ކޮވިޑް-19ގެ ވެކްސިނުން ބައްޔަށް ޕޮޒިޓިވްނުވާނެ ކަމަށާއި، ވެކްސިން ޖެހުމަށްފަހު ޕޮޒިޓިވްވަނީ ކުރިން ބައްޔަށް ހުށަހެޅިފައިވާތީ ކަަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ބުރާސްފަތި ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ ވެކްސިނުން ބައްޔަށް ޕޮޒިޓިވް ނުވާނެ ކަމަށެވެ. ނަމަވެސް ބައެއް މީހުން ވެކްސިން ޖެހުމަށްފަހު އެކްޓިވް ސަރވައެލެންސް ސާމްޕަލްގެ އިތުރުން ކޮންޓެކްޓް ސާމްޕަލް ނަގަން ވެސް ދެކޮޅު ހަދަމުންދާ ކަމަށް ޑރ. ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ މާލެ ސިޓީގައި މިހާ ބޮޑަށް ބަލި ފެތުރެމުންދާއިރު، ވެކްސިން ޖެހުމުގެ ކުރިން ނުވަތަ ވެކްސިންގެ އަސަރުކުރުމުގެ ކުރިން ބައްޔަށް ހުށަހެޅިފައިވާ މީހަކު ޕޮޒިޓިވްވެދާނެ ކަމަށެވެ. އަދި އެ ފުރުސަތު ބޮޑު ކަމަށް ޑރ. ނަޒްލާ ވިދާޅުވިއެވެ.
ވެކްސިންގެ ސަބަބުން ޕީސީއާރް ޓެސްޓު ޕޮޒިޓިވްއެއް ނުވާނެ. ނަމަވެސް ވެކްސިން ޖަހާފައި ހުއްޓާ މީހަކު ބައްޔަށް ޕޮޒިޓިވްވެދާނެ އޭނާ ބައްޔަށް ކުރިން އެކްސްޕޯސް ވެފައިހުރީމަ. ނޫނީ ވެކްސިންގެ އިފެކްޓް އަންނަން އޭގެ ސަބަބުން ލިބޭ ދިފާއީ ބާރު އަންނަން އެނަގާ މުއްދަތުގެ ތެރޭގައި ބައްޔަށް އެކްސްޕޯސް ވެއްޖެއްޔާ އެ ގޮތަށް ވެދާނެ ކަމަށް. ތަފާތެއް އުޅޭ ކަމަށް. ވެކްސިން ޖެހުމުން މީހާ ބައްޔަށް ޕޮޒިޓިވް ނުވާނެ. އެކަމަކު މިހާ ބޮޑަށް ބަލި އުޅޭއިރުގަ ވެކްސިން ޖަހައިގެން ތިބޭ މީހުން ބައްޔަށް ޕޮޒިޓިވްވެދާނެ. އެއީ ބައްޔަށް އެމީހުން އެކްސްޕޯސް ވެފައި ހުރީމަ.އެޗްއީއޯސީގެ ތަރުޖަމާނު ޑރ. ނަޒްލާ ރަފީގު
މީގެ އިތުރުން ވެކްސިންއާ ގުޅިގެން ތަފާތު ވާހަކަތައް ދައުރުވަމުންދާއިރު، ވެކްސިންގެ ސައިޑް އިފެކްޓްއާ ބެހޭ ގޮތުން ޞައްޙަ މައުލޫމާތު ފޯރުކޮށްދިނުމަށް ޑރ. ނަޒްލާ ވަނީ އިލްތިމާސްކޮށްފައެވެ.
އެގޮތުން ކޮވިޑް-19ގެ އެކި ވެކްސިންތައް އެކި ގައުމުތަކުގައި މިހާރު ބޭނުން ކުރަމުންދާއިރު، އެކި ވެކްސިނުން ފެންނަމުންދާނީ ތަފާތު ސައިޑް އިފެކްޓްތައް ކަމަށެވެ. ރާއްޖޭގައި ޖަހަމުންދަނީ ކޮވިޝީލްޑްގެ ވެކްސިން ކަމަށްވާއިރު، އެހެން ވެކްސިންތަކުން ފެންނަ ސައިޑް އިފެކްޓްތަކުގެ މައުލޫމާތު ހިއްސާކުރުމުގައި އިތުރަށް ސަމާލުވާން ޖެހޭ ކަމަށް ޑރ. ނަޒްލާ ވިދާޅުވިއެވެ.
