ކޮވިޑްގެ ޙާލަތު ގޯސްވެ ޖަމާޢަތުގައި ގައިދުރުކަމާއެކު ނަމާދުކުރުން ކުރިއަށްގެންދިޔުމަށް އަންގައިފިއެވެ.

މާލޭގައި ކޮވިޑް-19ގެ ހާލަތު ގޯސްވެ މި ސަރަހައްދުގައި ޖަމާޢަތުގައި ނަމާދުކުރުން މެދުކަނޑާލަންޖެހޭ ޙާލަތަށް ގޮސްފައިވާކަމަށް އިސްލާމިކް މިނިސްޓްރީން ވަނީ ބުނެފައެވެ. އެގޮތުން ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދިއުމާއި، ޙާލަތު އިތުރަށް ގޯސްވަމުންދާކަމަށް ކަމާބެހޭ އިދާރާތަކުން މަޢުލޫމާތު ދެއްވާފައިވާތީ، ފަތުވާ މަޖިލީހާއި ދީނީ ޢިލްމުވެރިންނާ މަޝްވަރާކޮށް، މިހާރުގެ ޙާލަތަށް ރިޢާޔަތްކޮށް، ރައްކާތެރިކަމުގެ ފިޔަވަޅެއްގެ ގޮތުން، 01 މާރޗް 2021 ވާ ހޯމަ ދުވަހުގެ މެންދުރު ނަމާދުން ފެށިގެން ކޮވިޑްގެ މިޙާލަތުން ލުޔެއް ލިބެންދެން ގްރޭޓަރ މާލޭ ސަރަހައްދުގެ ހުރިހާ މިސްކިތެއްގައި ނަމާދުގެ ޖަމާޢަތް، ގައި ދުރުކަމާއެކު ކުރިއަށް ގެންދިއުމަށް އިސްލާމިކް މިނިސްޓްރީން ވަނީ އަންގާފައެވެ. މިގޮތަށް ނިންމާފައިވަނީ މިސްކިތުގެ ޖަމާޢަތް މެދުކަނޑާލައި މިސްކިތް ބަންދުކުރުމަކީ ރައްޔިތުންނަށް ލިބޭނެ ވަރަށް ބޮޑު ހިތްދަތިކަމަކަށްވުމާއި، މިޙާލަތުން އަރައިގަތުމަށް ކުރެވެން އޮތްކަމަކީ މިސްކިތް ބަންދު ކުރުމުގެ ބަދަލުގައި ގައިދުރުކަމާއިއެކު ނަމާދުގެ ޖަމާޢަތް، ހެދުން ކަމުގައި ފަތުވާ މަޖިލީހާއި ބައެއް ޢިލްމުވެރިން ލަފާދެއްވާފައިވާތީކަމަށް އިސްލާމިކް މިނިސްޓްރީން މައުލޫމާތުދެއެވެ. އަދި ޙާލަތު ރަނގަޅުވާން ފެށުމާއެކު ކުރިއެކޭ އެއްގޮތަށް ޖަމާޢަތުގައި ނަމާދު ޤާއިމު ކުރެވިގެންދާނެކަމަށްވެސް އެ މިނިސްޓްރީން ބުނެއެވެ.

އިސްލާމިކް މިނިސްޓްރީން ނެރުނު ބަޔާނުގައިވަނީ މިސްކިތުގައި ޖަމާޢަތުގައި ނަމާދުކުރުމުގައި ސަމާލުކަން ދޭންޖެހޭ ކަންތައްތައް ފާހަގަކޮށްފައެވެ. އެގޮތުން މިސްކިތްތަކުން ކާޕެޓް ނެގުމާއި، ކޮންމެ ނަމާދެއްގެ ކުރިން މިސްކިތުގައި މޮޕްލައި ސާފުކުރުމާއި، ސައބޯނި ލައިގެން އަތްދޮވެވޭނެ އިންތިޒާމު ޤާއިމުކުރުމަށް ސިޓީ ކައުންސިލުން ސަމާލުކަން ދިނުމަށް ވަނީ އަންގާފައެވެ. އަދި ކޮންމެހެން ބޭނުންކުރަންޖެހޭ ޙާލަތުގައި ނޫނީ އެއަރކޯން ބޭނުން ނުކުރުމާއި، އެއަރކޯން ބޭނުންކުރާނަމަ މިސްކިތުގެ ދޮރުތައް ދޭތެރެދޭތެރެއިން ހުޅުވާ ވައި ބަދަލުވާނެ ގޮތް ހެދުމަށްވެސްވަނީ އަންގާފައެވެ. ބަންގިއަށްފަހު 5 މިނިޓުތެރޭގައި ޤަމަތްދީ ނަމާދު ފެށުމަށާއި އެއްވެސް ނަމާދެއް 7 މިނިޓަށްވުރެ ދިގުނުކުރުމަށްވަނީ އަންގާފައެވެ. އަދި ހުރިހާ ނަމާދެއްގައިވެސް ސޫރަތުލް ފާތިޙާއަށްފަހު ޟުޙާ ސޫރަތުން ފެށިގެން ތިރީގެ ކުރު ސޫރަތްތައް ކިޔެވުމަށް މިސްކިތްތަކުގެ އިމާމުންނަށްވަނީ އިލްތިމާސްކޮށްފައެވެ.

