ޖެހިޖެހިގެން ހޯދި 20 ވަނަ މޮޅާއެކު ސިޓީއަށް ބޮޑު ލީޑެއް
ތާވަލުގެ އެއްވަނައިގައި ސިޓީ އޮތީ 62 ޕޮއިންޓާއެކު
ސިޓީ އާއި ވެސްޓް ހޭމް ބައްދަލުކުރި މެޗުގެ ތެރެއިން: މި މެޗުން ސިޓީ މޮޅުވީ 2-1 ން
އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ވެސްޓް ހޭމް ޔުނައިޓެޑް ބަލިކޮށް މެންޗެސްޓާ ސިޓީން ޖެހިޖެހިގެން 20 މެޗުން މޮޅުވެ، ލީގުގެ އެއްވަނައިގައި 13 ޕޮއިންޓުގެ ލީޑެއް ނަގައިފިއެވެ.
އަމިއްލަ ދަނޑުގައި ކުޅުނު މެޗުން ސިޓީ މޮޅުވީ 2-1 ގެ ނަތީޖާއަކުންނެވެ. މި މޮޅާއެކު ސިޓީން ވަނީ ހުރިހާ މުބާރާތެއްގައި އެންމެ ފަހުން ކުޅުނު 20 މެޗުންވެސް މޮޅުވެފައެވެ. އަދި ލީގުގައި އެންމެ ފަހުން ކުޅުނު 14 މެޗުންވެސް ސިޓީ ވަނީ މޮޅުވެފައެވެ. މީގެ އިތުރުން މި މެޗަކީ ސިޓީގެ ކޯޗު ޕެޕް ގާޑިއޯލާގެ އިރުޝާދުގެ ދަށުން އެ ޓީމުން ހޯދި 200 ވަނަ މޮޅެވެ.
ހޮނިހިރު ދުވަހުގެރޭ ކުޅުނު މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގައި އެންމެ ފުރަތަމަ ލަނޑު ޖަގާ ލީޑު ނެގީ ސިޓީންނެވެ. އެގޮތުން މެޗުގެ 30 ވަނަ މިނެޓުގައި ކެވިން ޑި ބްރޭނާ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ރުބެން ޑިއާޒެވެ. އެކަމަކު ފުރަތަމަ ހާފު ނިމުމުގެ ކުރިން މިކޭލް އެންޓޯނިއޯ ވަނީ ވެސްޓް ހޭމަށް ނަތީޖާ އެއްވަރުކޮށްދީފައެވެ.
އޭގެ ފަހުން ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، މި މެޗުން ސިޓީ މޮޅުވީ މެޗުގެ 68 ވަނަ މިނެޓުގައި ޑިފެންޑަރު ޖޯން ސްޓޯންސް ކާމިޔާބުކޮށްދިން ލަނޑުންނެވެ. ސްޓޯންސް މި ލަނޑު ކާމިޔާބުކޮށްފައިވަނީ ރިޔާދު މާރޭޒް ތަނަވަސްކޮށްދިން ފުރުސަތަކުންނެވެ.
މި މޮޅާއެކު ތާވަލުގެ އެއްވަނައިގައި 13 ޕޮއިންޓުގެ ލީޑެއް ސިޓީން ނެގިއިރު، އެ ޓީމަށް ވަނީ ކުޅުނު 26 މެޗުން 62 ޕޮއިންޓް ލިބިފައެވެ. އަދި ދެވަނައިގައި އޮތް މެންޗެސްޓާ ޔުނައިޓެޑާއި ތިންވަނައިގައި އޮތް ލެސްޓާ ސިޓީއަށް 25 މެޗުން ލިބިފައިވަނީ 49 ޕޮއިންޓެވެ. މީގެ އިތުރުން ސިޓީ އަތުން ބަލިވި ވެސްޓް ހޭމް އޮތީ ތާވަލުގެ ހަތަރުވަނައިގައި 26 މެޗުން 45 ޕޮއިންޓާއެކުއެވެ.
