ކަޝްމީރު މައްސަލައިގައި ސައުދީން ހަމަހަމަ ނިންމުމެއް!
ޕާކިސްތާނުން ވަނީ ސައުދީގެ ނިންމުން ބަދަލުކުރުމަށް އެގައުމުގެ ކިބައިން އެދިފައި
އިންޑިއާ - ޕާކިސްތާން، ކަޝްމީރުގެ މައްސަލައިގައި ސައުދީން ގޮތެއް ނިންމީ އިންޑިއާ އަދި ޕާކިސްތާނުގެ އިސްވެރިންނާ މަޝްވަރާ ކުރުމަށްފަހު
ކަޝްމީރު މައްސަލައިގައި ސައުދި އަރަބިއްޔާއިން ވަކި ކޮޅަކަށް ބުރަ ނުވާން ނިންމައިފިއެވެ.
ކަޝްމީރު މައްސަލައިގައި ސައުދީން ވަކި ކޮޅަކަށް ބުރަ ނުވާނެ ކަމަށް ބުނެފައިވަނީ ޕާކިސްތާނުގެ އިސްވެރިންނާއި އިންޑިއާގެ ބޮޑު ވަޒީރާއި ސައުދީ ސަރުކާރުން މަޝްވަރާ ކުރެއްވުމަށްފަހުއެވެ.
ރިޕޯޓްތައް ބުނާ ގޮތުން ސައުދީން ވަނީ ކަޝްމީރު މައްސަލައިގައި، ވަކި ކޮޅަކަށް ބުރަ ނުވާން ނިންމާފައިވާކަން އިންޑިއާ އަދި ޕާކިސްތާނަށް އަންގާފައެވެ. އެހެން ނަމަވެސް ޕާކިސްތާނުން ވަނީ ސައުދީގެ ނިންމުން ބަދަލުކުރުމަށް އެގައުމުގެ ކިބައިން އެދިފައެވެ.
ޕާކިސްތާނުގެ އޮފިޝަލަކު ބުނީ މުސްލިމު ގައުމަކުން މުސްލިމުންނާއި ދެކޮޅަށް ނިންމުމެއް ނިންމުމަކީ ބަލައިގަނެވޭނެ ކަމެއް ނޫން ކަމަށާއި، ސައުދީގެ މި ނިންމުމުގެ ސަބަބުން ޕާކިސްތާނާއި ސައުދީއާ ދެމެދު އޮންނަ ގުޅުމަށް ބުރޫ އަރާނެ ކަމަށް ގަބޫލުކުރާ ކަމަށެވެ.
ސައުދީގެ މި ނިންމުމަށް އިންޑިއާއިން މަރުހަބާ ކިޔާފައިވާއިރު، އިންޑިއާއިން ބުނީ ސައުދީގެ ނިންމުމުން އެނގިގެންދަނީ ކަޝްމީރު މައްސަލައިގައި ދުނިޔޭގެ ގައުމުތަކުން އިންޑިއާ ކޮޅަށް ބުރަވާ މަންޒަރު ކަމަށެވެ. އަދި ޕާކިސްތާނު ސަރުކާރުން ކަޝްމީރުގެ ޕާކިސްތާނާވީ ފަޅީގައި ލާއިންސާނީ އަމަލު ހިންގަމުން އަންނަ ކަމަށް އިންޑިއާއިން ވަނީ ތުހުމަތު ކޮށްފައެވެ.
ކަޝްމީރުގެ މައްސަލައަކީ ޒަމާނުއްސުރެ މި ދެގައުމުގެ މެދުގައި ބޮޑުވެފައިވާ މައްސަލައެކެވެ.
