މަލީޙް ފަހު ވަގުތުވެސް އިތުރު ފުރުސަތަކަށް އެދުނުނަމަ އެފުރުސަތު ދިނީމުސް- އާޒިމް
2 މާރިޗު 2021 | އަންގާރަ 02:09ޕީޖީއިން މަޖިލީހަށް ހުށަނާޅާ ލަސްކުރީ މަލީހަށް މަޤާމުގެ މަސްޢޫލިއްޔަތު އަދާކުރުމަށް ފުރުސަތު ދިނުމަށްކަމަށް އާޒިމް ވިދާޅުވި
އަލީ އާޒިމް
މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީގެ މަޤާމުގައި ހުންނެވި މުހައްމަދު މަލީހުގެ ޖަމާލު ޖަވާބުދާރީވުމަށް މަޖިލީހުން ފުރުސަތު އެރުވުމުން މަޤާމުގެ މަސްޢޫލިއްޔަތު އަދާކުރެއްވުމަށް އިތުރު ފުރުސަތަކަށް އެދިވަޑައިގަތް ނަމަ އެފުރުސަތު ދޭން އެމްޑީޕީއިން ތިބީ ތައްޔާރަށްކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އެމްޑީޕީގެ ޕީޖީ ލީޑަރ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން، މަލީހުގެ މައްސަލަ މަޖިލީހަށް ހުށަހެޅުއްވި އެމްޑީޕީގެ ޕީޖީ ލީޑަރ އަލީ އާޒިމް ވަނީ މަލީހު ވަކިކުރުމަށް އެމްޑީޕީއިން މަސައްކަތްކޮށްފައިވަނީ ވަރަށް ޑިމޮކްރެޓިކް ގޮތެއްގައިކަމަށެވެ. އެގޮތުން މި މައްސަލަ މެމްބަރ މީކާއިލް އެމްޑީޕީ ޕީޖީއަށް ހުށަހެޅުއްވިތާ ދެ މަސްދުވަހުގެ ވަގުތެއް ދިނީ ވެސް މަލީހުއަށް އެ މަނިކުފާނުގެ މަޤާމުގެ މަސްޢޫލިއްޔަތު އަދާކުރުމަށް ފުރުސަތު ދިނުމަށްކަމަށް ވިދާޅުވިއެވެ. އެމްޑީޕީގެ ޕީޖީ ގްރޫޕްއަކީ ކޯލިޝަންއަކުން އުފައްދާފައިވާ ސަރުކާރު ޒިންމާދާރުކުރުމަށް ވަކި ޕާޓީއަކަށް ބެލުމެއްނެތި މަސައްކަތްކުރާ ޕާޓީއެއްކަމަށް މެމްބަރ އާޒިމް ވިދާޅުވިއެވެ. އެގޮތުން މަލީޙުގެ އިތުބާރުނެތްކަމަށް އެމްޑީޕީގެ ޕާލިމެންޓްރީ ގްރޫޕްގެ މެދުގައި އެއްވެސް ޚިޔާލުތަފާތުވުންތަކެއް ނެތަސް، އެންމެ ފަހު ވަގުތުވެސް ޕީޖީ ގްރޫޕުން ބައްދަލުވުމެއް ބާއްވާ މަޝްވަރާތައް ކުރެއްވިކަމަށެވެ. މި ބައްދަލުވުމުގައި މަލީޙް ޖަވާބުދާރީވުމަށް ފުރުސަތު ދެއްވުމުން އެމަނިކުފާނުގެ މަސައްކަތްތައް ފުރިހަމަކުރުމަށް އިތުރު ފުރުސަތެއް ދިނުމަށް އެދިއްޖެނަމަ އެ ފުރުސަތު ދިނުމަށް ނިންމެވިކަމަށާއި، އެގޮތަށް އަމަލުކުރެއްވިނަމަ އެ ފުރުސަތު އެރުވީސްކަމަށް އެމްޑީޕީގެ ޕީޖީ ލީޑަރު ވިދަޅުވިއެވެ.
މަލީޙްގެ އިތުބާރު ނެތްކަމުގެ މައްސަލައިގެ ބަހުސް ދެ ގަޑިއިރަށް ކުރިއަށް ގެންދިޔައެވެ. އަދި މި ދެ ގަޑިއިރުގެ ތެރޭގައި މިނިސްޓަރަށް ޖަވާބުދާރީވުމަށް 30 މިނެޓް ފުރުސަތެއް ލިބިވަޑައިގެންނެވިއެވެ. މި 30 މިނެޓް ބަހާލާފައިވަނީ ތިން ފަހަރެއްގެ މަތިން 10 މިނެޓްވަންދެން ވާހަކަދެއްކެވޭ ގޮތަށެވެ. އެހެންނަމަވެސް، މި ފުރުސަތުތަކުގައި ވެސް މަލީޙްގެ ކިބައިން ފެނިގެން ދިޔައީ އެމްޑީޕީއާއި، ރައްޔިތުންގެ މަޖިލީހުގެ ރައީސްއަށް ބަހުގެ ހަމަލާތަކެއް ރައްދުކުރެއްވުމަށްފަހު 10 މިނެޓްގެ ވަގުތު ހަމަނުވަނީސް އިށީންދެވަޑައިގެންނެވިތަނެވެ. ޖަވާބުދާރީވުމަށް ލިބިވަޑައިގެންނެވި ފުރުސަތުގައި ވާހަކަދައްކަވަމުން މިނިސްޓަރ މަލީހު ވަނީ ތަކުރާރުކޮށް މިއީ އަސާސެއް ނެތް ކަމެއްކަމަށް ވިދާޅުވެފައެވެ. އެހެންނަމަވެސް، މަސައްކަތުގެ މަސްޢޫލިއްޔަތާއި ގުޅޭގޮތުން މަލީޙް ޖަވާބުދާރީވެފައެއް ނުވެއެވެ.
