raajjemv logo
މެކެނީގެ އެއްބަސްވުން ދާއިމީކުރުން
މެކެނީގެ އެއްބަސްވުން ޔުވެންޓަސްއިން ދާއިމީކޮށްފި
 
2025 ގެ ޖޫން މަހުގެ ނިޔަލަށް ވަނީ އެއްބަސްވުން ހަދާފައި
 
އެއްބަސްވުން ދާއިމީކުރުމަށް 18.5 މިލިޔަން ޔޫރޯ ދައްކަންޖެހޭ
އިސްމާޢީލް ޝާހް
1,507
ކ. މާލެ |
3 މާރޗް 2021 | ބުދަ 18:59
ޔުވެންޓަސްއަށް ކުޅެމުން އަންނަ އެމެރިކާގެ ޒުވާން މިޑްފީލްޑަރު ވެސްޓަން މެކެނީ
ގެޓީ އިމޭޖާސް

ޝާލްކާގެ ލޯނު އެއްބަސްވުމެއްގެ ދަށުން ކުޅެމުން އައި އެމެރިކާގެ ޒުވާން މިޑްފީލްޑަރު ވެސްޓަން މެކެނީގެ އެއްބަސްވުން ޔުވެންޓަސްއިން ދާއިމީކޮށްފިއެވެ.

މިދިޔަ އަހަރުގެ ހޫނު މޫސުމުގައި އުމުރުން 22 އަހަރުގެ މެކެނީ ޔުވެންޓަސްއަށް ބަދަލުވީ ޝާލްކާގެ އެއް އަހަރުގެ ލޯނު އެއްބަސްވުމެއްގެ ދަށުންނެވެ. އެކަމަކު އެ އެއްބަސްވުމުގެ ދަށުން 18.5 މިލިޔަން ޔޫރޯ ދެއްކުމަށްފަހު މެކެނީގެ އެއްބަސްވުން ދާއިމީކުރުމުގެ ފުރުސަތު ޔުވެންޓަސްއަށް އޮތެވެ. އެއާއެކު ބުދަ ދުވަހު އެ ކުލަބުން ވަނީ މެކެނީގެ އެއްބަސްވުން ދާއިމީކުރިކަން ހާމަކޮށްފައެވެ. އަދި 2025 ވަނަ އަހަރުގެ ޖޫން މަހުގެ ނިޔަލަށް ޔުވެންޓަސްއާއެކު މެކެނީ އެއްބަސްވުން ހަދާފައިވާކަންވެސް އެ ކުލަބުން ވަނީ ހާމަކޮށްފައެވެ.

ޔުވެންޓަސްއިން މެކެނީގެ އެއްބަސްވުން ދާއިމީކުރިއިރު، އޭނާ އަންނަނީ ޔުވެންޓަސްގެ ޖާޒީގައި މޮޅު ކުޅުމެއް ދައްކަމުންނެވެ. އެގޮތުން މިހާތަނަށް ޔުވެންޓަސްއަށް ކުޅެދިން 31 މެޗުގައި ފަސް ލަނޑު ޖަހާފައެވެ. އޭގެ ތެރޭގައި ޔުއެފާ ޗެމްޕިއަންސް ލީގުގައި ބާސެލޯނާއާ ދެކޮޅަށް ޖެހި ލަނޑު ފާހަގަކޮށްލެވެއެވެ. އަދި މި މުއްދަތުގައި މެކެނީ ވަނީ ޔުވެންޓަސްއާއެކު އިޓާލިއަން ސުޕަ ކަޕް ކާމިޔާބުކޮށްފައެވެ.

މީގެ ކުރިން ޝާލްކާއަށް ކުޅުނު މެކެނީ، ޝާލްކާގެ ސީނިއާ ޓީމުން ކެރިއަރު ފަށާފައިވަނީ 2017 ވަނަ އަހަރުއެވެ. އަދި އޭނާ ވަނީ އެ ޓީމުގައި ހޭދަކުރި ހަތަރު ސީޒަނުގައި 91 މެޗު ކުޅެދީ ފަސް ލަނޑު ކާމިޔާބުކޮށްފައެވެ. އަދި އެމެރިކާގެ ގައުމީ ފުޓްބޯޅަ ޓީމަށް މިހާތަނަށް 21 މެޗު ކުޅެދީފައިވާ މެކެނީ ވަނީ ގައުމީ ފުޓްބޯޅަ ޓީމުގެ ޖާޒީގައި ހަ ލަނޑު ކާމިޔާބުކޮށްފައެވެ. އަދި އެމެރިކާގެ ގައުމީ ފުޓްބޯޅަ ޓީމާއެކު މިދިޔަ އަހަރުގެ ކޮންކާކަފް ގޯލްޑް ކަޕުގެ ފައިނަލުގައި ވާދަކުރުމުގެ އިތުރަށް، މެކެނީ ވަނީ މިދިޔަ އަހަރުގެ އެމެރިކާގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ.

އެންމެ ފަހުން އަޕްޑޭޓް ކުރީ: 1 މަސްކުރި
ރިވިއު ކުރީ: ހުސައިން ފަރިޔާޒް
0%
އަންތަރީސް ވެއްޖެ
100%
އުފާ ވެއްޖެ
0%
ދެރަ ވެއްޖެ
0%
ރުޅި ގަދަ ވެއްޖެ
0%
މޮޔަވެއްޖެ
0%
ލިޔުން ރަނގަޅު
ކޮމެންޓް