އުންމީދަކީ ރޭސް ޖެހޭ ގޮތަށް ގުޅީފަޅު މަގުތައް ތަރައްޤީކުރުން: މަޚްލޫފް
2 މާރިޗު 2021 | އަންގާރަ 07:45ގުޅިފަޅުގެ މަގުތައް ތަރައްޤީކުރާނީ ޓްރެކުގެ ކަންތައް ހިމެނޭ ގޮތަށް
ކުޅިވަރާ ބެހޭ ވަޒީރު އަޙްމަދު މަޚްލޫފް
ގުޅީފަޅުގައި މަގުތައް ތަރައްޤީކުރެވިގެން އަންނައިރު، ރޭސް ޖެހޭ ގޮތަށް އެތަނުގެ މަގުތައް ހެދިގެން ދިއުމަކީ އުންމީދެއް ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.
މަޚްލޫފް މިހެން ވިދާޅުވީ މޮޓޯޖީޕީ ވޯލްޑް ޗެމްޕިއަންޝިޕް ތިން ފަހަރު ހޯދާފައިވާ މަޝްހޫރު މޮޓޯސައިކަލް ރޭސް ޖެހުންތެރިޔާ ޖޯޖް ލޮރެންޒޯ ރާއްޖެ އައުމުން، އޭނާއަށް މަރުޙަބާ ކިޔަން ވެލާނާ އިންޓަނޭޝަނަލް އެއާޕޯޓުގައި ބޭއްވި އިވެންޓުގެ ތެރެއިން މީޑިއާއަށް ދެއްވި އިންޓަވިއުއެއްގައެވެ.
މި އިންޓަވިއުގައި މަޚްލޫފް ވިދާޅުވީ ރޭސް ޖަހަން ވަކިން ހާއްސަކޮށް ޓްރެކެއް ރާއްޖޭގައި ހެދުމަކީ މި ވަގުތަށް ބަލާއިރު ވާނެ ކަމެއް ނޫން ކަމަށާއި، ރާއްޖެއަކީ އެހާ މުއްސަނދި ޤައުމެއް ނޫން ކަމަށެވެ. އެކަމަކު ގުޅީފަޅުގެ މަގުތައް ހަދަން މަސައްކަތްކުރަނީ ރޭސް ޖެހޭ ގޮތަށް ކަމަށާއި، އެގޮތުން އެތަނުގައި ރޭސް ޖެހޭނެ ގޮތަކަށް ކަންކަން ފަހިކޮށްދިނުމަށް ވަޒީރުންގެ މަޖިލީހުގެ ބައްދަލުވުމެއްގައި ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙުގެ އިތުރުން ޕްލޭނިންގ މިނިސްޓަރު މުޙައްމަދު އަސްލަމާވެސް ވާހަކަދައްކާފައިވާ ކަމަށްވެސް ވިދާޅުވިއެވެ.
ވަޒީރު ވިދާޅުވީ އިތުރަށް ވިދާޅުވީ މިހާރުވެސް ހުޅުމާލޭގެ ދެވަނަ ފިޔަވަހީގައި ރޭސް ޖެހުމަށް ޖާގައެއް ހެދުމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އާއި ރޭސިންގ އެސޯސިއޭޝަންތަކާއެކުގައި މަސައްކަތްކުރަމުން އަންނަ ކަމަށެވެ. އަދި ސްރީ ލަންކާގެ ވަރަށް ވަރުގަދަ ރޭސް ޖަހާ މީހަކާ އެކީ ރާއްޖޭގައި ކާރު ރޭހެއް ބޭއްވުމުގެ ވާހަކަތަކެއް އެ ގައުމުގެ ކުޅިވަރާ ބެހޭ ވަޒީރު ނަމާލް ރާޖަޕަޖްސާއާ އެކީގައި ދެކެވިފައިވާ ކަމަށްވެސް ވަނީ ވިދާޅުވެފައެވެ.
މިހާތަނަށް ރާއްޖޭގައި ރޭސް ޖެހުމަށް ހާއްސަ ޓްރެކެއް ގާއިމުކުރެވިފައި ނުވާއިރު، މިހާތަނަށް ޒުވާނުން ރޭސް ޖެހަމުން އަންނަނީ ހުޅުމާލޭގައެވެ. އެގޮތުން އެންމެ ފުރަތަމަ ހުޅުމާލޭގެ ފުރަތަމަ ފިޔަވަހީގައި ރޭސް ޖެހިއިރު، މިހާރު އަންނަނީ ހުޅުމާލޭގެ ދެވަނަ ފިޔަވަހީގައި ރޭސް ޖަހަމުންނެވެ. އެކަމަކު ރޭސް ޖެހުމަށް ރަނގަޅު ވަސީލަތްތަކެއް ނެތުމަކީ ރޭސިންގ އެސޯސިއޭޝަންތަކުގެ ވަރަށް ބޮޑު ކަންބޮޑުވުމެކެވެ.
