް ގައި ހިމެނޭ ގަވީ ވެކްސިން އެލައަންސާ ގުޅިގެންނެވެ.

ކޮވެކްސް ފެސިލިޓީގެ ދަށުން މިއަހަރު ނިމެންވާއިރު އެންމެ މަދުން އާމްދަނީ ލިބޭ ގައުމުތަކުގެ ތެރެއިން 92 ގައުމަކަށް 1.3 ބިލިއަން ވެކްސިން ޑޯޒް ފޯރުކޮށްދޭނެއެވެ.

ކޮވެކްސް ފެސިލިޓީގެ ދަށުން ދެ ބިލިއަން ޑޯޒް 190 ގައުމަކަށް މިއަހަރު ތެރޭގައި ފޯރުކޮށްދިނުމަކީ އަމާޒެކެވެ. އެއީ ދުނިޔޭގެ އާބާދީގެ 20 އިންސައްތަ މީހުންނަށް އެންމެ މަދުވެގެން މިއަހަރު ނިމެންވާއިރަށް ވެކްސިން ޖެހުމަށް ކުރަމުންދާ މަސައްކަތުގެ ތެރެއިންނެވެ. އެއަށްވުރެ މުހިން ކަމެއް ދީގެން މިއަހަރު ތެރޭގައި އެންމެ މަދުން އާމްދަނީ ލިބޭ 92 ގައުމުކަށް އެއްވެސް އަގަކާ ނުލާ ވެކްސިން ފޯރުކޮށްދިނުމަކީ ކުރަމުން އަންނަ ކަމެކެވެ.

މުއްސަނދި ގައުމުތަކާއި މެދުމިނުގައި އާމްދަނީ ލިބޭ ގައުމުތަކަށްވެސް މިފެސިލިޓީގެ ދަށުން ވެކްސިން ލިބޭނެއެވެ. އެހެންނަމަވެސް އެގައުމުތަކުން ޖެހޭނީ ވަކި މިންވަރެއްގެ ފައިސާ ފެސިލިޓީއަށް ދައްކާށެވެ. އެއީ އެފައިސާއިން ފަގީރު ގައުމުތަކަށް ވެކްސިން ފޯރުކޮށްދިނުމަށް ޚަރަދުކުރުމުގެ ގޮތުންނެވެ.