ލޯނުތައް އަނބުރާ ދެއްކުމަށް 170.3 މިލިއަން ރުފިޔާ ޚަރަދުކޮށްފި!
މި މުއްދަތުގައި ސަރުކާރުން ހަރަދުކޮށްފައި ވަނީ 3,543.4 މިލިއަން ރުފިޔާ
ފިނޭންސް މިނިސްޓްރީ
ސަރުކާރުން ނަގާފައިވާ ލޯނުތައް އަނބުރާ ދެއްކުމަށް ފެބްރުއަރީ 25ގެ ނިޔަލަށް 170.3 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ.
ފިނޭންސްގެ ތަފާސްހިސާބުތައް ދައްކާގޮތުން ފާއިތުވި އަހަރުގެ މިމުއްދަތުގެ ތެރޭގައި ލޯނުތައް ދެއްކުމަށް ސަރުކާރުން ހަރަދުކޮށްފައި ވަނީ 126.2 މިލިއަން ރުފިޔާއެވެ.
މީގެ އިތުރުން ސޮވެރިން ޑިވެލޮޕްމެންޓް ފަންޑަށް 23 މިލިއަން ރުފިޔާ ވަނީ ޓްރާންސްފަރ ކޮށްފައެވެ. އަދި ޕީއެސްއައިޕީ މަޝްރޫއުތަކަށް 366.7 މިލިއަން ރުފިޔާ ވަނީ ހޭދަކޮށްފައެވެ.
ފިނޭންސް މިނިސްޓްރީގެ ތަފާސް ހިސާބުތައް ދައްކާގޮތުން ފެބްރުއަރީ 25ގެ ނިޔަލަށް ސަރުކާރުން ވަނީ 3,543.4 މިލިއަން ރުފިޔާ ހަރަދުކޮށްފައެވެ. ފާއިތުވި މި މުއްދަތުގައި ސަރުކާރުން ހަރަދުކޮށްފައި ވަނީ 4,072.2 މިލިއަން ރުފިޔާއެވެ.
ފިނޭންސްގެ ތަފާސްހިސާބުތައް ދައްކާ ގޮތުން ދައުލަތުން ރިކަރަންޓް އެކްސްޕެންޑިޗަރގެ ގޮތުގައި 2,869 މިލިއަން ރުފިޔާ ފާއިތުވި އަހަރު ޚަރަދުކުރިއިރު، މިއަހަރުގެ މި މުއްދަތުގައި ހަރަދުކޮށްފައި ވަނީ 2,540 މިލިއަން ރުފިޔާއެވެ.
އެގޮތުން މުސާރަ އާއި އިނާޔަތްތައް ދިނުމަށް 642.3 މިލިއަން ރުފިޔާ ހަރަދުކޮށްފައިވާ އިރު، މުވައްޒަފުންނަށް އެލަވަންސްދިނުމަށް ހަރަދުކޮށްފައި ވަނީ 521.3 މިލިއަން ރުފިޔާއެވެ. ޕެންޝަނަށް 191 މިލިއަން ރުފިޔާ ހަރަދު ކޮށްފައިވާ އިރު، ރިޓަޔަމެންޓް ބެނެފިޓްގެ ގޮތުގައި 77.6 މިލިއަން ރުފިޔާ ހަރަދު ކޮށްފައިވެއެވެ. އެޑްމިނިސްޓްރޭޓިވް އަދި އޮޕަރޭޝަނަލް އެކްސްޕެންސްގެ ގޮތުގައި 1,104.8 މިލިއަން ރުފިޔާ ވަނީ ހަރަދު ކޮށްފައެވެ.
މީގެ އިތުރުން، ކެޕިޓަލް އެކްސްޕެންޑިޗަރގެ ގޮތުގައި 832.7 މިލިއަން ރުފިޔާ މި މުއްދަތުގައި ހޭދަ ކޮށްފައިވާ އިރު، ފާއިތުވި އަހަރުގެ މި މުއްދަތުގައި ހޭދަކޮށްފައި ވަނީ 1,076.8 މިލިއަން ރުފިޔާއެވެ.
ފިނޭންސްގެ ތަފާސްހިސާބުތައް ދައްކާގޮތުން ކެޕިޓަލް އިކުއިޕްމަންޓަށް 30.1 މިލިއަން ރުފިޔާ ހަރަދުކޮށްފައިވާ އިރު، އިންފްރާސްޓްރަކްޗަރ އެސެޓްސްއަށް ހަރަދުކޮށްފައި ވަނީ 362.5 މިލިއަން ރުފިޔާއެވެ. އަދި ޑިވެލޮޕްމެންޓް ޕްރޮޖެކްޓްސް އާއި އިންވެސްޓްމެންޓް އައުޓްލޭސްއަށް 440 މިލިއަން ރުފިޔާ ހަރަދުކޮށްފައިވެއެވެ.
މި އަހަރުގެ މިހާތަނަށް ދައުލަތަށް އާމްދަނީގެ ގޮތުގައި 2,857.8 މިލިއަން ރުފިޔާ ލިބިފައިވާއިރު، އެއީ ޓެކުހުގެ ގޮތުގައި ލިބުނު 2,478.7 މިލިއަން ރުފިޔާ އާއި ނޮން ޓެކްސް ރެވެނިއުގެ ގޮތުގައި ލިބުނު 375.4 މިލިއަން ރުފިޔާގެ އިތުރުން ކެޕިޓަލް ރިސީޕްޓްސްގެ ގޮތުގައި ލިބުނު 1.2 މިލިއަން ރުފިޔާ އަދި ގްރާންޓްސްގެ ގޮތުގައި ލިބުނު 3.1 މިލިއަން ރުފިޔާއެވެ.
