ޑިޖޮން ބަލިކޮށް ޕީއެސްޖީ ދެވަނައަށް

ފްރެންޗް ލީގުގައި ހޮނިހިރު ދުވަހުގެރޭ ފުލުގައި އޮތް ޑިޖޮން ބަލިކޮށް ތާވަލުގެ ދެވަނައަށް އެންމެ ފަހުގެ ޗެމްޕިއަން ޕީއެސްޖީ ޖެހިލައިފިއެވެ.

ރަށުން ބޭރުގައި ކުޅުނު މެޗުން ޕީއެސްޖީ މޮޅުވީ 4-0 ގެ ނަތީޖާއަކުންނެވެ.

ޕީއެސްޖީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. އެގޮތުން މެޗު ފަށައިގެން ހަވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އެވަޓަނުގެ ލޯނު އެއްބަސްވުމެއް ދަށުން ޕީއެސްޖީއަށް ކުޅެމުން އަންނަ މޮއިސް ކީނެވެ. އަދި އޭގެ ފަހުން ފުރަތަމަ ހާފުގައި ލިބުނު ޕެނަލްޓީއަކުން ކީލިއަން އެމްބާޕޭ ވަނީ ޕީއެސްޖީއަށް ލީޑު ފުޅާކޮށްދީފައެވެ.

ޕީއެސްޖީގެ ފަރާތުން މި މެޗުގައި ގިނަ ހަމަލާތަކެއް ފެނިގެންދިޔައިރު، މެޗުގެ 51 ވަނަ މިނެޓުގައި އެމްބާޕޭ ވަނީ ޕީއެސްޖީގެ ތިންވަނަ ލަނޑު ޖަހާފައެވެ. އަދި މެޗު ނިމެން އަށް މިނެޓަށް ވެފައި ވަނިކޮށް ޕީއެސްޖީގެ ހަތަރުވަނަ ލަނޑު ކާމިޔާބުކޮށްދިނީ ޑަނީލޯ ޕެރެއިރާއެވެ.

މި މޮޅާއެކު ތާވަލުގެ ދެވަނައަށް ޕީއެސްޖީ ޖެހިލީ ކުޅުނު 27 މެޗުން ލިބުނު 57 ޕޮއިންޓާއެކުއެވެ. އެއްވަނައިގައި އޮތް ލިލްއަށް 26 މެޗުން 58 ޕޮއިންޓް ލިބިފައިވާއިރު، ތިންވަނައަށް ވެއްޓުނު ލިޔޯނަށް 26 މެޗުން ވަނީ 55 ޕޮއިންޓް ލިބިފައެވެ. އަދި ޕީއެސްޖީ އަތުން ބަލިވި ޑިޖޮން އޮތީ ތާވަލުގެ ފުލުގައި 27 މެޗުން 15 ޕޮއިންޓާއެކުއެވެ.