މީގެއިތުރުން މިސްކިތްތަކަށް ނަމާދަށް ދާ މީހުން ސަމާލުކަންދޭންޖެހޭ ކަންކަންވެސް އިސްލާމިކް މިނިސްޓްރީންވަނީ އަންގާފައެވެ. އެގޮތުން ގެއިން ވުޟޫކޮށްގެން މިސްކިތަށް ދިޔުމާއި، އަމިއްލަ މުސައްލަ ބޭނުންކުރުމާއި، މިސްކިތުގައި މާސްކު އެޅުމާއި، މިސްކިތަށް ވަނުމާއި ނުކުތުމުގައްޔާއި، ނަމާދަށް ސަފު ހެދުމުގައި ގައިދުރުކަން ޤާއިމުކުރުމަށްވަނީ އިލްތިމާސްކޮށްފައެވެ. އަދި ފުއްޕާމޭގެ ބަލިތައް ހުންނަމީހުންނާއި ރޯގާގެ ޢަލާމަތްތައް ހުރި މީހުންނާއި ޢުމުރުން ދުވަސްވީ މީހުން ގޭގައި ނަމާދުކުރުމަށްވަނީ އިރުޝާދުދެއްވާފައެވެ. ހަމައެއާއެކު ނަމާދުކުރުމަށްފަހު މިސްކިތުގައި މަޑުނުކުރުމަށާއި މިސްކިތުގައި ހުންނަ ޚަތިމް ބޭނުން ނުކުރުމަށްވެސްވަނީ އިލްތިމާސްކޮށްފައެވެ. އަދި މިސްކިތާއި މިސްކިތުން ބޭރުގައިވެސް އަތާ އަތްޖޯޑުކޮށް ސަލާމްކުރުން ފަދަ ކަންކަމުން ދުރުހެލިވުމަށް ސަމާލުކަން ދިނުމަށްވެސް މިނިސްޓްރީންވަނީ އެދިފައެވެ.

ކޯވިޑް-19ގެ ކޭސްތައް މާލެ ސަރަޙައްދުގައި އިތުރުވުމާ ގުޅިގެން މިސްކިތްތަކުގައި ޖަމާއަތުގައި ނަމާދުކުރުން މިދިޔަ އަހަރު މެދުކަނޑާލިއެވެ. އެހެންނަމަވެސް ކޮވިޑްގެ ކޭސްތައް މަދުވުމާ ގުޅިގެން މިސްކިތްތައް އަލުން ހުޅުވާ ޖަމާޢަތުގައި ނަމާދުކުރަން ފެށިއެވެ. ކޮވިޑްގެ ކޭސްތައް ކަންބޮޑުވާ މިންވަރަށް އިތުރުވުމާ ގުޅިގެން ޢާއްމުކޮށް މީހުން އެއްވާ ހުރިހާ ތަންތަނެއް ބަންދުކުރުމަށް އެޗްޕީއޭއިންވަނީ ނިންމާފައެވެ. އަދި ސްކޫލްތަކުގައި ގްރޭޑް 8ން ދަށުގެ ހުރިހާ ގުރޭޑެއްގައި ކިޔެވުން އޮންލައިންކޮށް ކުރިއަށްގެންދަންވެސްވަނީ ނިންމާފައެވެ.